Четверг, мая 13, 2021
Важное

Неть читнестэ Мордовиянь С.Д. Эрьзя лемсэ изобразительной искусствань музейсэ ютавтовсь вастовома, кона алтавсь «Мордовская мифология» энциклопедиянь невтемантень.
Сонзэ пурныцясь-анокстыцясь – Мордовия Республикань Правительстванть юрсо гуманитарной наукань научно-исследовательской институтось. Энциклопедиясь нолдавсь фундаментальной исследованиятнень Россиянь фондонь ярмаконь лезксэнть вельде, конань пелькстамосо НИИ-сь сайсь грант.

Мероприятиянтень сакшность содавикс учёнойтне – энциклопедиянь статьятнень автортнэ, культурасо ды раськень кевкстематнень коряс важодицятне, артыцятне, республикань журналисттнэ.
Пурнавозтненень пшкадемстэ МР-нь Правительстванть юрсо гуманитарной наукань НИИ-нь прявтось, историянь наукань докторось, профессорось Галина Куршева тешкстызе, эрзятнень ды мокшотнень мифологиянтень алтазь энциклопедиянть теемадо меленть ёвтызе институтонь икелень прявтось исторической наукань докторось Валерий Юрчёнков эштё 2002 иестэ. Теке марто тешкстызе, эрзятнень ды мокшотнень этнической койтнень марто сюлмавозь материалтнэнь вейс пурнамодо кевкстемась кепедевкшнесь эштё 1934 иестэ. Ды ансяк ламо иень ютазь Валерий Юрчёнковонь мелензэ коряс роботась алкукс ушодозель.

Ансяк те меленть, кода тешксты Валерий Анатольевичень низэ, философской наукань докторось, профессорось, Мордовия Республикань наукань заслуженной деятелесь Нина Юрчёнкова, мартонзо ламот важодицятнеяк ловсть а топавтовиксэкс. Теке марто гуманитарной наукань НИИ-нь учёнойтне арсизь сы шкань энциклопедиянь концепциянть ды малав 18 иень перть вейсэ автортнэнь-исследовательтнень (малав 50 ломанть) марто ветясть важодеманть. Энциклопедиянть лангсо важодсть этнографт, фольклористт, культурологт, философт, историкть, искусствоведт, литераторт ды лия учёнойть, конат тонавтнить эрзятнень ды мокшотнень культурасо ды эрямосо мифологиянь ёнкстнэнь.

Кода тешкстызь пурнавозтне, энциклопедиянть покш эрявиксчизэ неень шкань гуманитарной наукасонть. Сон карми вадря лездыцякс учёнойтненень ды весе лиятнененьгак аволь ансяк Мордовиясо, Россиясояк. Научной статьятнеде башка эйсэнзэ ламо иллюстративной материал: архивень снимкат ды неень шкань артыцятнень роботаст – Андрей Алёшкинэнь, Николай Макушкинэнь, Людмила Колчановань (Нарбековань), Юрий Дыринэнь, Виктор Федюнинэнь, Виолетта Митинань, Светлана Нестеровань, Тавлань чувто ланга керсицятнень роботаст фототне ды седе тов.

Энциклопедиянть тиражось аволь покш, весемезэ 300 экземплярт. Ды кода мерсь Галина Куршева, весе сынь явшевить библиотекава, наукань ды тонавтнемань заведениява.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».