МР-нь Някань государственной театрась велявтсь Адыгея Республикасто. Артисттнэ якасть тов «Покш гастрольть» федеральной программанть коряс («Покш гастрольть эйкакштнень ды од ломантнень туртов» ёнксось).
Октябрянь 18-20-це читнестэ Майкоп ошонь государственной филармониясо сынь невтсть зярыя спектаклят: «Проделки Козы-Дерезы» (М. Супонин), Р. Киплингень «Слонёнок» ёвксонзо коряс – «Сто тысяч «Почему?» (Л. Шахова, Э. Варданян), «Три поросёнка и Волк» (А. Финк).
Путовкстнэнь ваномо сакшность I-це, II-це, III-це ды IV-це видэнь спецшколань-интернатонь тонавтницятне, Эйкакштнень-инвалидтнэнь тетятнень-аватнень весероссиянь вейсэндявксонтень совицятне, У. Тхабисимов лемсэ искусствань колледжень студенттнэ. Спектаклядо мейле артисттнэ ютавтсть вастовома колледжень «Актёронь отделениясо» тонавтницятнень марто.
«Покш гастрольть» – минек масторонь покштояк покш проект, конанень явить мель Россиянь ламо оштнень театратне. Театрань коллективтне невтить сехте паро путовксост шабра регионтнэсэ ды васоло ёнкстнэсэ, ваныцятне содавтовить сюпав творчестванть марто.
Эряви меремс, эйкакштнень туртов истямо программась тевс нолдави РФ-нь Правительстванть Россиянь Культурань министерствантень кармавтоманзо вельде. Сон ушодсь важодеме 2017 иестэ саезь. Эйкакштнень ды од ломантнень туртов программась сехте вешевикс.
Ней Някань театрань артисттнэ кундасть путомо «Садко» спектаклянть (режиссёрось Л. Шахова). Те карми покш ды мельстуиця путовкс. Ноябрянь 4-це чистэ, Искусствань вестэнть, карми ветявомо И.Крыловонь баснянзо коряс «Смех и не только» (Л. Шахова) спектаклянть онлайн-невтема.
Татьяна Маторкина