Тедеде Мордовиянь Писателень союзонтень топодсть 90 иеть. Тень коряс кенярксчинь промкс ютась А. С. Пушкин лемсэ библиотекасо. Васняяк Мордовиянь писательтне пурнавкшность вейсэнь промксов, косо сынь вастовсть Московсто сазь писательтнень марто. Лиссь мельстуиця кортамо.

Теде мейле ушодовсь юбилеень кенярксчись. Тей сакшность писательть, журналистт, од сёрмадыцят, библиотекасо важодицят, весе, кить явить мель литературантень. Паро ёжо весенень казсь Н. П. Огарёв лемсэ МГУ-нь Национальной культурань институтонь «Гайги моро» ансамблясь, косо морсить студенттнэ.

Минек республикасо свалшкане нолдавить рузонь, эрзянь ды мокшонь, татаронь кельсэ книгат. Ветяви покш важодема од сёрмадыцятнень марто. Ёроков писательтне казевить литературань премиясо.

МР-нь Прявтонть пельде лембе вал марто пурнавозтненень пшкадсь МР-нь Прявтонь ды МР-нь Правительствань Администрациянь Руководителень полавтыцясь – МР-нь Прявтонь Пресс-службань ветицясь Елена Башкирцева.

– Мордовиясо аволь аламо ломанть, конат тейсть покш путовкс минек литературантень, теизь региононок содавиксэкс. Мельспаро тешкстамс, улить од сёрмадыцянок, конатне нолдыть виев ды мельстуиця произведеният. Кецятано, течи кенярксчинтень сась РФ-нь Писателень союзонь прявтось Н. Ф. Иванов. Койсэнь, сон алкуксонь герой, кона ульнесь передовойсэ, «пси точкатнесэ». Ней тонавты военной корреспондентт. Те паро, миненек мереви теевемс мартонзо содавиксэкс, кортамс, тонавтнемс пельдензэ. Писательтне седейсэст марить ды неить, мезе моли масторсонок. Течи эряви тенек кепедемс тиринь ёнксонтень вечкемань теманть. Валось – пшти, виев оружия, конась ули минек, – кортась Елена Васильевна.

Сон казинзе Мордовиянь писательтнень покш наградасо.

Художественной литературасо путовкстнэнь кисэ «МР-нь Заслуженной поэт» лемесь максовсь МР-нь Писателень союзонь правлениянь прявтонтень, поэтэнтень ды ютавтыцянтень Татьяна Швецованень.

«МР-нь Государственной премиянь лауреат» лемсэ казевсь Владимир Корчеганов поэтэсь. «За личный вклад в развитие Республики Мордовия» почётной тешкссэ казевсть писательтне Анатолий Ганчин, Пелагея Алёшина, Николай Голенков, Геннадий Гребенцов.

Московсто сакшность РФ-нь Писателень союзонь прявтось Николай Иванов ды писательтне Светлана Вьюгина, Нина Дьякова, Анна Токарева ды Елизавета Хапланова. Сыньгак ёвтасть лембе валт ды явшесть казнеть.

Поздоровт ёвтасть газетань ды журналтнэнь прявт редактортнэ.

– Течи республикань культурань эрямосо покш кенярксчи – Мордовиянь Писателень союзонтень топодсть 90 иеть. Писательтне – масторонть духовной сюпавчизэ. Мордовиянь писательтне тейсть покш путовкс Россиянь литературантень. Сынст произведенияст совасть сырнень фондс. Кода а ледстямс Кузьма Абрамовонь, Яков Пинясовонь, Никул Эркаень, Иван Пиняевень, Юрий Кузнецовонь ды лиятнень лемест. Мельспаро, сынст тевест поладыть одтнэяк. Арсян тенк од мельть-бажамот, эштёяк седе ламо сёрмадомс, нолдамс книгат! Кадык ловныцятне тынк произведениятнесэ муить каршо валт кевкстемаст ды вешнемаст лангс! – кортась МР-нь Писателень союзонь правлениянь прявтось Т. П. Швецова.

Седе тов ютась кавто книгань презентация, сынст нолдызь союзонь юбилеентень. Вейкесь – «Мезе кадат эсеть мельга…» – алтави поэтэнть, «Чилисема» журналонь икелень прявт редакторонть Николай Ишуткинэнь ледстнемга. Тей совасть сондензэ ледстнемат малавиксэнзэ, коллеганзо, ялганзо, литературоведтнэнь, тонавтницянзо пельде. Улить стихензэ, конат эзть нолдавкшно, ды эсензэ архивстэ ламо фотографият.

«На солнечной стороне» омбоце книгасонть МР-нь Писателень союзонь члентнэнь произведенияст эрзянь, мокшонь, рузонь кельсэ.

Историясь

ды течинь чись

МР-нь Писателень союзось – «Россиянь Писателень союз» Весероссиянь общественной вейсэндявксонь минек региононь отделения. 2021 иестэ саезь сонзэ вети поэтэсь, ютавтыцясь Татьяна Швецова.

Течи вейсэндявксонтень совить 50 писательть. Сынь эрить Саранскойсэ ды республикань районтнэсэ. Сехте сыресь ютксост – Михаил Васильевич Маторкин, сонензэ 87 иеть.

Икеле иетнестэ союзонь прявтокс ульнесть истят содавикс ломантне: К. А. Нуянзин, А. Я. Дорогойченко, Н. И. Филиппов, А. Д. Куторкин, И. Д. Воронин, С. Е. Вечканов, А. К. Мартынов, И. М. Девин, И. А. Калинкин, А. М. Доронин, Н. И. Ишуткин, А. А. Громыхин.

Союзось покш мель яви од ломантнень марто важодемантень. Истя, важоди «Пегас» литературань студиянть, «Вал» вейсэндявксонть марто. Эрьва иестэ аноксты од ломанень семинарт, конат молить зярыя секциява.

Ютавты эрьва кодат литературань вастовомат, творческой чокшнеть, книгань презентацият. Союзось лезды невтемс прянть литературань весероссиянь пелькстамотнесэ. Улить эсензэ конкурсонзояк.

Литературасо изнявкстнэнь кисэ эрьва иестэ максыть МР-нь Прявтонь премиянь лауреатонь лемть ды МР-нь Государственной премиянь лауреатонь лемть. Ули башка премия од автортнэнень.

Союзонь члентнэ сёрмадыть эрзянь, мокшонь, татаронь ды рузонь кельтнесэ. Кой-кить сёрмадыть кавто кельсэяк. Сынст произведенияст ютавтовить лия кельтнес.

Писателень союзось лезды нолдамс од сёрмадыцятнень произведенияст башка книгасо, максы рукописест Конкурсов, конань эрьва иестэ ютавты МР-нь Прявтонь ды МР-нь Правительствань Администрациясь. Мелят нолдазельть зярыя автортнэнь книгаст, кить макссть яволявтомат.

МР-нь Писателень союзонь юбилеев сакшность покш инжеть Московсто. Ютксост эйкакшонь писателесь Светлана Вьюгина. Сон важоди РФ-нь Писателень союзонь приёмной комиссиясо секретарекс. Школадо мейле прядызе М. В. Ломоносов лемсэ МГУ-нь журналистикань факультетэнть. Важодсь «Советский патриот» газетасо. Союзсо роботы 1976 иестэ саезь, сась тов нурька шкас ды кадовсь. Кармась сёрмадомо эйкакштнень туртов. Лиссь 11 книгазо. Ней пейдезь ледстни, кода васенце семинарсо васня сялдокшнызь сёрмадовксонзо, натой арсесь, зярдояк а карми сёрмадомо. Ёжозо полавтовсь, зярдо пандызь тензэ васенце гонораронть. Вишка ёвтнеманть кисэ макссть 400 целковойть! Сеть шкатнестэ – покш ярмакт. Ней важодеманзо перть ламо вастневи ды кортни Россиянь писательтнень марто, сетнень, кить бажить совамс союзс. Лезды тенст ды оймавты. Светлана Васильевна ёвтнесь, союзсо сон кенерсь важодеме Ине Отечественной войнань фронтовиктнень-писательтнень марто. Саемга, прявтокс важодсь писателесь Юрий Бондарев. Парсте содылинзе Валентин Распутинэнь, Юлия Друнинань. Видьксты, тетязояк ульнесь фронтсо. Ансяк эйстэнзэ сёрмадсь аламо. Ней жо, кода вастневи школасо тонавтницятнень марто, энялды эйкакштненень кортнемс покштяст-сырькаест марто, сёрмадомс ледстнемаст. Весе те кадови историяс. Сонгак сёрмадызе алкукс лисезь тевенть, кода тетянзо идизе лишме.

Саранскойсэ С. В. Вьюгина васенцеде, пек тусь мелезэнзэ. Сон вадрясто содылизе минек писателенть, МР-нь Писателень союзонь икелень прявтонть А. М. Доронинэнь.

Инжетне якасть Эрзянь ды мокшонь национальной драматической театрав, косо ванызь К. Абрамовонь романонзо коряс «Пургаз» спектаклянть.

Татьяна Маторкина