2026 иень маень 19-це чистэ тусь эрямосто Василий Сергеевич Брыжинский – искусствоведениянь кандидатось, профессорось, режиссерось, драматургось, РФ-нь (1999) ды МР-нь культурань заслуженной роботникесь (1977), национальной культурань факультетэнь васенце деканось (1991–2002), Мордовиянь Государственной премиянь кавксть лауреатось (2001, 2005).

Меельце килангов сонзэ ливтизь маень 21-це чистэ Саранскойсэ Иоанно-Богословской храмонть ваксс. Гражданской панихидас пурнавкшность роднянзо-раськензэ, оянзо-ялганзо, тонавтницянзо, культурасо, образованиясо важодицятне.

Важодсь Самарань областень Покш Толкан велень, Кочкурбуень Од Мурза велень школатнесэ, ульнесь Мордовиянь Гостелерадионь прявт режиссерокс. Сон совась сетнень юткс, кить тейсть Мордовиясо профессиональной телевидениянть.

Телевидениясо В.С. Брыжинский путынзе Ф.М. Чесноковонь «Кавто киява», П.С. Кирилловонь «Учительница», К.Г. Абрамовонь «Найман», «Ломантне теевсть малацекс», «Качамонь пачк» трилогиязо, П.С. Глуховонь «Кедровой пештть» ды ламо лият. Сон путсь малав кеветее спектаклят. Меельце важодемазо – А.Я. Дорогойченконь «Большая Каменка» содавикс произведениянть коряс. Сехте покш питне ваныцятне макссть К.С. Петровань «Ташто койсэ» спектаклянть туртов.
Пьесанзо совасть «Мордовская народная драма» (2003) книгантень: «Вирь чиресэ», «Мезде морасть нудейтне», «Течи чизэ Каляда», «Роштовань чокшнеть», «Тундонь гайть», «Тейтерень пия кудо».
В.С. Брыжинский, спектаклятнеде башка, анокстась телеочеркть ды содавикс ломантнеде кинофильмат. Саемга, писательтнеде К. Абрамовдо, П.Левчаевде, И. Пиняевде, артыцядонть В. Илюхиндэ ды лиятнеде.
Теде мейле Василий Сергеевичень эрямосо ушодовсь од пелькс. Сон сермадсь эрзянь ды мокшонь раськень театранть коряс диссертация. Кармась важодеме Н.П. Огарев лемсэ МГУ-нь эстетикань кафедрасо.

Се шкане эрзянь ды мокшонь ломантне пурнавкшность васенце Инекужос. Мольсть покш кортамот эсенек театрань панжомадо, тиринь искусстванть кепедемадо. Вейке чистэ рана валске Василий Сергеевичень кудосо гайгезевсь телефонось. Гайневтсь Н.П. Огарев лемсэ МГУ-нь сестэнь ректорось А.И. Сухарев, кона тердизе кортамо. Сон кортась од факультетэнь панжомадо, кона бу анокставоль эрзянь ды мокшонь искусствантень ды культурантень ломанть. В.С. Брыжинскиень седеезэнзэ совась те арсемась, те тевесь пек паро. Сон евтызе мелензэ лемдемс тонавтнемань од тарканть национальной культурань факультетэкс.

Истя панжовсь од факультет, косо деканокс ладязель Василий Сергеевич, ды те таркасонть сон важодсь 11 ие. В.С. Брыжинский састыне пурнась перьканзо ломанть, тонавтыцят. Панжозельть хоронь, хореографиянь, музыкальной, библиотечной отделениятне. Василий Сергеевич пек бажась панжомс актеронь отделения. Сон панжовсь. Вете иес весть пурнасть од ломанть. Сонзэ важодемстэ ульнесть кавто выпускт. Валонзо коряс, тонавтницятне эрзяльть ды мокшольть, содылизь тиринь келест. Факультетэсь нолдась ламо киштицят, морыцят, библиотекарть.

В.С. Брыжинский нолдась аволь аламо монографият, книгат, научной важодемат. Неть: «Народный театр мордвы» (1985), «Мордовская народная драма» (2003), «Сиянь рисьминеть. Мордовские народные игры и хороводы» (2002), «Мордовские народные игры» (2009, 2016), «Актер классической школы» (2007). Неявикс таркасо ашти колмо томсо «Каргонь Кинь ломанть» сагазо, косо 25 пьесат. Весе сынь эрзянь кельсэ ды лиссть 2012, 2013, 2014 иетнестэ. 2024 иестэ Рузонь драмань театрась путызе сонзэ «Каргонь Кинь ломанть» спектаклянть (режиссерось Н.П. Большаков), сон алтавсь Брыжинскиень 90 иень юбилеентень. Ваномонзо сакшнось сонсь автороськак.

Эряви меремс, МР-нь Някань государственной театранть репертуарсояк ули «Каргонь ки» путовкс (реж. Л.В. Шахова), сонзэ авторось В.С. Брыжинский. Ваномонзо сакшныть эйкакштне, школань тонавтницятне. «Каргонь ки» спектаклясь пек виев. Сон канды покш смусть ды киньгак а кады мельтеме. Ломантне неизь войнань зыянонть, ансяк кадовсть ломанекс: вечкицякс, мелень ваныцякс, седеймарицякс. Улить таркат, косо а кирдевить сельведтне, ули мезе лангсо пейдемскак.

Важодемань коряс аволь весть савкшнось вастневемс ды кортнемс Василий Сергеевичень марто. Кавксть якинь тензэ интервьюс, ульнинь кудосонзояк. Валдо прев, лия енов а молиця, эрьва мезес чарькодиця, эрзянь раськенть ды культуранть вечкиця. Алкуксонь ломань. Кодамо мельспароль сонзэ кунсоломс!
Вана мезе сон евтнесь тенек вастовомстонок:

«Эрямосон вейкеяк чи а ертовлинь. Ульнесть стакачить, мелявкст, пек стакаль войнань иетнестэ, сэвинек пекше лопань 25 кескавт. Ялатеке кадовинек ломанькс. Сюкпря аванень, кона зярдояк эзь пижне лангозонок. Минь сонзэ кунсолынек. Кудосонок ульнесь сэтьме ды лембе. Сюкпря алкуксонь ялгатненень!»
Василий Сергеевич Раиса Никоновна нинзэ марто сэтьместэ ды апак севно эрясть 50-де ламо иеть. Кастсть кавто эйкакшт: Сергеень ды Маринань, улить нуцькаст, правнуцькаст. Евтатано седейризкс роднянзо-раськензэ ды малавиксэнзэ туртов.

ЛЕМБЕ ВАЛТ ВАЛДО ЛЕМЕНЗЭ ЛЕДСТНЕМГА
Андрей АНИСИМОВ, МР-нь заслуженной артистэсь:

Татьяна Маторкина