Четверг, декабря 08, 2022
Важное

Аволь умок минек редакцияв сакшность покш инжеть Пензань областень Кузнецк ошонь Эрзянь-мокшонь раськень культурной автономиянь филиалсто. Неть эрзянь ёроков ломантне, тиринь раськенть, келенть ды койтнень-кирдатнень ванстомаст кисэ мелявтыцятне Екатерина Геннадьевна Белова, Тамара Андреевна ды Вадим Иванович Тултаевтне. 

Сынь ёвтнесть эсь филиалонть неень шкасто важодемадо ды сы шкантень арсематнеде-бажамотнеде.
Пензань областень Кузнецк ошонь Эрзянь-мокшонь раськень культурной автономиянь филиалось панжозель 2013 иестэ. Сонзэ прявтокс вейке мельсэ кочказель эрзянь ломанесь Николай Алексеевич Пинясов, кона важоди течинь чис.

– Минек филиалось ашти Кузнецк ошонь семиянек ловномань туртов библиотеканть юрсо. Ды ламо мероприятиятнень ютавтома таркакс аштияк библиотекась, – ёвтни Кузнецк ошонь Эрзянь-мокшонь раськень культурной автономиянь филиалонь членэсь, библиотекань прявтось Екатерина Белова. – Кода жо весемесь лиссь? А. Н. Радищев лемсэ ошонь библиотекась эсь шкасто ютавтокшнось «Мы вместе – мы едины» фестиваль. Ды библиотекань эрьва филиалонтень, кодамокс лововтано миньгак, максовсь кодамо-бути раськень культура. Миненек сатотсь эрзянь-мокшонь раськень культурась.
Библиотекасо важодеме мон ушодынь 2012 иестэ, 2013 иестэ теевинь содавиксэкс Пензань областень Эрзянь-мокшонь раськень культурной автономиянь сестэнь прявтонть Владимир Иванович Первушкин марто. Сон жо монь содавтымим Василий Яковлевич Прошкин ды Николай Алексеевич Пинясов марто, конатне ульнестькак Кузнецк ошсо Эрзянь-мокшонь раськень культурной автономиянь филиалонь пурныцякс-теицякс. Ды теньстэ весемесь ушодовсь – ладявсть кеме сюлмот ды вейсэнь важодема.

Кода тешксты Екатерина Белова, сон васень шкасто саезь уш ламо ардтнесь велетнева. Васняяк, штобу аламодо тонавтнемс эрзянь ды мокшонь кельтнень (тейтерь-авась сонсь рузава), штобу маштомс раськень кельтнесэ шумбракстнеме, сюкпрянь ды сюконямонь валонь ёвтамо. Мейле жо мероприятиятнесэ ды вастовоматнесэ эсь филиалонть невтемга.

– Важодеманть ушодынек эрязасто. Филиалонь прявтонть Николай Алексеевич Пинясов марто вейке-омбоце мельга анокстынек мероприятият, вастынек инжеть. Эсенекак кармасть тердтнеме эрьва кодамо фестивальтнес. Эрзянь ды мокшонь раськетнень культурань алкуксонь мазычинть инжетненень невтемга, эстенек раминек раськень оршамопельть. Вейкень раминек спонсортнэнь лезксэст вельде, омбоценть жо – грантонь ярмактнень лангс, конанть изнизе библиотекась. Те проектэнть лувсо рамазельть раськень ниле оршамот, теде башка, эрзяньгак.

Истя, аволь ансяк Кузнецк ошонь автономиянь члентнэ, эрицятнеяк аламонь-аламонь кармасть тонавтнеме эрзянь ды мокшонь культуранть, койтнень-кирдатнень, келенть. Тонавтнизь раськень кухнянтькак – библиотекасо ютавтовиця мероприятиятнесэ инжетнень кармасть каванямо раськень ярсамопельтнеде.

– Кавтошка иеде икеле жо важодемась седе келейгавтовсь. Эрзянь ды мокшонь культурадонть карминек ёвтнеме эйдень кужосо эйкакштненень. Овсе аволь умок, октябрясто, вастовкшнынек студенттнэнь марто, сыненсткак ёвтнинек эрзятнень ды мокшотнень сюпав культурадонть. Башка мель явовсь свадьбань ды эйкакшонь чачомань койтненень. Эряви меремс, од ломантне покш мельсэ кунсолость неть койтнеде, эдь неень шкане неть тевтнесэ весемесь пек полавтовсь, – корты Екатерина Белова. – Ламо важодтяно книгань фондонть ламолгавтомгаяк. Неень шкане минек ошонь весе библиотекатнесэ улить эрзянь ды мокшонь кельтнесэ книгат. Ды ней монськак, бути молян раськень кодамояк фестивальс эли кенярксчис, бажан мезеяк рамамс. Кувать вешнинек эрзянь-мокшонь ёвкст, штобу сынь улевельть рузонь кельс ютавтома марто. Ды вана аволь умок Сосновоборскойсэ ютавтовсь «Вастома» фестивалесь. Тосто неть ёвкстнэнь муиньгак.

Эряви меремс, ламосо лезды тенек Пензань областень Эрзянь-мокшонь раськень культурной автономиясь ды сонзэ прявтось Елена Григорьевна Первушкина. Минь яла пшкадтяно тензэ кодамояк тевень коряс, сон а отказакшны. Теке марто сонськак веши пельденек свалшкань важодема, штобу невтевлинек эсь прянок эрьва кодамо мероприятиясо, фестивальсэ, штобу ланганок содавольть седе ламо ломанть.

Ды кода тешкстыть автономиянь филиалонь эштё кавто члентнэ – Тамара Андреевна ды Вадим Иванович Тултаевтне, – важодеманть сынь ветить алкукс эрявикс.

– Минек пек вадря команданок. Ансяк берянь, зярс ютксонок малав овсе арасть од ломанть, – корты Тамара Тултаева. – Нама, бажатано эсь эйкакштнень, нуцькатнень те тевентень совавтомс. Ансяк те аламо. Эряви од ломантненень седе ламо ёвтнемс тиринь раськень культурадонть. Тень лангсо важодтяно. Истя, од ломантнень тердтяно минек мероприятиятнес. Зярыяксть уш ютавтнинек Эрзянь-мокшонь кельтнень весероссиянь чинть. Тедеде вейсэ лия регионтнэстэ эрзятнень ды мокшотнень марто сёрмадынек тиринь кельсэ диктант. Нама, сёрмадомасонть стакачить ульнесть, эдь минь школасо кельтнень эзинек тонавтне. Те ульнесь ушодкс. Арсеви, сы иестэ седе шождасто сёрмадомась тенек максови, анокстатано.
Аванть валонзо коряс, ней сынст школатнесэ тонавтневить эрзянь, мокшонь, чуважонь, татаронь ды лия раськетнень кельтне.

– Мон чачинь-касынь Ульяновской областень Николаевской райононь Губашево велесэ. Вадим Иванович марто минь вейке велень. Велесь эрзянь. Келенть весе вадрясто содасызь, кортыть. Эряви меремс, Николай Алексеевич Пинясов теке велень жо. Шабра Давыдовкасо ули средней школа ды тосо ветявить эрзянь келень ды литературань уроктне. Тонавтницятнеде аволь пек ламо, ансяк сень коряс, што тесэ национальной школа, сонзэ эзизь пекста ды кадызь среднеекс. Истя жо татаронь ды чуважонь раськень школатненьгак ванстызь. Минек тосонь велетнесэ кезэрень койтне-кирдатнеяк парсте ванстовсть. Весе парсте содыть, эрзятнень икеле эсест пазост ульнесть. Пертьпельксэнь эрьва кужинесь ульнесь тешксэв таркакс. Ды минек Губашево велесэ те шкас ули тумо, конанть кедьстэ эрицятне вешить пиземе. Тумось пек умонь, аволь вейке сядот иеть тензэ. Ве шкасто кармакшнось коськеме. Мейле апак учне, мерят, вельмесь, нолдась од тарадт ды пижелгадсь икелень коряс седеяк пек. Те тумонтень якить веленек – покшнек-вишкиненек, однэк-сыренек. Ды эйкакштне те коенть кирдить, ванстыть. Истя эряви минек кельтнень ды культуранть коряскак. Эряви кастомс-виевгавтомс, ванстомс, – кемекстызе Тамара Тултаева.

– Бути саемс минек Кузнецкой райононть, тесэ эрзянь ды мокшонь велеть малав овсе арасть, – корты автономиянь эштё вейке членэсь Вадим Тултаев. – Минек эрзятне ды мокшотне весе лия ёндо сазь. Саемс Ульяновской областень куш кодамо район, тосо эрзятнеде ламо, улить раськень ансамблят, морыцят-киштицят. Тесэ жо тень коряс покш стакачить. Ансяк пря а нолдатано, важодтяно. Зярдо пурнавтано кодамояк мероприятияс, моратано, стихтькак ловнотано. Лисни а беряньстэ. Сеедьстэ эсенек областень «Келу», «Лейне» ансамблянь артисттнэ сакшныть. Минек прявтонок Николай Пинясов – алкуксонь эрзя. Робота вети покш ды эрявикс. Эдь, бути а карматано содамо эсь ундокстнэнь, эсь келенть, культуранть, раськень койтнень-кирдатнень, минек а ули вандынь чинек ды, ловт, ломанеськак арась.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».