В. И. Деминэнь 70 иетненень
Сентябрянь 2-це чистэ 70 иеть топодевельть содавикс литературоведэнтень, критикентень, журналистэнтень, филологиянь наукань докторонтень, профессоронтень, Россиянь Писателень союзс совицянтень Василий Иванович Деминнэнь. Сон ламо иень перть важодсь «Эрзянь правда» газетасо, седе тов – Н.П. Огарев лемсэ МГУ-нь филологиянь факультетсэ, тонавтсь сы шкань журналисттнэнь. Нолдась книгат, тонавтомань пособият, монографият.
неть читнестэ А.С. Пушкин лемсэ библиотекасо ютась «Карматано эрямо...» Деминэнь ледстнемга литературань чокшне. Инжекс сакшность коллеганзо, тонавтницянзо, малавиксэнзэ. Весе пек лембестэ ледстнесть Василий Ивановичте. Те ульнесь пек валдо, эрямонь вечкиця, лиянень паронь арсиця ломань.
– Василий Иванович марто теевинь содавиксэкс студентэкс улемстэ. Нама, сон ульнесь весень туртов ветицякс. Лездась студенттнэнень, лездась миненек, од ученойтненень. Ламо вий путсь од ломантнень кастомасо, кить поладсызь сонзэ кинть. Ды, алкукскак, ламо студентэнзэ тусть журналистэнь, тонавтыцянь китнева. Сон аволь ансяк ловнось лекцият, истя жо сермадсь тонавтомань пособият, конат течияк лездыть студенттнэнень. Парсте содылизе эрзянь келенть. Малав весе монографиянзо лиссть эрзякс. Пек бажась, кадык лиятнеяк содавлизь келенть, – кортась Н.П. Огарев лемсэ МГУ-нь финнэнь-угрань филологиянь кафедрань прявтось, филологиянь наукань докторось Ю.Г. Антонов.
Сонзэ валонзо поладынзе филологиянь наукань докторось, профессорось Вера Ивановна Антонова. Вейсэ сынь важодсть журналистикань кафедрасо.
– Василий Ивановичень лован эрзянь ды мокшонь раськень просветителекс. Зяро сермадсь научной материалт! Пек ризнэсь келенть ды литературанть кисэ. Башка мель явсь «Сятко» журналонтень. Тосо малав эрьва номерсэ лиснесть покш очеркензэ, рецензиянзо, зарисовканзо. Сон маштсь сермадомо критической материалт киньгак апак покорда, апак сялдо. Невтсь виев енкстнэнь, шнась тевень коряс, чевтестэ невтсь асатыкстнэнь лангс. Содан, ламонень лездась эрямонь киява. Ансяк вана эзь вечке, зярдо сондензэ кортыльть парсте, натой туиль ваксстонок. Кафедрав совиль свал мизолкс марто, весень марто шумбракстнезь, весенень паронь арсезь, лиясто састыне морась натой. Сон миненек пек а сатны…
В.И. Деминэнь 70 иетненень паро документальной фильма анокстасть «Мордовия» ГТРК-нь «Сияжар» национальной редакциянь важодицятне. Сонзэ ваномсто инжетнень эзть кирдеве сельведест. Истя жо тетядонзо ледстнемат видео вельде кучсь Настя тейтерезэ, сон тонавтни М.В. Ломоносов лемсэ МГУ-со.
«Вал» эрзянь од сермадыцянь вейсэндявксос совицятне ловность Василий Деминэнь стихензэ ды пейдемань евтнеманзо. Василий Иванович сермадсь аволь ламо произведеният, ансяк сынь истят виевть, седейс токицят, юморескатнедеяк а кирдеват ракамодо.
– Минек журналонть туртов Василий Иванович ульнесь паро ялгакс. Эрьва ломаненть бажась кецявтомс, паро ежонзо казсь весенень. Нама, сеедьстэ кортынек келенть, литературанть емамодо, раськень стакачитнеде. Сон евтыль парос кемемань валт: «Тейтерть, карматано эрямо!». Неть валтнэнь кирдтяно мельсэнек нейгак, – ледстнесь «Сятко» журналонь прявт редакторось Людмила Ломшина.
Ламо ледстнемат Деминдэ мельсэст кирдить «Эрзянь правдань» важодицятнеяк. Редакциясо сон роботась 1977 иестэ саезь 1992 иес. Ульнесь культурань отделэнь корреспондентэкс ды теке отделэнь прявтокс. Сермадомань коряс сон киненьгак а сасавиль. Заданиясо-интервьюсо-промкссо улемстэ, сеске тоско сермадыль материал.
«Лиясто вейке кодамояк «пси» кулянть кисэ савкшнось ардомс сядо вайгельбень тарка. Паро, бути ардат чары лангсо. Сеедьстэ савкшнось эсеть пильге лангсо пулев паксява чийнемс, рудазов китнень ичемс, лов потмова кельнемс ды, кудов велявтозь, сеске озамс сермадомо – кенерезэ вандынь номерс. Весе тень пачк савсь ютамс Василий Деминнэньгак. Аволь ансяк ютамс, мейле саемс эсензэ эрямонь свалшкань коекскак. Арасель истямо тев, конань сон аволизе топавто педев-пев ды шкастонзо. Ды зярдояк эсензэ материалтнэнь эзь кадно вандыс. Веньберть а уды – валске марто сы анок сермадовкс марто. Важодема таркасояк прянь апак кепсе «пиксесь» строчкатнень лангсо. Лиясто судостонзо натой верь туиль. Свал ульнесь тевсэ лакицякс, оймамонь а содыцякс, эрямонтень кенярдыцякс!» – истя ледстни Россиянь Журналистэнь союзс совицясь Раиса Щанкина.
Василий Демин апак учне тусь эрямостонть 2018 иень февралень 1-це чистэ. Калмазь тиринь велесэнзэ – Покш Березникбуень Шугурвелесэ. Кода кортасть «Карматано эрямо…» вастовомасонть инжетне, те шкас тенст кодаяк а кемеви, Василий Иванович арась ютксонок.
Татьяна Маторкина