Неть читнестэ республикань Раськень творчествань кудось ютавтсь Анимационной кинонь Россиянь панжадо 26-це фестиваль. Фестивалень программась невтезель республикань тонавтомань таркатнесэ.
Тедеде Анимационной кинонь фестивалесь кавксоцеде ютавтызе «Панжадо Премьера» весероссиянь акциянть. Сонзэ вельде Мордовиянь вишка ваныцятне неизь неень шкань мультфильматнень ды кочкизь сетнень, конат сехте пек тусть мелезэст.
Нама, эрьва авторось учи, штобу сонзэ важодеманть неевлизь ды максовольть питне жюрись, инжетне ды фестивалень участниктне. Эрьва режиссёронть туртов сехте покш судьясь – те Ваныцясь, конанень туи мельс фильмась, конась максы вайгелензэ кисэнзэ. «Панжадо Премьерасо» призэнь таркантень аниматортнэ кецнить седеяк пек, аволь истя, кода жюринь питнень максомантень.
Кода икеле иетнестэяк, «Панжадо Премьерань» эрьва ошсонть-участниксэнть кочказель ваныцятнень мелест коряс сехте паро фильмась. Се картинась, кона пурнась сехте ламо вайгельть, тензэ максови Фестивалень башка казне.
Мордовия Республикань вишка ваныцятнень туртов тусть мельс истят фильматне:
«За звездой Рождества» (2019) режиссёрось Н.Федченко;
«Лунодачники» (2019) режиссёрось А.Рубецкой;
«Орешек» (2020) режиссёрось О.Холодова;
«Лувр» (2019) режиссёрось М.Сафронов;
«Мамин помощник» (2020) режиссёрось М.Савельева.
Изницякс кармась «Правда и Кривда» (2020) Н.Бойконь анимационной фильмась.