Неть читнестэ Эрзянь ды мокшонь раськень драмань театрасо ютась «Единство народов России: миссия, смыслы, результат» Мордовия Республикань НКО-тнень ды ероков од ломантнень туртов стратегической сессиясь. Сонзэ анокстыцясь – МР-нь Культурань, раськень политикань ды архивень тевень министерствась.
Вастовоманть ушодовомсто Нацтеатрань прявтось Светлана Дорогайкина ды театрань актрисась Ольга Грузнова ветясть инжетненень «Этно-закулисье» тематической экскурсия, конань вельде од ломантне теевсть содавиксэкс театранть историянзо марто. Экскурсиядо мейле пурнавозтнень учось мероприятиянь сехте мельстуиця пельксэсь. Театрань вишка залсонть ютась докладонь ловномась. Васенцекс кортась МР-нь культурань, раськень политикань ды архивень тевень министрань полавтыцясь Юлия Елисеева, кона тешкстась, кодамо минек республикась сюпав ламо раськень эриця ломаньсэ, истя жо кортась од ломантнень марто истят вастовоматнень питнейчидест ды кодамо покш тев топавты минек государствась раськень политиканть ванстомга, зяро вийть ды содамочить путовить те енксонть кастомга-кепетемга. Неень шкасто од ломантнень пельде учить од мельть-арсемат ды теварсевкст.
Мейле кортась МР-нь ЦУР-нь прявтонь полавтыцясь Сергей Шаргаев. Сон кунсолыцятненень евтнесь неень шкань медиапространствасо контентэнь ветямонь лувтнеде.
Истя жо од ломантненень ловнозель «Национальная безопасность: новые времена – новые угрозы» теманть лангс докладось. Анокстыцязо – МР-нь Минкультнацонь раськеютконь тевтнень ды НКО-тнень марто важодемань кевкстематнень коряс отделэнь прявтось Даниил Стенькин. Эсь кортамосонзо сон тешкстась, кода ванстомс прянть манчицятнеде ды а понгомс кажос, ламо мезе евтнесь терроризмань а нолдамонь енкстнэде.
Мельстуицякс ульнесь Культурань инициативатнень Президентэнь фондонь проектной офисэнь прявтонть Ксения Вотяковань кортамозо, кона панжинзе од ломантненень проектэнь сермадомань салавачитнень.
Меельцекс инжетне явозельть вете командава, сыненст эрявсь топавтомс зярыя заданият. Вейкесь эйстэст – проектэнь арсемась-сермадомась. Жюринть валонзо коряс, маласо шкасто неть проекттнэ кармить ванкшнозь ды сехте партнэ нолдавить тевс.
Алена Артемьева