«Огарёв Арена» Универсальной залсонть пурназель пресс-конференция, конась алтавсь Од иень кенярксчитнень ютавтомантень. Эряви меремс, республикань эрицятнень ды инжетнень туртов анокстазь культурань ды спортонь пек сюпав программа.
– Декабрянь 21-це чистэ Од иентень алтазь мероприятиятне ушодовить Мордовиянь театратнесэ. Ламо мельстуиця проектт арсезь эйкакштнень, од ломантнень ды покштнень туртов. Невтемга, те чистэнть эсь кенкшензэ панжсынзе «Якшаматянь» резиденциясь. Тесэ вадрясто невтевить минек эрзятнень ды мокшотнень раськень койтне-кирдатне. Ламо мельстуиця мероприятият анокстасть библиотекатне ды музейтне. И. Д. Воронин лемсэ Мордовиянь краеведческой музеесь невтьсы «Тайна музейных часов» интерактивной арсевксэнть, С. Д. Эрьзя лемсэ музеесь анокстынзе «Волшебные истории Деда Мороза», А. С. Пушкин лемсэ Национальной библиотекасонть ютавтови «Путешествие в Страну чудес» семиянь кузось-квестэсь ды лиятне. Ёвтаса, Од иенть тешкстамодо мейле культурань учреждениятне эсь важодемаст ушодсызь январень 2-це чистэ. Истя жо тешкстаса, весе сынь учить яволявтомат СВО-нь участниктнень семиятнень пельде, штобу ярмактомо содавтомс анокставт мероприятиятнень, – ёвтнесь МР-нь культурань, раськень политикань ды архивень тевень министрась Светлана Баулина.
Сетнень туртов, кить вечксызь оймсеманть ушосо, истя жо анокстазь ламо мероприятият. А. С. Пушкин лемсэ культурань ды оймсемань парксонть кармить важодеме Якшаматянь резиденциясь, од иень аттракционт ды пелькстамонь площадкат.
Декабрянь 31-це чистэ ошонь Советской площадьсэ коень коряс ютавтови Од иень кенярксчись. Арсевить телень аттракционтнэсэ, лишме лангсо, паровозиксэ ардтнемат. Эрьва сыцянтень мереви варчамс раськень ярсамопельтнень, кармить важодеме вишка кафеть. Прявт сценанть лангсо концертэнь программаст невтьсызь творческой коллективтне. Чокшнень 18.00 чассто весень туртов арсеви кенярксчинь салют.
Спортонь мероприятиятнеде пурнавозтненень ёвтнесь МР-нь спортонь министрань тевтнень топавтыцясь Ольга Игошева:
– Од иесь – семиянь кенярксчи ды ютавтомс сонзэ эряви лезэвстэ аволь ансяк эсь ойменть туртов, истя жо шумбрачинть туртовгак. Од иеде икелеяк, оймсема читнестэяк арсевить спортонь ламо мероприятият. Телень оймсемань прявт курокс карми «Мордовия Арена» стадионось ды сонзэ перька таркась. Истя, декабрянь 22-це чистэ панжови Телень ошкесь, конась те иестэ арсезь седе вадрясто. Теде башка, тесэ кармить мастер-класст фигурной кирякстнемань ды хоккейсэ налксемань коряс.
Ольга Игошева тешкстась, целанек Мордовиясо теевить конькасо кирякстнемань туртов 95 таркат. Саранскойсэ – весемезэ 23. Теде башка, важодеме кармить сокссо кирякстнемань коряс зярыя базат. Прявттнэ – те Соксонь-биатлононь комплексэсь ды «Саранск» стадионось. Ошонь парктнесэ арсевить кирякстнеманть туртов соксонь максомань таркат.
Башка мель вастовомасонть явозель Мордовиянь прявт ошонть мазылгавтомантень. Те иестэ тень туртов кочказь ашо-сэнь-фиалковой тюстнэсэ. Советской площадьс стявтсть мазый куз. 22 метрань сэрьсэ од кузось карми пек молеме алкуксонсенть ёнов.
Эштё вейке од ёнксокс карми «Тештев менель» иллюминациясь. Сонзэ арсить теемс Большевистской куросонть, Адмирал Ушаковнень кеврунгонть маласо.
Коень коряс мазылгавтовить ошонь микрорайонтнэнь общественной таркатнеяк. Эрицятнень пшкадемаст коряс куз аравтсть «Восточный» ЖК-сонть.
– Арсетяно, Од иень кенярксчитне кармить кенярксовт ды туить мельс, казить ламо а стувтовикс мельть-арсемат, – мерсь Саранск ошонь Администрациянь Социальной политикань коряс департаментэнь Культурань управлениянь прявтось Татьяна Салищева.
Туристической таркатнеде пресс-конференциясонть ёвтнесь МР-нь Туристско-информационной центрань прявтось Снежана Родимова:
– Минь эрьва ие кочкатано туристтнэнень вечкевикс таркатнень. Сехте вечкевиксэкс неень шкане лововить Кочкуровань райононь «Кречет» сафари-паркось, Ицялонь райононь «Смольный» раськень паркось, Темниковань райононь П. Г. Смидович лемсэ заповедникесь. Башка тарка истя жо саи Отяжелень «Каменка» пандопрясто кирякстнемань комплексэсь. Тосо неень шкасто кирякстнеманть туртов улить кото трассат, истя жо эрямга кудынеть, кафе, важоди ретро-автомобильтнень выставка. Мертяно, республикань весе эрицятнень ды инжетнень туртов оймсема читне кармить астувтовиксэкс.
Юлия Еремина
