Чаунзань историко-краеведческой музеесь – И.Д. Воронин лемсэ республикань Краеведениянь музеень филиал. Сон панжозель 1992 иестэ. Тесэ ванстови райононь сюпав историясь, те модасонть чачозь паро ломантнеде информациясь, сетнеде, кить тейсть покш путовкс минек масторонтень. Минь пачколинек музеев инжекс, косо ютавтсть тенек мельстуиця экскурсия ды евтнетяно теде газетасонок.
Музеень зданиясь стявтозель 1958 иестэ. Икеле тесэ ульнесь государственной банк. 90-це иетнень ушодкссто райононь активисттнэ А.В. Юрийчук, Л.В. Морозова, Л.Н. Мамайкина ды краеведэсь П.Я. Машканцев кармасть пурнамо велетнева экспонатт. Шкань ютазь музеесь панжинзе кенкшензэ.
– Мон сынь важодеме музеев 2004 иестэ, ладимизь прявтокс. Паро лездыцякс ды превс путыцякс тень кармась научной сотрудникесь Н.В. Кондратьева. Се шкастонть зданиясонок арасель ведь ды канализация. Покш витнема-петнема ютась 2013 иестэ. Сюкпря И.Д. Воронин лемсэ Краеведениянь музеень се шкань прявтонтень Л.А. Шабалкинанень, пек лездась. Ветязель ведь, уштомань эсенек система, полавтозель латось. Шождасто лекстинек ды седеяк покш мельсэ кундынек музеень тевтнес, – ледстни музеень прявтось Татьяна Ивановна Иванова.
Чамзинкань музейсэнть ниле залт: этнографиянь, боевой славань, советской шкась ды неень шкась. Эрзянь раськень историясь невтеви этнографиянь залсонть. Тей экспонаттнэнь ускизь Покш Маризьвелестэ, Вишка Маризьвелестэ, Мокшалейстэ, Пенгелейстэ. Неявикс таркасо ашти эрзянь каштомонь макетэсь. Те залонть пек вечксызь вишка эйкакштне. Тесэ ванстовить истят кедьенкст, конатнень сынь костояк эзизь нейне: севонень ды чувтонь пенчть-вакант, ухватт, пивтембарь, рубель, валек, утюгт, коромысла, кодамонь стан, пряха. Ули натой чувтонь кровать, кона теезь эскевтеме, лангсонзо олгосо эцезь тодовт-тешак. Кроватенть вакссо понгавтозь лавсь. Кезэрень шкане эрьванть ульнесь эсензэ тарказо: сыретне маднесть каштлангс, одтнэ – кроватьс, эйкакштне – полатьсэ, эйдинетне лавсьсэ. Музейсэнть ули одирьвань парь, конань марто сакшнось урьвась мирдень кудос. Сонзэ тейсть пекшестэ, кортыть, чеертне истя эзть порне пекшенть. Нама, невтеви эрзянь авань оршамопелесь. Сонзэ ускизь Вишка Маризьвелестэ. Истя жо улить рузавань юбкат-кофтат, цюлкат, кемть, истя яксесть 1950-це иетнестэ. Кизна весе оршамопельтнень коштавтыть чипай ало.
Башка стендсэ невтевить Гражданской войнань участниктнень фотографияст. Экспозициянь покш пелькс алтазь Ине Отечественной войнань участниктненень. Чаунзань районсто фронтов тукшность 7 500 ломанть. Те шкас эри В.Я. Чашина, сонензэ 101 ие. Тесэ чачсть Советской Союзонь колмо Геройть. Площадьсэ сыненст ладязь бюстт, райононь ульцятне кандтнить лемест. Те: Т.С. Горячкин, А.Д. Данилов, И.И. Радайкин. К.Г. Белоус – Славань колмо орденэнь кавалер. Фотографиясо сынь одт, мазыйть, виевть! Аволь аламо аваткак фронтсольть. Сынь ульнесть связисткакс, санитаркакс. Фотографиятнесэ невтевить 1941 иень ды 1945 иень Парадонь участниктне, Сталинградской, Курской ды лия покш битватнень тюрицятне.
1941–1944 иетнестэ Чаунзасо ульнесь васенце авиационной эскадрильянь 3-це учебной штабось. Эрявсь тонавтомс ды анокстамс экипажтнес од летчикть, штурмант. Теориянть тонавтнесть Саранскоень 3-це военно-воздушной авиационной училищасо ды ливтнесть учебной аэродромсто. Теде ледстнемга Чамзинка-Березники-Сурское киулосонть 1988 иестэ стявтозель самолетонь макет.
Афганистанонь войнасонть чавовсть Чаунзабуестэ ниле церат: Владимир Бичуркин, Сергей Давыдов, Олег Корнилов, Сергей Маркин. Чечнясо маштовсть вете: Алексей Москаев, Алексей Назаров, Алексей Осипов, Сергей Трубкин, Олег Храмов. Малавиксэст максызь музеев оршамопелест ды лия ули-парост. Сынь свал сакшныть тей школань тонавтницятнень марто вастовоматнес.
Башка экспозиция алтави СВО-нь участниктненень. Волонтертнэ усксть музеев эрьва кодат экспонатт ды трофейть. Стака ваномс весе тень лангс.
Кода а евтнемс советской шкань эрямодонть? Музейсэнть ашти умонь шкань телевизор, васенцетнень эйстэ, конатнень кармасть нолдамо. Ули чувтонь комод, шкаф, буфет, трельяж, пильгине лангсо вишка мазый креслат. Истя жо невтевить умонь шпалерт, сынст нолдасть Темниковань «Красная роза» фабрикасо. 1970-це иетнестэ аватне кармасть яксеме крепдешиновой палясо, лаковой туфлясо. Сыньгак невтевить музейсэнть.
1956 иестэ Чаунзань районсо ушодсь важодеме цементэнь заводось. Комсомольский поселкантень косто ансяк эзть са эрицят, ардсть весе СССР-стэ од ломантне. Алексеевканть вакссо мусть ламо опока, пор, мергель. Самай те материалдонть тейсть цемент. Эряви меремс, районсонть улить ламо эрьва кодат покш предприятият. «Лато» АО-сь нолды шифер ды цементэнь плитат. «Мечта» ООО-нть ули нармунень фабриказо, оень заводозо. Музеесь пшкадсь тенст лездамс пурнамс производствадонть евтниця экспонатт. Ды шкань ютазь сась алкуксонь казне: важодицятнень спецодеждаст, фотографияст, продукциянь нолдамонь упаковкатне. Лиссь пек вадря стенд.
Паро экспозиция анокстазь содавикс ломантнеде ды райононь почетной эрицятнеде. Тесэ невтевить милициянь капитанонть П.Т. Суродеевень, конась чавовсь преступникень кундамсто, фотографиянзо; Республикань больницянь прявт врачось Е.И. Новиков; ученоесь, финно-угроведэсь, филологиянь наукань докторось, профессорось, Россиянь ды МАССР-нь наукань заслуженной деятелесь Д.В. Цыганкин ды ламо лиятне.
Цют эзинек стувто ледстямс мода потсто муезь артефакттнэнь! Те – мамонтонь ловажа (лопатка) ды кавто пей марто челюстень пелькс. Весемезэ музейсэнть ванстовить 4 тежадо ламо экспонатт. Эрьва иестэ фондось пешкеди, ломантне кандыть эрьва мезть. Ансяк ризнэвти, фондонь ванстомань таркась пек вишкине.
2025 иестэ «Семья» национальной проектэнть вельде музеентень явозельть 5 млн целковойть. Тесэ одкстомтозель материально-технической базась. Ладязельть сулика потсо кувака ды келей витринат, подставкат, подиумт, манекент, каталогонь ящикть, стеллажт, кавто панельной телевизорт, од компьютерт, видеокамерат. Весе те пек кецявты. Ансяк вана инжень вастома залост пек вишкине, а ков кельгстямс ломантнень. Ды зняро пурнавсть экспонатт, кодашка фондост, куш од здания эряви!
– Покш сюкпря евтатано МР-нь культурань, раськень политикань ды архивень тевень министрантень С.Н. Баулинанень, И.Д. Воронин лемсэ Краеведениянь музеень прявтонтень Д.В. Фроловнень, конат лездасть теемс одкстомтоматнень, – мерсь Татьяна Ивановна.
Музейсэнть прявттонть башка важодить эште колмо ломанть: научной сотрудникесь Н.Н. Тимонькина, фондонь важодицясь С.А. Архипова ды смотрителесь Л.А. Асташкина. Весементь теить вейсэ: ютавтыть покш вастовомат, пурныть-анокстыть выставкат, ветить фондонь каталогтнень. Сеедьстэ вастневить школань тонавтницятнень марто. Свал бажить арсемс мезеяк од, ютавтомс мельстуиця кенярксчить. Сынь вечксызь тевест ды паро мельсэ вастыть эрьва инженть.
Татьяна Маторкина