Четверг, марта 28, 2024
Важное

Сергей Николаевич Кузьминэнь семиясо моротнень ды музыканть вечксть весе. Покштязо парсте налксесь балалайкасо, бабазо мазыйстэ морсесь ды содась ламодояк ламо морот. Авазояк морсесь. Тетязо сонсь тонадсь седямо эрьва кодамо гармошкасо, мейле изнизе баянонть. Армиясто сась казне марто – баян тензэ казсть. Сергей Николаевич эштё некшнизе се баянонть ды кирди мельсэнзэ. Сон ды ялаксозояк прядсть Самарасо музыкальной училища. Ды семиястост ансяк Сергей Кузьминнэнь музыкась кармась эрямонь тевекс.



Минек течинь героесь – С. Н. Кузьмин, Мордовиянь государственной филармониянь прявтось. Сон чачсь Самарасо. 1977 иестэ саезь 1981 иес тонавтнесь музыкальной училищасо баянонь классонь коряс. 1981 иестэ кармась тонавтнеме Саратовань консерваториясо. Кавто иеть служась армиясо. Теде мейле, 1986-1991 иетнестэ, тонавтнесь Самарань Искусствань ды культурань институтсо. Васня кода баянист, колмоце курсто мейле ютавтызе прянзо народной хоровой искусствань кафедрас, теке жо шкане кенерсь важодеме концертмейстерэкс. 1993-1995 иетнестэ роботась Равчирень военной округонь морамонь ды киштемань ансамблясо.

1995 иестэ Сергей Николаевич Самарасо теевсь содавиксэкс Мордовиянь филармониянь прявтонть Н. Ф. Серкин марто, кона тердизе важодеме Саранскоев. Тесэ пурнавсь-панжовсь «Росичи» од коллектив. Од цёрась сась эрямо Мордовияв. Васня важодсь концертмейстерэкс, мейле – «Росичи» моронь театрань художественной руководителекс, сонськак лиснесь баян марто сцена лангс. 1999 иестэ саезь ладизь «Росичинь» прявтокс. 2001 иестэ С. Н. Кузьмин кармась важодеме филармониянь прявтонь полавтыцякс.

– Бути ледстнемс од шканть, минь сестэ, од ломантне, кунсолынек ламо музыка. Свал яксинек концерттнэс ды музыкальной спектаклятнес, операв, балетэв. Кияк эйсэнек эзь кармавто, эзь пане. Минсь явинек покш мель музыкантень. Те миненек эрявсь. Музыкантонтень эряви кунсоломс эрьва кодамо музыка – классикасто саезь неень шкань содавикс моротнень. Ней шкатне полавтовсть, чуросто неят минек студенттнэнь концерттнэсэ. Те пек ризнэвти. Эряви парсте содамс музыкальной материалонть, марямс сонзэ, бути а кунсолат музыка, а кармат сонзэ чарькодемеяк, – корты Сергей Николаевич.

2013 иестэ Сергей Кузьмин ладязель Мордовиянь государственной филармониянь прявтокс. Чарькодеви, тесэ покш коллектив, косо улить эштё коллективть-ансамблят. Тевтнеде ламо, ансяк бути тон а аштят ве таркасо, молят икелев – весемесь изняви. Ней филармониясо важодить малав 300 ломанть, морамонь ды киштемань 11 коллектив, 14 ськамост морсицят, Государственной камерной хор ды Камерной оркестра. Тесэ свал лаказь лаки важодемась.

– Сеедьстэ филармониянть лемдтяно эсенек кудокс. Пек ламо шка ютавттано тесэ. Апак сёпо мерян, тесэ вейкине команда, конась вейсэ юты ве ёнов. Эсь творчестванть вельде бажатано кецявтомс ломантнень. Артисттнэ а аштить ве таркасо, арсить мезеяк од. Улить эйкакшонь коллективенек: «Карусельки» морамонь студиясь ды «Юность» киштемань коллективесь. Сынь сеедьстэ невтить пряст минек концерттнэсэ. Ёвтан тенк, улить артистэнек, кить зярдо-бути тосо киштсть-морасть, ней састь тенек важодеме, кочкизь творческой кинть, – ёвтни С. Н. Кузьмин.

Мордовиянь государственной филармониясь панжовсь Ине Отечественной войнань шкане, 1943 иестэ. Сонзэ васенце коллективекс ульнесь народной инструментэнь оркестрась. Сы иестэ филармониясь карми тешкстамо 80 иень юбилеенть. Тесэ уш нейке арсить, мезе анокстамс, кода ютавтомс, кода кецявтомс ваныцятнень.

– Сюкпря ёвтавлинь МР-нь Прявтонтень, Правительствантень, МР-нь Культурань, национальной политикань ды архивень тевень министерствантень, конат максыть тенек ярмаконь лезкс теемс-топавтомс проектэнек. Лездыть стамс од оршамопельть (саемга, ней ставить оршамопельть Г.И. Сураев-Королёв лемсэ «Келу» фольклорной ансамблянтень). Минь важодтяно од программатнень лангсо, путнетяно од номерт.

Мельспаро пачтямс, изнинек Президентэнь грант. Сонзэ вельде тейтяно «Музыкальный ковчег» программа. Сентябрянь 13-це чистэ невтьсынек сонзэ Республикань Культурань кудосо, мейле, октябрясто ды ноябрясто, 22 концертт Мордовиянь весе районтнэсэ. Сынь кармить питневтеме, тердьсынек весень, кинь ули мелезэ самс. Программась алтави кода покштнень, истя жо вишкинетнень туртов. Минек пек сюпав музыкальной историянок, эряви сонзэ ванстомс, невтемс.

Башка валт ёвтавлинь гастрольтнень коряс. Ардтнетяно аволь ансяк республикань районтнэва, истя жо Россиянь оштнева. Камерной оркестрась тунда ульнесь Тольяттисэ, Балаковасо, Саратовасо, Пензасо. Июньстэ Камерной хоронть тердтнизь невтеме покш концерт Саратовав. «Разгуляй» казаконь моронь ды киштемань ансамблясь ульнесь Пензасо ды Ульяновскойсэ. Истя жо июньстэ «Земляки» группась, Вячеслав Зобков якасть Беларусь Республикав. Белоруссиянть марто сёрмадстозь вейсэнь важодемадо постановления. Ули меленек ютавтомс Минск ошонь филармониянть марто вейсэнь (обменной) гастрольть. Истя жо мольсь кортамо невтемс минек коллективтнень «Витебск ошсо Славянской базарсо».

Минек эрьва артистэсь – те башка мастор. Коллективень участниктне варчнить виест сольной морамосояк. Башка валт ёвтавлинь режиссёронь отделэнть коряс. Сынст свал ламо мелест-бажамост. Видькстан, эрси, пелькстатано, ансяк те весе вейсэнь тевень коряс. Свал мерян, эряви молемс икелев, арсемс мезеяк од. Пазось максозо вийть ды шка топавтомс арсезенть, – прядызе кортамонзо С.Н. Кузьмин.

Сергей Николаевич – МР-нь культурань заслуженной роботник. Казезь ламо Благодарностьсэ ды лия казнесэ. Ансяк сехте питнеесь эрямосонзо – вечкевикс семиязо. Евгения низэ – МР-нь заслуженной артистка. Сон Саранскоень, ансяк теевсть содавиксэкс Равчирень военной округонь морамонь ды киштемань ансамблясо важодемстэ. Дмитрий Кузьмин цёраст – МР-нь Някань государственной театрань актёр. Эряви меремс, эсь мелензэ коряс прядызе Саратовань юридической академиянть. Ансяк вана истя лиссь эрямосонть, творческой тевесь кармась васенце таркасо. Ней уш пурнась сонсензэ семия. Юткошкасто Сергей Николаевич мельспаросо ашти нуцькинензэ марто, вечки яксеме мартонзо ошка.


Течи, сентябрянь 1-це чистэ Сергей Николаевич Кузьмин
тешксты 60 иень юбилеензэ.
Арсетяно тензэ кеме шумбра чи, кувака ды паро эрямо, ка дык малавиксэнзэ свал улить вакссонзо, важодемасо – од из нявкст ды сэрей тёкшт !!!

Татьяна МАТОРКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».