Эрзянь ды мокшонь раськень регионъютконь общественной вейсэндявксонь исполкомонь Инекужов Саранскоев сакшность ламо инжеть республикань томбальдеяк. Сынст ютксто вейкесь – Наталья Сысина. Сон пингензэ перть эри Нижегородской областень Покш Болдинань райононь Пермеёва эрзянь велесэ. Наталья Васильевна важоди велень библиотекасо.
Тосо сон пурнась велень историядонть ды эрямодонть сюпавдояк сюпав материал. Теде башка, ютавтни эрьва кодат кенярксчить ды вастовомат. Истя жо сон роботы Покш Болдинань районсо ломантнень праваст коряс уполномоченноень лездыцякс.
– Наталья Васильевна, ёвтнеде веледенк.
– Пермеёвантень тедеде топодсть 410 иеть. Минек районсо сон ловови сехте кезэренсетнень ютксто вейкекс. Сонзэ васенце эрицякс ульнесть Мордовиянь Покш Игнатовань райононь Ташто Чамзань ломантне. Зярдо понгонян Покш Игнатовав, мельспаро сайсамам, гайги тиринь келесь, кортыть минек кортавкссо, весе чарькодеви. Теке мерят, сынь инжекс малавикс ломаннень. Минек велестэ тукшность ломанть ды истя вельмесь Ицялбуень Пермеёвась. Эрзятне свал вешнесть эрямс паро таркат. Истя жо районсонок ули Пикшня эрзянь веле. Тосо чачсь Павел Любаев поэтэсь. Кавто велетне кирдить ояксчинь сюлмот. Школанок пекставсь 2009 иестэ. Эйкакштне (сындест 12) тонавтнеме якить Сергеевка шабра велев. Ней велесэнек эрить 380 ломанть. 1970-це иетнестэ саезь эйкакштнень кудосо кармасть тонавтомо рузокс кортамо. Истят вешемат ульнесть эйдень кужотнень пельдеяк. Монь кирдажон парсте кортыть, содасызь келенть. Мартонок кортасть покштянок-бабанок.
Наталья Васильевнанень ульнесть сисем иеть, кода одсто тусь эрямосто тетязо. Аванзо, Мария Матвеевнань, кедь лангс кадовсть колмо эйкакшт: кавто цёрат ды тейтерь. Те авадонть велеванть те шкас якить легендат. Свал эйсэнзэ ледстнить паро ёндо. Сон аволь пек сэреель, берякшкель. Виензэ жо – цёрань. Пек ламо важодсь. Тикшень ледемстэ киненьгак а сасавиль. Тикшень ускомсто-вачкамсто истя ламо саиль сянгонть лангс, натой аволь эрьва цёрантень зняро кепедевиль. Сон а содыль а оймамо, а сизема. Веть удыль колмошка част ды таго тевс кундыль. Образованиянь коряс ветеринароль, роботась колхозсо, эрицятнень кедьстэ пурныль ловсо.
Важодсь Культурань кудонь прявтокс, парсте морсиль. Эрясь аволь кувать, 76 иеть. Весе эйкакшонзояк тусть сонзэ ёнов, тевде а пелицят, важодицят.
Школанть прядомадо мейле иень ютазь Наталья лиссь мирденень. Чачтсь. Свал ульнесь мелезэ тонавтнемс. Ды те тевесь лиссь, зярдо тензэ ульнесть 30-де ламо иеть. Заочна прядызе Нижний Новгородонь культурань колледженть, тонавтнесь библиотечной тевенть коряс. Седе тов – Московонь международной университетэнть. Васня важодсь Пермеёвасо Культурань кудонь прявтокс, Сергеевка велень библиотекасо, мейле ютась эсензэ велес. Библиотекась, косо важоди 2008 иестэ саезь, кармась ломантнень туртов пурнавомань ды оймсемань таркакс. Сонзэ сеедьстэ кевкстнить, ков пшкадемс те эли тона тевенть коряс.
2021 иестэ сонзэ библиотекась изнясь областень пелькстамосо, кода культурань сехте паро учреждения. Иень ютазь лиссь изницякс «Культурасо сехте паро роботыця» пелькстамосонть. Важодеманзо кисэ тешкстазь ламо казнесэ.
– Се шкастонть саезь, кода библиотеканть кармась «Одноклассники» социальной сетьсэнть группанок, монень кармасть пшкалеме эрьва ёндо, натой омбо масторсто. Кие вешни малавиксэнзэ, кие теи родословной, кие бажи седе ламо содамс тиринь ёнкстонзо. Теевинь содавиксэкс ламо паро ломань марто, кить чачсть велесэнек, ней жо сравтовсть масторонок келес. Мельспаросо лездан. Натой кецнян, зярдо ули максомс кодамояк материал. Библиотекасо пурнынь ды ванстан ламо материалт веледенть, ломантнеде, ули фотоархив. Весе те лезды монсень тевсэнть ды лиятнененьгак, – пачти Наталья Сысина.
Эрьва иень апрельстэ Покш Болдинань Пикшня велесэ тешкстыть Эрзянь келень чинть. Сон теевсь райононь фестивалекс. Тов паро инжекс тенст яксить Пермеёвань аватнеяк. Вейсэ ютавтыть-невтить тундонь койть-кирдат.
Сынськак пурнасть «Ойме» фольклорной ансамбля, косо морсить вете ават.
Улить эрзянь оршамопелест. Наталья Васильевна морси ансамблясо ды ськамонзояк. Культурань кудосо панжсть вишка музей, косо пурназь эрзятнень кезэрень ули-парост. Инжетнень туртов Н. В. Сысина ютавты экскурсият.
– Ламо ёвтнян эрзятнеде. Кить минь, косто саевинек, кодат содавикс ломанть лиссть раськестэнек. Свал кортан, бути ули меленк содамс эрзянь келенть, панжинк «Чилисеманть». Тосо келесь ванькс. Тексттнэ шождат ды чарькодевикст. Библиотекасо улить эрзянь книганок. Нама, эрявольть эштёяк. Бути понгонян Саранскоев – свал рамсян выставкасто эли кияк кази. Саемга, Т. И. Ларина казнекшни, сюкпря тензэ. Инекужосо мон васенцеде. Ламоксть ульнинь Мордовиясо эрьва кодат кенярксчитнесэ ды вастовоматнесэ. Свал дивсян, кода парсте весемесь тейневи-анокстави. Минь эрятано ве ёно, башка. Тей самсто, зярдо эрьва кодамо ёнкссто пурнавить эрзятне ды мокшотне, чарькодят: минь аволь ськамонок, минь эрятано, важодтяно!
– Наталья Васильевна, мезе арсетядо эрзянь келенть сы шкадонзо?
– Эрямом перть свал арсян те эли тона событиятнень коряс. Ды вана мезе рединь: меельце шкасто од ломантне кармасть явомо мель эрзянь келентень, историянтень, койтненень. Сынь а виздить ёвтамс, кодамо раськень ломанть. Морот ды фестивальть – те вадря тевесь. Ансяк, койсэнь, пек аламо ёвтнетяно эсенек эйстэ Интернетсэ. Эряви важодемс од ломантнень марто. Паряк, эрявить тейнемс эйкакштнень ды од ломантнень туртов видеороликть. Ней весе эрямось лаки Интернетсэ. Кадык сёрмадовкстнэ кармить нурькинеть, ансяк пачтить минек раськеденть, эрзятнеде, кандыть смусть. Те пек а сатны! Бути а кундамс те тевентень, ламо ёмавттано.
Наталья Васильевнань мирдензэ, Михаил Анатольевичень, ундоксонзо белорусонь. Эрзянь велесэ эрязь, сон, нама, тонавтнизе келенть. Парсте чарькоди. Вейсэ сынь эрить 33 иеть ды сон те шкас дивси эрзятнень лангс. Весе сынь эрьва мезес маштыця кедть. Теде башка, эрзятнень пек паро обуцяст: сынь вейке-вейкенень лездыцят. Бути кияк кулы – весе сыть канстонь кандомо ды лездамо, мезеяк тееви скалонть марто – ломантне тагояк пурныть лезкс. Михаил тонавтнесь агрономокс. Ней кирди мекшть.
– Мирдем свал корты: эрямс велесэ ды а трямс ракшат, а путомс пире – те преступления, – ёвтни Наталья Васильевна. Секскак сынь кирдить скал (икеле натой колмо кирдсть), путнить пире. Цёраст 14 иестэ саезь кармась роботамо теке покш ломань. Ней сон студент, кудов сазь, сеске кунды лездамо.
Сысинтнэнь колмо эйкакшост. Татьяна прядызе Нижний Новгород ошсо велень хозяйствань академиянть, важоди бухгалтерэкс. Сон казсь тетянзо-аванзо туртов нуцькат – цёрынеть-кавтаськеть. Никита тонавтни Нижний Новгородонь Р. Е. Алексеев лемсэ технической университетсэ ядерной энергетикань ды технической физикань факультетсэ. Анна тонавтни Сергеевкань школасо 11-це классо. Сон якстере диплом марто прядызе эйкакшонь искусствань школанть, гитарань классонть коряс. Весе сынь тевде а пелицят. Эрьвась соды, мезе теемс, киньгак кармавтомс а эряви. Наталья Васильевнань сеедьстэ кевкстнить, кона шкане эрьва ков кенери?
– Сюкпря вечкевикс семиям туртов. Сон – монь кеме тыл, алкуксонь неже, – тешксты минек героинясь.
Эрьва недлячистэ сынь пурнавкшныть вейс. Наталья Васильевна пиди-пани эрзянь каванямопельть: прякат, каймакт, сюкорот. Нуцькатнень валост коряс, истят тантейть, кодат бабанзо, киньгак арасть.
Татьяна Маторкина