Воскресенье, июля 21, 2024
Важное



Нина Кошелевань юбилейной концертэзэ



Неть читнестэ И. М. Яушев лемсэ музыкальной театрасо ульнесь Мордовиянь народной артистканть, РФ-нь искусствань заслуженной деятеленть Нина Кошелевань юбилейной концертэсь. Те сон сёрмадызе Мордовиянь Гимнантень музыканть, кармась «Алёна Арзамасская» раськень васенце балетэнь авторокс ды эштё 300 ламо произведениятнень, конатне весе алтавить тиринь ёнксонтень. Композиторонть юбилейной чокшненть инжекс кармасть ялганзо, малавикс ломанензэ ды сонзэ творчествань вечкицятне.

Мордовия Республикань Прявтонть Артём Здуновонь пельде поздоровт ёвтась МР-нь Культурань, раськень политикань ды архивень тевень министрась Светлана Баулина, кона тешкстызе Нина Васильевнань лия ёнов а молиця талантонзо. Масторонь ды региононь культурной сюпавчинтень сонзэ путовксозо тешкстазь ламодояк ламо наградасо ды почётонь лемтнесэ, юбилеенть кувалма жо максозь эштё вейке – «Мордовия Республикань Государственной премиянь лауреат».

Нина Кошелеванень поздоровонь ёвтамо сакшность Ульяновскоень, Пензань ды Нижегородской областтнесэ эриця эрзятне ды мокшотне. Кода тешкстызе Эрзянь ды мокшонь раськетнень регионъютконь общественной вейсэндявксонь прявтось Юрий Мишанин, композиторонть лемс сехте лембе поздоровт кучить эрьва кодамо регионсто раськень автономиятнес совицятне – Калининградсто саезь Камчатканть видьс, Сургутсто саезь Крымс. Ды, эряви меремс, Нина Васильевнань сёрмадовт музыканть вадрясто содасызь ды вечксызь Россиянть келес ды сонзэ томбалеяк. Теде кортасть Марий Элэнь ды Чувашиянь инжетне. А вана Гнесинтнэнь лемсэ Россиянь музыкань академиянь хоровой ды сольной народной морамонь кафедрань доцентэсь Юрий Наумкин тешкстызе: «Нина Васильевнань произведениянзо уш аволь вейке кементь иеть покш мельсэ морыть Московонь православной ВУЗ-нь студенттнэ ды аспиранттнэ».

Нина Васильевнань а стяко лемдить «Мордовиянь Пахмутовакс», «Эрзянь-мокшонь раськень каштанчикс», «Республикань национальной достояниякс». Россиянь Композитортнэнь союзонь ответственной секретаресь, Музыкознаниянь гильдиянь ды Россиянь музыкальной союзонь музыкальной образованиянь гильдиянь научной секретаресь Павел Левадный казсь Нина Кошелеванень «За трудолюбие и искусство» почётной знак, конась эштёяк тешксты сонзэ ёрокчинть.

Паряк, Нина Васильевнанень эстензэ ульнесь а шожда ламодояк ламо сёрмадовт произведениятнень ютксто юбилейной концертэнтень пурнамс ансяк колоньгемень. Эдь весементь эйстэ пурнавольть бу зярыя концертной программат. Зярс жо, ваныцятне покш мельсэ кунсолость содавикс ды од произведениятнень. Седейлембе марто гайгсть тиринь масторонтень алтазь сочинениятне, конатнесэ невтевсть отечественной историянь героической тевтне. Те парсте невтевсь «Минек масторсо» триптихсэнть, «Навеки вместе» ды «Кому поют колокола» кантататнесэ, «Россия, кельгома Россия», «Россиясо», «Журавушка», «Баллада о солдате» моротнесэ, конатне ладязь эрзянь, мокшонь ды рузонь поэттнэнь стихест лангс.

Пек мельстуицякс кармасть «Алёна Арзамасская» ды «Мордовская легенда» балетэнь спектаклятнестэ саевкстнэ. Седейс токиця казне Нина Васильевнанень тейсть тиринь Ташто Шайговань райононь Сыре Теризморга велень артисттнэ. Меельце аккордокс жо кармась «Панжи, панжи лайме порась» морось, конанть морызь «Келу» ансамблянь артисттнэ, а сынст марто весе залось.

Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».