2026 иесь минек республикань ды Россиянь культурной эрямонь историяс ды ломантнень ледстнематнес сови кода масторлангонь келес содавикс ине скульпторонть Степан Эрьзянь чачома чистэнзэ саезь 150 иетнень келейстэ тешкстамонь. Те кенярксчинтень алтавить пек ламо мероприятият, конатнень программаст анокстызь С.Д. Эрьзя лемсэ Мордовиянь республиканской изобразительной искусствань ды МР-нь Культурань, раськень политикань ды архивень тевень министерствань важодицятне. Сынст кирдинзе Мордовия Республикань Прявтось А.А. Здунов.
Седе, кодат мелень витемань тевть анокставить ды ютавтовить Мордовиясо ды сонзэ томбале, минек ловныцятненень течи евтни С.Д. Эрьзя лемсэ МРМИИ-нь декоративно-прикладной искусствань отделэнь прявтось, МР-нь культурань заслуженной роботникесь Наталья Челмакина. Тешкстасынек, Наталья Николаевна музейсэ важоди 2002 иестэ саезь, 2014 иестэ сон кармась ДПИ-нь отделэнь прявтокс. Сон – С.Д. Эрьзя лемсэ музеень выставкатнень куратор, эрзянь-мокшонь раськень культурань сюпавчитнень ванстомань проекттнэнь анокстыця-ветиця. Течи Наталья Челмакина – минек редакциянь инже.
– Наталья Николаевна, те иесь лиятнень енов а молиця кода С.Д. Эрьзя лемсэ музеень важодицятнень, истя жо минек республикань ды весе масторлангонь эрицятнень туртов, кить вечксызь ды бажить домкасто тонавтнемс ды содамс ине скульпторонть шкинеманзо. Ледстинк, инескеть, историянть, кодамо шкасто минек музеесь кармась кандомо те ине ломаненть лемензэ?
– Виде, 2026 иесь кармавты эйсэнек варштамс удалов, ледстямс, кода ушодовсь минек музейсэнть важодемась ине скульпторонть валдо лемензэ а стувтомга, сонзэ произведениятнень весенень содавиксэкс теемга. Минек культурань учреждениясь ушодызе важодеманзо 1960 иестэ, колоньгемень вете иень ютазь республикасонок ульнесь исторической покш тев – музеентень максозель ине скульпторонть Степан Эрьзянь лемесь.
Тешкстаса, сеть иетнестэ ванстома таркатнесэ (хранилищатнесэ) ульнесть 18 000 единицат экспонатт, эйстэст 208 – «рузонь Роденэнть» важодевкстнэ. Текенень поладса, се шкась аволь шождатнестэль, вейксэньгеменце иетнестэ ломантненень, сынст ютксо музеень важодицятнеяк, ламо ковонь перть эзть пандо зарплатат, ялатеке, арасьчинть лангс апак вано, те паро тевесь топавтовсь. Кадык ламо ярсамопелесь максовсь талононь коряс, ломантне, кода одтнэ, истя сыретнеяк, сакшность музеев С.Д. Эрьзянь ине скульптуранзо марто содавиксэкс теевеме, выставкатнень ванномо. Те эдь ней, зярдо эрятано уличисэ, весементь тенек а шожда топавтомс, молемс тов, ков ули меленек.
– Степан Эрьзянь юбилеентень алтавить ламо кенярксов тевть, эрьвась юткстост а стувтовикс, инескеть, пачтядо сындест.
– Алкукскак, 2026 иесь сюпав ламо мелень витемань тевсэ, конат алтавить ине скульпторонтень. Весероссиянь юбилеень проектэнть коряс арсеви ютавтомс 45 выставкат, 54 интерактивной экскурсият, 42 тематической лекцият, 4 конференцият, 5 арт-фестивальть. Сынь ушодовсть ды поладовить кода Мордовиянь прявт ошсо – Саранскойсэ, республикань районтнэсэ, истя жо Московсо ды Санкт-Петербургсо.
– Наталья Николаевна, мартонь меельце чистэнть Санкт-Петербургсо панжовсь «Степан Эрьзя – скульптор мира. К 150-летию со дня рождения» покш выставкась, евтнеде те покш событиядонть.
– Россиянь раськетнень вейсэндявомань иестэнть, мартонь 31-це чистэ, Санкт-Петербургсо Рузонь музейсэнть васенцеде панжовсь Степан Эрьзянень алтазь лиятнень енов а молиця выставка. Сонзэ панжомань торжественной пелькссэнть Михайловской (Инженерной) замкасонть ульнесть Мордовия Республикань Прявтось Артем Здунов, Санкт-Петербургонь губернаторось Александр Беглов, Российской Федерациянь культурань министрань полавтыцясь Жанна Алексеева, Россиянь художествань академиянь президентэсь Василий Церетели, Рузонь музеень генеральной директорось Алла Манилова.
Выставканть панжомо сыцятненень поздоровт ды паронь арсемат кучсь Российской Федерациянь культурань министрась Ольга Любимова. Тов пурнавозтне тешкстызь, те кедьчелькев ломанентень, кинь важодевксэнзэ содавикст аволь ансяк Россиясо, истя жо Европасо ды Латинской Америкасо, истямо покш выставка эште эзь пурнавкшно. Кода мерсь Алла Манилова, сонзэ кондят скульптурат эште киненьгак эзть тееве.
Михайловской (Инженерной) замкасо невтевить Степан Эрьзянь малав 60 чуросто вастневиця васенце рядонь важодевкстэнзэ. Неть: аллегорической композицият, религиянь образт, истя жо содавикс ломантнень скульптурань портретэст.
Вейке залсонть невтеви «Эрьзя: новое измерение» мультимедийной проектэсь, конась эрямос совавтови Культурань инициативатнень Президентэнь фондонть лезксэнзэ вельде.
Тешкстаса, «Степан Эрьзя – скульптор мира» Весероссиянь таркасто таркас шаштневиця выставочной проектэсь ютавтови истямо лувсо: мартонь 25-це чистэ саезь июнень 7-це чинть самс ине скульпторонть 80 экспонаттнэстэ ведьгементне невтевить С.Д. Эрьзя лемсэ МРМИИ-сэ, колоньгементне – Рузонь государственной музейсэ.
Июлень 15-це чистэ саезь октябрянь 11-це чинть самс 83 экспонаттнэстэ 50-тне кармить улеме С.Д. Эрьзянь музейсэ, 30-тне – Рузонь государственной музейсэ, 3-тне Третьяковской галереясо. Седе тов весе 150 экспонаттнэ, ков совить минек музейсэ ды Рузонь государственной музейсэ ванстовиця коллекциятне, невтевить С.Д. Эрьзя лемсэ МРМИИ-сэ.
Теде башка, минек республикань театратнесэ кармить невтевеме «Эрьзя и время» балетэнь премьерась, «Эрьзя. Летящий к свету», «Семь с половиной женщин дона Стефана» ды лия спектаклятне, конат истя жо алтавить ине скульпторонть юбилеентень.
Россиянь Художникень союзонть ды Россиянь Художествань академиянть марто тевс нолдавить «Эрьзя в сердце России» Весероссиянь проекттнэ: Саранскойсэ – «Эрьзя и мы», «Скульптурный симпозиум», Московсо – «День региона».
Кемеви, весень мельс пек туи «Шумбрат, Эрьзя!» Регионъютконь национально-фольклорной кенярксчись, конась ютавтови августсто Степан Эрьзянь чачома велесэ – Баеньбуесэ. Тов пурнавить Российской Федерациянь регионтнэстэ чувтосто кедьчелькев керсицятне. Саранскойсэ юты «Мы вместе с Эрьзей» од ломанень раськень культурань Весероссиянь фестивалесь. Сон истя жо ули августсто. Концертэнь программасонть кармить Россиянь регионтнэстэ сыця од ломанень содавикс национальной коллективтне. Тоско жо, Мордовиянь прявт ошонь куншкакуросонть, кармить невтевеме ды микшневеме масторонь кедьчелькев ломантнень авторской сувениртнэ. Сынь весень туртов кадовить валдо ледстнемакс тедедень покш кенярксчиденть, конась алтави эрзянь ине церанть Степан Дмитриевич Эрьзянь чачома чистэнзэ 150 иетненень!
Валентина Юдина