Неть читнестэ Пушкинкасо ёвтавсть «2018/2019 иетнень сехте вадря книга» республиканской пелькстамонь изницятне.
Конкурсось ушодовсь тедедень даволковонь 1-це чистэ. Сон ютавтовсь васенцеде, пурныцянзо-арсицянзо – А.С.Пушкин лемсэ раськень библиотекась МР-нь Культурань, раськень политикань ды архивень тевень министерстванть лезксэнзэ вельде.
МР-нь Книжной палатасо важодицятне пелькстамонтень кочкасть малав 100 книгат кеветее номинациянь коряс ды невтизь сынст экспертэнь советэнтень. Вадря книгатнень кочкамось ветявсь кавто этапсо: экспертэнь комиссиясь, козо совасть наукань, культурань, СМИ-нь важодицятне ды общественной деятельтне, явсь пелькстамонь 67 финалистт. Сынст важодематнестэ пурназель книгань невтемась. Сонзэ ванномсто инжетне сёрмадсть анкета, конасонть тешкстасть мельстуиця изданиянть. Теде башка, библиотекань официальной сайтсэнть ды социальной сетень куротнесэ ютась онлайн-форматсо вайгелень максома, конань вельде кемекстызь изницятнень.
Таштамковонь 24-це чистэ ютавтовсь изницятнень каземась. Торжественной промксонть панжизе МР-нь Культурань, раськень политикань ды архивень тевень министрась Светлана Баулина. Сон казизе конкурсонь Гран-принть Мордовия Республикань культурань заслуженной роботникентень Людмила Сандинанень «Трибунал и Золотая звезда Вандышева» книганть кисэ.
«Лучшее литературно-художественное издание. Проза на русском языке» номинациясонть изнясь М.И. Брыжинскоень «Круиз» книгась. Теке жо номинациясонть изнясь М.Л. Сайгинэнь мокшонь кельсэ «Кочкаф произведеният» пусмось, эрзянь кельсэ – П.А. Ключагинэнь «Кочказь произведеният».
«Лучшее художественное произведение. Поэзия» номинациясонть рузонь кельсэ изнясь С.Г. Белоключевскоень «Смейся, пока разрешают!!!» книгась, мокшонь кельсэ – И.Н. Кудашкинэнь «Шнате крайнязе», эрзянь – «Книга» издательской кудонь «Тядянь-авань вал» вейспурнавксось.
«Лучшая книга для детей» номинациясонть изницякс ёвтазь «Подвиги» проектэнь «Волшебные сказки о детях-героях», Н.Б. Голенковонь «Пеетьфти ёфкст» (мокшокс), Т.В. Разгуляевань «Эрясь-аштесь ёвкске…» (эрзякс) книгатне.
Истя жо ёвтавсть краеведениянь, тиринь ёнксонь историянь ды культурань, гуманитарной профилень номинациясо сехте вадря книгатне. А вана «Лучшее военно-патриотическое издание» номинациясонть сехте вадрякс кармасть «Книга Памяти и Славы» ламо томсо изданиянь нилеце ды ветеце книгатне, конань автортнэ-пурныцятне Н.А. Кручинкин, Е.Н. Фирсова, Т.М. Костригина.
Юлия Еремина