МР-нь Някань государственной театрасо панжовсь театрань иесь. Тедеде те 86-це сезонось. Вишка ваныцятнень туртов невтевсь А. Веселовонь «Солнышко и снежные человечки» спектаклясь. Сонзэ путызе МР-нь заслуженной артисткась, режиссёрось Лилия Шахова. Пьесанть драматургось сёрмадызе румынэнь раськень ёвксонть коряс. Эйсэнзэ кавто ловняськеде историясь. Од путовксонть эйдетне вастызь мельспаросо ды виев цяпамосо.
Мезе сехте пек вечкить ловняськетне? Теленть, ловонть, якшамонть. Ды сынь тунь а учить тундонь самонть. Лембе чипаень налтнэде ловняськетне сеске солыть. Кавонест сынь сыргить чипаенть вешнеме, бажить тензэ ёвтамс, кадык сон а сакшны. Телень вирьга ютамсто каршост тенст понгить кельмезь ды вачомозь ракшатне, эрьвась пек учи тундонь самонть. Ловняськетне арсесть-тейсть ды сыньгак кармасть энялдомо чипаентень самс седе куроксто.
Спектаклянть лангсо важодсть: художникесь, МР-нь культурань заслуженной роботникесь Наталья Кочнева, музыкань авторось – актёрось-кукловодось Ирина Рахманова. Тесэ налксить колмо актёрт – Галина Хамова, Андрей Роганин ды Полина Холодова. Весе сынь някань театрань од актёрт. Галина натой налкси сеске вете рольть.
Путовксось моли 40 минутань перть. Сонзэ ваномсто эйкакштне чарькодить, эряви улемс чевте седеекс, лиянень лездыцякс ды паронь арсицякс.
Ней МР-нь Някань театрась аноксты «Время героев» фестивалентень. Сон карми сентябрянь 16-17-це читнестэ. Невтевить кавто путовкст – «Сегодня в эфире» ды «Кто разрешил вам быть героем?».
Сентябрянь 30-це чистэ «Худсовет» фестиваленть-форумонть юрсо тей инжекс сы Набережные Челны ошонь някань театрась. Сынь невтьсызь Ф. Достоевскиень «Кроткая» спектаклянть.
Татьяна Маторкина