Эрзянь ды мокшонь раськень драмань театрасо кавто чинь перть ютась «Роштовань тамашат» спектаклянь премьерась. Те: Н. В. Гоголень «Вечера на хуторе близ Диканьки» произведениянзо коряс фантасмагориясь, ков совасть «Майская ночь, или Утопленница» ды «Ночь перед Рождеством» историятне.

Путовксось ульнесь эрзянь кельсэ. Сонзэ ютавтызе РФ-нь Писателень союзонь членэсь Мария Левщанова. Спектаклянть лангсо важодсь покш команда: Санкт-Петербургонь режиссёрось Ольга Парфёнова, Московонь художникесь-сценографистэсь Ксения Сорокина, Самарань хореографось Алексей Жандаров.

Кода пачтясть театрасо, репетициятне мольсть эрьва чистэ ды мольсть пелевес. Теде башка, артисттнэ кенерсть налксеме лия путовкстнэсэяк. Спектаклясь лиссь покш, мазый, гайгиця. Актёртнэ тосо ливтнить, ардтнить сцена ланга радиоуправляемой кедьёнкссо, киштить, морыть.

Ваныцятне неизь Гоголень содавикс геройтнень – Оксанань, Вакулань, Солохань, Идемевсенть, Прянть, Дьяконть, Екатерина Инязораванть, Ведунаванть, Ганнань, Левконь… Ды кода а пейдемс Вакула лангсо, зярдо кузнецесь Идемевсь лангсо сырги Инязоравантень мазый котынень вешеме. Мезе ансяк а теят вечкевиксэть туртов.

Спектаклясонть парсте налксить Евгения Акимова, Павел Михайлов, Евгений Благов, МР-нь заслуженной артисттнэ Елена Гудожникова, Екатерина Исайчева, Дмитрий Мишечкин, Андрей Кипайкин, Алексей Егранов ды ламо лият. Сетне, кить содасызь эрзянь келенть, сыненст седе шождаль ёвтнемс валост сцена лангсо.

Содавикс писателенть Н. В. Гоголень произведениязо эрзянь кельсэ – мельстуиця тев. Путовксось кецявтынзе весе ваныцятнень, артисттнэнень казсть виев цяпамот ды ёвтасть ламо лембе валт.

Татьяна Маторкина