Ютазь субутасто Орданьбуень эрицятне, вишка пизементь лангс апак вано, семиянек капшасть ошонь куншкакурос, косо яволявтозельть ламо мероприятият райононтень 95 иетнень топодеманть кувалма. Сентябрянть ушодовомсто кезэрень Орданьбуе ошоськак тешкстызе чачома чинзэ – сонензэ топодсть 234 иеть, секс неть кавто покш кенярксчитне вейсэндязельть вейс.
Валскестэ саезь васов гайгсть моротне, конатне весень тердсть ошонь куншкакурос. Сехте покш мельспаросо, нама, ульнесть эйкакштне – аволь эрьва чистэ тесэ эрсить эрьва кодат элякалемкат. Сынь ардтнесть мазылгавтозь крандаз марто алашасо, конась сась мик Баеньбуестэ – алашань кирдицянть Андрей Ладяшкинэнь фермасто.
Райононь Культурань кудонь вальмалксось аламонь-аламонь пешкедсь ломанде. Сельмес каявсть мазый цецяпусмотне, конатнень пурнызь тонавтницятне. ДК-нь ёроков важодицятне тикшестэ тейсть кудыне ёнов молиця озамо тарка, мазылгавтызь сонзэ, поводсть валдомтомкат. Фотозонанть истя лемдизьгак: «Мон кудосан». Истямо мель сась инжетнень пряскак, конатне чачсть-кассть Орданьбуесэ, ансяк умок тукшность масторонть келес ды ней чуросто сакшныть чачома ёнксов. Сынь сехте пек дивсесть, кода иеде иес полавтови Орданьбуесь. Мелят одс теезель кезэрень пингень Базаронь курось, косо сядо иеде теде икеле ульнесть ансяк купецень кудот. Теке шкане панжозель укшномань кудо. Вейке валсо, Орданьбуесь, алкукскак, чиде-чис полавтови.
Культурань кудонь сцена лангсто теде кортась райононь прявтось А. Н. Антипов, зярдо вастынзе покш инжетнень ды весе эрицятнень, конатне састь кенярксчинтень эрьва ёндо. Сынст ютксо ульнесть ломанть, конатне чачсть районсо ды седе тов теевсть содавиксэкс лия эрямо таркасо. Тургеневась – чачома тарка Самарань губерниянь Думань депутатонть А. Н. Ивановонь, Челяба ошсо эри ды важоди типографиянь прявтонь полавтыцякс А. Ю. Миронов. Сонзэ ундоксонзо Луньгинский Майдан велестэ. Тесэ эрясть Александр Юрьевичень покштянзо, тетянзо-аванзо, конатне од пингестэ тукшность Челябав. Цёрась куш кассь покш ошсо, ансяк тиринь ёнксонзо зярдояк а стувтни, эрьва иестэ сакшны тетянзо велев, панжсь тесэ эсь тев ды макссь зярыя важодема таркат эрицятненень. Истя жо инжетнень ютксоль Санкт-Петербургонь бизнесменэсь А. И. Земченко, кона тонавтнесь Безводноень ды Кеченьбуень школатнесэ, мейле тусь Питерэв. Александр Игоревич истя жо мелявты эсь тиринь ёнкстонзо. Малав кавто иеть уш Орданьбуесэ важоди сонзэ «Виолетт» стенань панелень пурнамонь цехесь, Безводнойсэ важоди «Край земли» ООО-сь, велень эрицятне кастыть мастумарть, конатнень микшнить. Тезэнь жо путсть умарень, грушань, абрикосонь ды лия чувтот. Те иестэ панжсть цех, косо умартнестэ теить «Мордовский сидр» лементь ало ченькс, пидить эрьва кодамо варения.
Кенярксчисэнть инжетне каванявсть эрьва кодамо сортонь сырадо, конатнень пидить ушодыця предпринимателесь Раднир Бикчурин Ксения нинзэ марто. Мельс пек туекшнесь коптязь сывелесь, конань теи Е. Калачева предпринимателесь. Ламо тантей прякат анокстасть А. Нестеровань «Турист» панема кудонь стряпицятне, ютксост ульнесть тортось, конань анокстызь Орданьбуень гербенть ёнов молицякс, ды чувто ёнов молиця покш прякась. Мезе ансяк эзь «касо» сонзэ тарадтнэнь лангсо: батонт, плюшкат, ватрушкат. Прякат кандсть аграрной колледжень тонавтницятнеяк. Эрьва кодамо кши марто сакшность инжеть шабра районсто – Отяжбуень панема заводсто. Тосонь прявтось О.Богоявленская – Орданьбуень эриця.
Орозбиестэ, нама, тусть эрьва кодамо тюсонь кевердезь лембе кемть, кудоютконь карсемапельть, пряс путомкат. Теде башка, кемень викшницясь Н. Аксенова весень каванясь каштомосо пидезь кашадо, парязь дураккуярдо, калязь видьмеде. Весе лотксесть мазыйстэ оршневтезь някатнень ваксс, конатнень сты Орданьбуень эрицясь Н. Седойкина, вейкенть, казашкань оршамопельсэ, рамизе од авась, конась кассь Казахстансо, а мейле эрямо сась Орданьбуев. Эштё вейке инжесь сась Хабаровск ошсто – сонзэ мельс тусь някась, конань теизь папье-машестэ 6-це классонь тонавтницясь Софья Малкина И. Страдина тонавтыцянзо марто. 9-це классонь тонавтницясь Татьяна Грунюшкина эрьгестэ ды бисерстэ коды вишка юдмат, кедькст (руз. браслет) ды брелокт, конатнень мельспаросо рамсесть инжетне. Выставканть ванкшномадо мейле весе пурнавсть залс, косо мазый моросо ушодовсь концертэсь.
Сценанть лангс лисекшнесть весе коллективтне, конатне улить эрзянь велетнесэ. Мордовиянь Прявтонть А. А. Здуновонь пельде Орданьбуень райононь эрицятненень лембе валт ёвтась МР-нь Правительствань Председателень полавтыцясь Р.М. Цыбизова.
Теде мейле казевсть эрицятне, конатне важодить лецямонь кудосо, школасо, эйдень кужосо, культурасо, велень хозяйствасо, светотехникань заводсо. Сехте покш цяпамотне алтазельть ламо эйкакшонь триця кавто семиятненень, конатнень тетятне спецоперациясот. Сыненст поздоровт ёвтась ды казнеть макссь МР-нь Госсобраниянь депутатось В. А. Голубев.
Кенярксчинь программань, кода мерить, «эскекс», кармась свадьбань платиясо од тейтертнень дефилесь. Истя жо те чистэнть ёвтавсть лембе валт колмо од семиятненень, конатне урьвакстсть-венчасть сентябрясто.
Ваныцятнень мельс пек тусть Мордовиянь филармониянь артисттнэ, конатне макссть покш концерт. Сынст полавтызь шабра ёнкстнэстэ сазь инжетне-морыцятне: Чаунзасто, Отяжелестэ, Чувашиянь Алатырь ошсто. Чокшне эрицятне таго пуромкшность ошонь курос – тесэ те шкане ютась концерт, конань максызь азортнэ – Орданьбуень морыцятне-киштицятне. Кенярксчись прядовсь уш малав пелеветь, ды ушосонтькак се шкане лембелгадокшнось.
Лариса Уральская