Воскресенье, марта 03, 2024
Важное

М. Е. Евсевьев лемсэ МГПУ-со прядызе важодеманзо «Малая художественная этноакадемия» раськень творчествань проектэсь. Сон изнясь культурасо ды искусствасо творческой проектэнь Президентэнь грант. Этноакадемиянть ветясь художественной ды музыкальной образованиянь кафедрань прявтось В. А. Варданян. 1,5 ковонь перть эйкакштнень марто ютасть раськень промыслатнень коряс мельстуиця занятият.



Тонавтницятне содавтовсть викшнеманть, човалясо кодамонть, гончаронь тевенть, илёвсто, ленгестэ кодамонть, чувтосто керсеманть ды коклюшкасо кружовань кодамонть марто. 1930-це иетнестэ Темниковасо важодсь кружеплетениянь школа. Ансяк мейле весе ёмась. Кадовсть пек аламо ломанть, конат зярс содасызь те промысланть.

– Минек занятиятнес эйкакштне сакшность тетяст-аваст, сазорост-ялаксост марто ды весе вейсэ кочкасть кодамояк тев. Тонавтнесть сенень, мезе вешсь оймесь. Саемга, Нуштаевтне: Алексей варчнесь виензэ чувтосто керсемасонть, сазорозо викшнесь, аваст кодась илёвсто. Кой-кона эйкакштне кочкасть занятият зярыя ёнксонь коряс. Эрьва группантень тердтнинек студентт. Мейс тердтнинек? Школасо, эйкакшонь лагерьсэ, творчествань кудосо эйкакштнень марто седе тов важодемстэ сыненст седе шожда ули роботамс, – кортась Валерий Амбарцумович.

Эйкакштнень эйстэ ламот кочкакшнызь гончаронь тевенть, тосо ульнесть сехте ламо тонавтницят. Истя жо явсть мель эрзянь ды мокшонь викшнемантень. Ошонь эйкакштне содавтовсть ленгестэ кодамонть марто – сынь эзть содаяк, мезе те ленгесь.

– Художественной промыслатнеде ды ремеслатнеде эряви ёвтнемс, сынст марто эрявить содавтомс эйкакштнень, илязт ёма раськень коенек. Сюкпря ёвтавлинь минек вузонь ректоронтень М. В. Антонованень, педагогической ды художественной образованиянь факультетэнь деканонтень О.Ф. Асатряннэнь, сынь лездасть ютавтомс те паро тевенть, – пачтясь В. А. Варданян.

Этноакадемиянть пекстамосо важодсь выставка, косо невтевсть весе важодематне, малав 250. Нурька шкас теезь истямо мазычи! А кемевияк, сынст теизь эйкакшт. Тесэ Тавлань чувтонь лишминетне, викшневкст, ленгень ды илёвонь паргинеть, кружовань кодавкст, а уш зяро теезь керамикасто чакшт-вакант ды натой артозь мазый тюссо!


Эрьва участникесь казевсь сертификатсо, тонавтыцяст – дипломсо. Ёвтасынек педагогтнень лемест: С. П. Гагарина, А. В. Рябов, А. П. Русяев, Н. В. Матвеева, А. А. Манеева, М. Ю. Олькин, С. С. Глухов. Весе мелявтсть сень кувалма, уш пек куроксто прядовсть истят мельстуиця занятиятне, эдь грантось мольсь ансяк колмо ковт, пелезэ шкась ютась анокстамонтень. Эйкакштне мельспаросо сакшность тонавтнеме. Седе тов тень коряс тевс нолдавить образованиянь дополнительной программат.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».