Среда, февраля 28, 2024
Важное

Зярыя иеде икеле Покш Игнатовасо «Культура» нацпроектэнть лувсо вадря витнемадо мейле панжозель Культурань кудось. Зярыя шкань ютазь одкстомтозь ДК-сонть ушодызе важодеманзо гончарной мастерскоесь, косо башка мель кармась явовомо эйкакштнень марто важодемантень.



– Весемесь, мезесь эряви мастерскоенть важодеманзо туртов, миненек явозель программань лувсо. Сонзэ алов эрявсь ансяк муемс тарка. Ды помещениянтень оборудованиянть аравтомадо мейле сеске ушодозель важодемась, – ёвтни Покш Игнатовань ДК-нь прявтось Ирина Николаевна Галанова. – Ансяк бу эйкакштнень аволь ёма мелест те ремеслантень. Эдь Мордовиясо зярдо-бути сон важодсь пек виевстэ, сась шка вельмевтемс.

Мастерскоенть панжоманзо марто ДК-сонть кармась ветявомо «Чудо глина» гончарной кружок. Эйкакштнень тонавтыцякс кармась ёроков педагогось, кедьчелькевесь Михаил Александрович Сонаев. Группатнес якиця эйкакштнень улить изнявксосткак: вишка мастертнэ тонавтнизь гончарной кругонть, эсь теевкстнэнь пидемга маштыть важодеме муфельной пецьканть марто. Теке марто эйкакштне тонавтнить кедьёнкстнэнь теемань эрьва кодат техникатнень.

– «Чудо глина» гончарной кружокс якить эрьва кодамо иень эйкакшт, эйдень кужосто саезь. Седе ламо эйстэст эрсить кизэнь шкастонть. А вана мастерскоенек аволь пек покш, секскак те шкастонть занятиятнень ветятано фойесэнть. Тозонь путови покш столь ды ушодови роботась. Эйкакштне покш мельсэ теить-лепить эрьва кодат налкшкеть, вешкемкат, чакшт-вакант, – ёвтни Ирина Николаевна. – Михаил Александрович истя жо ардтни минек райононь велетнева, косо улить культурань кудот эли школат, ды ютавты эйкакштнень туртов мастер-класст. Велетнесэ сонзэ пек учить. Михаил Александрович арды сыненст, ютавты занятиятнень ды мекев велявты покш сюпавчи марто – уски эрьва кодат вешкемкат, налкшкеть. Тесэ минек ули муфельной пецька, косо весе ускозь теевкстнэ пидевить. Мейле велетнестэ сыть клубонь прявттнэ эли тонавтыцятне ды саить анок роботатнень, конатнесэ сёрмадозь кие теицязо. Истя роботатне пачкодить эсь азортнэнень.

Сонсь кедьчелькевесь Михаил Сонаев истямо важодеманть лови пек эрявиксэкс.
– Мон пек парсте содан, велень эйкакштнень туртов пек ламо кодаткак кружокт ды лезэвстэ юткошкань ютавтомань тевть арасть. А эдь тосо эйкакштне пек творческойть. Ансяк те ёнксонть эйсэст эряви панжомс. Ды монь ульнесь умонь мелем ардтнемс школатнева мастер-класс марто. Покш сюкпря Ирина Николаевнанень, сон те меленть шнызе.
Гончарной мастерскойсэнть важодеманть туртов сёвоненть костояк ве ёндо а рамить. Сондензэ эсесткак сатышка.

– Минек эсенек Андрелесэ, Вармазейкасо сёвонень таркат улить. Тосонь сёвонесь ашо, вадря. Истя жо овсе аволь васоло эйстэнек Нижегородской областень Покш Болдинань райононь Покш Казариново велесь, косо гончарной ремеслась содавикс умонь шкатнестэ саезь. Неть таркатнестэ сёвоненть ускангак, – ёвтни Михаил Сонаев. – Эйкакштнень марто важодемась монь туртов покш тев. Эйзэнзэ путан весе оймем. Гончарокс может улемс куш кие, ансяк вана шкинемань ёнкс ули аволь эрьванть. Шкинемась жо те тевсэнть пек эрявикс.
Эряви тешкстамс, Михаил Сонаев эйкакштнень марто важоди малав весе эрямонзо перть. Цёрась чачсь ды весе пингензэ перть эри Покш Игнатовань райононь эрзянь Протасова велесэ. Школадо мейле прядызе Ицялонь педагогической училищань художественно-графической отделениянть. 1983 иестэ, армиясто велявтомадо мейле, кармась важодеме СПТУ-со военрукокс. Теде мейле сисем иеть роботась эсест райононь Александровка велень школасо, ветясь черчениянть, рисованиянть, трудонть. Истя жо, кода икелень военрук, эйкакштнень туртов ветясь стрелковой кружок. Седе тов Михаил Александрович зярсыя роботась тиринь велень клубсо культурань отделэнь прявтокс. Те творческой роботась ульнесь мелензэ коряс, пурнакшнось эсензэ ансамбляяк, конанть лемезэ «Эрзянь авинеть». Ансамблянть марто ульнесть эрьва кодат мероприятиясо, аволь весть – «Шумбрат, Мордовия!» фестивальсэнть.

– Зярдо роботынь эсенек велень клубсо, пек покш мелем ульнесь концертэв молемстэ саемс мартонок раськень промыслань выставка. Ансяк сестэ тень топавтомс эзь лисе, туинь роботамо Протасовань школав, – корты Михаил Сонаев. – Ирина Николаевна жо, мерят, марясь весе монь арсематнень ды ней эйкакштнень марто ков сыргатано, мартонок свал саян выставка. Кадык неень шкане велень школатнесэ тонавтницят аволь ламо, ансяк истят выставкатнень сынь пек учить. Истя, меельце роботан ульнесть Нижней Новгородсо, косо минек Культурань кудось ёвтазель изницякс шкинемань проектсэ.
Истя жо Михаил Сонаев ве шкасто роботась Покш Игнатовань Творчествань кудосо – ветясь чувто ланга керсемань кружок. Эйкакштне якильть тов покш мельсэ. Эсь тонавтыцяст марто сынь тейнильть кудоютконь тевтнесэ эрявикс кедьёнкст – ярсамопелень керсема лазт, модамарень томбамкат, мазылгавтомапельтнень кирдемань туртов паргинеть (шкатулкат).

– Группасонть эрильть кемгавтово эйкакшт. Домка важодема жо ветявиль эрьванть марто башка. Сынь пек покш мельсэ кундыльть кодамояк од тевс ды пек учильть, мезе жо лиси. Эсь теевкстнэсэ жо кенярдовтыльть аватнень, конатнень туртов эсь эйкакштнень кедьсэ теезь-керязь лазнэтне, паргинетне, модамарень томбамкатне ульнесть сехте питнейть, – тешксты Михаил Александрович. – Мон 30 иеть важодинь эйкакштнень марто чувто ланга керсеманть коряс. Педучилищасо тонавтнемстэ тонавтыцям ульнесь Пётр Григорьевич Куманёв – ине мастер. Сон ветясь «Художественная обработка материала» кружоконть. Ды самай сон ливтизеяк шкинемантень вечкеманть. Зярдо армиясто велявтынь, арсия варчамс гончарной ремесланть. Ансяк вана сестэ овсе стувтокшныя Пётр Григорьевичень кармавтоманзо, ушодомс свал эряви седе шождасто ды простойстэ. Мон сеске снартнинь теемс кринка. Вейке эзь лисе, омбоце. Кежень састь, кадынь снартнематнень. Ушодомаль жо кодамояк вешкемкасто, налкшкестэ. Тевесь улевель лия. Ней эйкакштнень марто важодемасонть те ашти аравтлувокс. Весе теориянь ёнкстнэнь тонавтнезь, минь ушодтано тонавтнеме оборудованиянть, ванномо материалонть. Ды ансяк теде мейле снартнетяно теемс васня вешкемка, мейле налкшке, пенч, ваканнэ, чакш. Аламонь-аламонь, весементь тонавтнезь.

Михаил Александрович вечксы эсь важодеманть, вечксы эйкакштнень марто котьмамонть ды вейсэнь шкинемасонть муи оймавтома.
Сон нейгак, ансяк уш эйкакштнень марто вейсэ, невти эсь ёрокчинзэ ды шкинеманзо кода Мордовиясо, истя лия регионтнэсэ ютавтовиця мероприятиятнесэ. Сынь свалшкань участникть «Тев», «Шумбрат, Мордовия!» фестивальтнень, Раськень Озкс, Велень Озкс, Сабантуй раськень кенярксчитнень ды ламо лия тевтнень.

– Монень мельспаро седе, мезе теян. Мельспаросот эйкакштнеяк, конатнень тонавтан эсь вечкевикс тевентень. Мон тонавтыця. Тонавтыцякс ульнесть покштям, авам, патям. Ды сынст тевенть, конантень путан седеем ды оймем, поладан монгак, – кемекстызе Михаил Сонаев.

ЮЛИЯ ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».