Пятница, марта 29, 2024
Важное

Маень 27-це чистэ тешкстави Библиотекарень чись



Течи библиотекась – те аволь ансяк книгат. Неень шкансесь аламонь-аламонь кармась теевеме виев информационной центракс. Кочкуровань библиотекась – те аволь ансяк весень туртов панжадо ды питневтеме кулянь саемань тарка, те эштё вастовомань ды кортнемань тарка, культурань центра.

Неень шкане Кочкурбуень библиотекань системантень совить 13 библиотекат: центральной районной библиотекась ды сонзэ 12 структурной подразделениянзо, Кочкуровань эйкакшонь библиотекась ды 11 велень библиотекат.

Библиотекатнень важодемасо кода икеле, истя нейгак кадови краеведениясь. Эдь эсь ундокстнэнь ды историянть стувтомсто а содави вандынь шкась, кодаяк а чарькодеви ды а путови питне течинь чинтень.
Краеведениянь важодемасонть покш мель явови минек ёнкссо чачозтненень ды касозтненень, поэттнэнь ды прозаиктнень эрямонь ды шкинемань кист тонавтнемантень.

Невтемакс, 2020 иестэ социальной сеттнесэ анокстазельть ды ютавтозельть мероприятият, конат алтавсть Ине Отечественной войнань участникентень, эрзянь писателентень И.С. Брыжинскойнень 100 иетнень топодемантень. Истя жо сонензэ алтавсь «Тевензэ поладыть эйкакшонзо, нуцьканзо...» раськеютконь литературной видеоконференциясь.

Покш мель явовсь РСФСР-нь культурань заслуженной роботникентень, педагогонтень, чувтосто керсиця кедьчелькев ломанентень Николай Иванович Мастиннэнь. Сонзэ 70 иень юбилеентень алтавсь Раськень койтнень-кирдатнень ды национальной культурань центрасо невтевиця «Н.И. Мастин – пек паро артыця ды тонавтыця» книгань выставкась.
Келейстэ тешкставсь эрзя-мокшонь раськень сказительницанть Фёкла Игнатьевна Беззубовань чачома чистэнзэ саезь 140 иетнень топодемась. Сонензэ алтавсть истят мероприятиятне, кода «Сказительница родного края» книгань выставкась, эрзянь кельсэ «Адядо, браттнэ, минек масторов!» произведениянть ловномась ды ламо лият.

Райононь библиотекатне свал невтить ёрокчист Весероссиянь эрзя-мокшонь кельтненень алтазь кенярксчисэнть. Те чинтень анокставить книгань выставкат, ютавтовить панжадо урокт, кулянь част, фольклорной аштемат.
Библиотекатне ютавтыть мероприятият, косо васень таркасо ашти эрзя-мокшонь раськень культурань ванстомась, сынст седе парсте содамось ды тонавтнемась. Васень таркас аравтови краеведениянь проекттнэнь анокстамось ды сынст тевс нолдамось.

Исторической ледстнемань пингетнень ванстомга Кочкуровань райононь библиотекатнень юрсо теезельть башка таркат ды кудоютконь вишка музейть. Сынь – минек покштятнень-бабатнень ледстнемат, конат невтевить икелень ули-паротнень вельде, ды сынь лездыть аволь ансяк эйкакштненень, истя жо покштнененьгак кандовомс фотографиятнень вельде икелень шкантень. Келейстэ невтевить войнань участниктне, сюронь кастыцятне, ракшань трицятне. Весе сынь – веленть историязо. Тесэ ванстови сехте питнеесь, велесэ эрицятнень боевой ды трудонь подвигень свидетельстватне: тюремань паксятнестэ муезь кедьёнкстнэ, сёрматне, документтнэ.

Минек мини-музейтнес, краеведениянь таркатнес свал сакшныть ломанть, сынст туртов ютавтовить экскурсият. Тосо панжозь истят клубт: «Ассорти» (тейтерь-аватненень), «Вастовома» (сыре ломантненень), «Олимп» (музыкань ды поэзиянь вечкицятненень), «Хозяюшка» (пидицятненень-паницятненень ды кодамонь тевентень тонавтницятненень). Те иестэ ушодызе важодеманзо «Азорава» клубось, тесэ ванстовить раськень койтне-кирдатне ды тиринь ёнксонь культурась, тесэ кортнить од книгатнеде, журналтнэде…

Башка таркасо аштить эйкакшонь вейсэндявкстнэ, юткошкасто сынь невтить эсь ёрокчист социальной ды культурань тевтнесэ, кастыть содамочист. Сынь седейшкава сакшныть истят клубтнес, кода: «Читайка», «Затейники», «Друзья библиотеки», «Почемучки». Ламо тематнень лангс апак вано, неть клубтнень задачаст вейке: тонавтомс эйкакштнень ловномо, виевгавтомо сынст нравственно-эстетической ды интеллектуальной лувост.

Сась кизэсь, эйкакштнень ушодови оймсема шкаст. Библиотекатнесэ сынст туртов анокстазь кизэнь ловномань программа ды проектт: «Читальный зал под открытым небом», «Читать больше, читать лучше, читать всегда», «Тропинки книжного лета», «Читаем сами без подсказки, читаем мы родные сказки», «Библиотека под зонтиком». Те ушодкс малавгавтомс ловныцянть библиотекантень.

Оймсема таркатнесэ ловныцятненень анокставить книгань выставкат. Ломантне теевить содавиксэкс ходожественной литературанть марто, конась пек лади ловномс кизэнь оймсема шкастонть. Кизэнь залонь ловныцякс тееви эрьва ютыцясь, свалшкань ловныцятне жо теить заказ пачтямс тенст литературанть оймсема таркас.

2020 иестэ пандемиянь шкасто библиотекатнень важодемаст эзь лоткавтово, тевест ветясть дистанционной лувсо. Те миненек макссь питней урок, ламо ломань марто ютавтовиця мероприятиятне кадовсть исень чис, тарказост састь истят проектт, конат вешить седеяк ламо ёрокчи ды вийть. Пандемиянть шкасто Кочкуровань библиотекась анокстась «Подвигу нет забвения» проект. Тов совавтовсть публикацият Советской Союзонь Геройтнеде ды Славань орденэнь кавалертнэде, Кочкуровань районсо чачозтнеде-касозтнеде. Сынь кармасть улеме библиотекань соцсетень страницатнесэ.

2015 иестэ саезь Кочкуровань библиотекась ушодсь важодеме «Православный очаг» проектэнть коряс. Те проектэнть эрямос совавтомга вейсэ Рождества Христова церькованть марто эрьва иестэ ютавтовить ламо мероприятият, конат алтавить православной книгантень.

Кочкуровань библиотекась эрьва иестэ невти ёрокчинзэ Весероссиянь социально-культурной «Библионочь» ловноматнесэ. Те иестэ акциясь ютась «Книга – путь к звёздам» лем ало.
Волонтёрствань ды паро тевень теематненень Кочкуровань райононь библиотекатне явить покш мель. Сынь путыть вий ды содамочить весе общественно эрявикс мероприятиятнесэ: Ине Отечественной войнасо маштовозтненень кеврунготнень перька тарканть ванськавтомань субботниктнесэ, «Дорогу к обелиску», «Чистый памятник», «Георгиевская ленточка», «Снежный десант» акциятнесэ. Пандемиянть шкасто вейсэндявсть «Соблюдаем перчаточно-масочный режим» акциянтень.
2021 иень чадыковсто саезь Кочкуровань центральной библиотекась ушодсь «Библиотека от души – для души» сыре ломантнень туртов проектэнть топавтомо. Те тевесь тееви вейсэ Кочкуровань районсо «Социальная защита населения» ГКУ-нть юрсо теезь чинь перть улемань отделениясо. Те проектэнть прявт тевесь – сыре ломантнень содамочист келейгавтомась, масторлангонь кулятнеде содамось, Россиянь раськетнень культураст тонавтнемась, литературанть ловномась ды истя седе тов.

Седе ламо од ловныцятнень пурнамонтень лездыть социальной сеттне. Неень шкане библиотекатне эрязасто тевс нолдыть Интернет сообществатнень, социальной сеттнень, косо невтеви библиотекатнень весе важодемаст. Минек библиотекатнень улить эсест страницаст «Одноклассники», «ВКонтакте», Facebook соцсеттнесэ. Центральной библиотеканть ули эсензэ сайтэзэ. Районсонть кото библиотекат сюлмавить Интернет сетенть марто.

Эрьва иестэ Кочкуровань райононь библиотекатне невтить ёрокчист «Культурань муниципальной сехте паро учреждения» пелькстамосонть. 2020 иестэ истямо пелькстамосонть лиссь изницякс Булгакова велень библиотекась, 2019 иестэ – Ташто Мурзань библиотекась.
Пелькстамотне эрязасто совить библиотеканок важодемас. Сынст вельде невтеви таштазь опытэсь, лиятнень ёнов а молиця ёрокчитне. Минь ютавттано пелькстамот писательтнень чачома читненень, юбилейтненень, ледстневиця дататненень. Эрьва иестэ ютавтови профессиянь коряс «Библиотека года» пелькстамось.

2020 иестэ Мордовия Республикань А.С. Пушкин лемсэ Национальной библиотекась васенцеде ютавтсь республикань «Библиотечная аналитика – 2020» пелькстамо, косо минек важодицятне невтсть содамочист аналитикань документтнэнь анокстамонть коряс, неень шкань вешематнень ды профессиянь стандарттнэнь мельс саезь. Конкурссонть ёрокчист невтизь Мордовия Республикань муниципальной вейсэндявксонь 23 библиотекат. Те пелькстамосонть саинек омбоце тарканть. Теньсэ покш путовксозо ояксчисэ эриця, ёроков коллективенек.
Течи велень библиотекась – те кудо, косо свал тонь учить ды эрьва ловныцясь муи эстензэ вечкевикс книга.

Елена ВОЙНОВА,
Кочкуровань райононь центральной
библиотекань прявт.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».