Рузонь драмань государственной театрасо кундасть покш тевс. Тесэ кармить путомо театроведэнть, драматургонть, педагогонть Василий Брыжинскиень «Каргонь кинь ломанть» саганзо коряс спектаклянть. Те произведениясь лиссь колмо покш томсо. Эйсэнзэ невтеви эрзятнень эрямост 1777 иестэ саезь.

Эряви меремс, сонзэ коряс спектакля 2012 иестэ уш путокшность Оренбургонь областень Бугурусланонь Н. В. Гоголь лемсэ театрасо. Меельце иетнестэ сагась лиссь рузонь кельс ютавтозь. Лангсонзо важодсь писателесь ды журналистэсь Тамара Баргова. Те пек паро, сонзэ марто содавтовить седеяк ламо ломанть.
Неть читнестэ минь вастневинек Рузонь драмань театрань актёронть, МР-нь народной артистэнть Николай Большаков марто. Самай сон важоди спектаклянть лангсо кода режиссёр.

– Николай Павлович, кода сась мелесь путомс те спектаклянть?

– Васняяк ёвтаса, минь Василий Сергеевич Брыжинский марто умок содавикст. Вейсэ важодинек, зярдо сон ульнесь Н. П. Огарёв лемсэ МГУ-нь национальной культурань факультетэнь деканокс, панжокшнось актёронь отделения, мон тосо ветилинь сценической движения. Кода-бути весть вастовомсто кортазевинек ды сон ёвтнесь те сагадонть. Монь чачсь мелем варштамс, мезе тосо. Сеске тензэ меринь, туи мелезэнь – путса сцена лангсо. Эдь эрьва тевсэнть эряви муемс сень, мезесь тонь токасы ойменть. Ловныя ды видькстан: кой-кона таркатне пек токимизь. Тосо ули седейлембе, ломаньксчи ды покш вечкема – эрямонть, эсь раськенть, тиринь масторонть, койтнень-кирдатнень, цёранть ды аванть ютксо. Ды те вечкемась изни весементь, ашти васенце таркасо.

Театрань прявтокс се шкане важодсь А. Н. Ермолин, сон парсте вастызе меленть путомс спектаклянть. Произведениясонть пек вадря литературной келесь, сон чудезь чуди. Ловномстояк маряви, зяро эйсэнзэ лембе, парочи. Кецявтымим сеяк: арасть кежть, лиятнеде берянь арсемат. Чарькодеви, текстэсь пек покш, сонзэ эрявсь киртямс. Киртямодо мейле таго невтия авторонтень, сон дивазевсь: «Те алкукс мон сёрмадыя?». Мерсь тагояк киртямс кувака таркатнень.
Путовксонть лангсо важодемась умок ушодовсь ды моли иень перть. материалонть марто содавтовсть весе налксицятне. Анок сценографической концепциясь. Художникесь ёвтась лия ёнов а молиця тев. Эряви теемс мельстуицякс, чарькодевицякс, тосо невтемань таркатне сеедьстэ полавтневить. Актёртнэнень меринь, эряви вечкемс тевенть, конаньс кундынек, сестэ весе юты шождасто.

– «Каргонь кинь ломанть» сагась ашти колмо книгасто, кодамо шканть саинк невтемс?

– Кочкинек васенценть, те – XVIII пингесь, 1777-це иестэ саезь ды седе тов. Невтеви Емельян Пугачёвонь восстаниядонзо мейле шкась. Ламо сатотсь эрзятненень, ломантнень лангс каявкшность, кить сыргакшность Пугачёвонь марто. Тиринь масторсо эйсэст нарьгасть ды чавность. Прявт героесь велявты кудов, сайсы-пурнасы семиянзо, кить кадовсть эриекс, мартонзо моли ялгазояк ды туить вирев. Сынь вешнить тарка, косто кияк аволизь муе. Чаво таркасо, кедьсэ узере марто ушодыть од эрямо. Васня эрить шалашсо, мейле – землянкасо, седе тов стявтыть зимник. Мейле Пазось максы тенст ракшат. Лия велетнес яказь, сынст карми улеме сюрост. Сынь пек бажить стявтомс од кудо, вельмевтемс толонть ды раштамс-кастомс буест-раськест. Эрямонь килангсо вастовить паро ломанть, конат лездыть печтямс мелявкстнэнь ды стакачитнень.

– Кить налксить спектаклясонть? Кить явить мель путомантень?

–Путовкссонть налксить МР-нь народной артистэсь Алексей Тимин, МР-нь заслуженной артисттнэ Денис Кручинкин (прявт героенть Нечаень), Оксана Сизова (нинзэ Нуянзань), Геннадий Арекаев, истя жо Александра Надорова, Денис Михеев, Ирина Крупякова, Михаил Зверев, Мария Феоктистова, Нина Арекаева.
Путовксонть лангсо, актёртнэде башка, важоди покш команда, конась а пели стакачитнеде. Неть: художникесь-путыцясь Владимир Батайкин, хореографось-путыцясь МР-нь культурань заслуженной роботникесь Мария Костерина, костюмтнень коряс художникесь Ольга Зевайкина, музыканть коряс – МР-нь культурань заслуженной роботникесь Сергей Каштанов.

– Спектаклясь карми рузонь кельсэ. А вана оршамопельтне?
– Произведениясонть геройтне эрзянь раськень. Нама, оршамопельтне-викшневкстнэ кармить эрзянь. Кувать арсинек карсемапельтнень лангсо. Геройтнень пильгесэ карть ды лия мезе.

– Тынь кортыде, путомань коряс карми лия ёнов а молиця тевтеема. Мезе те ули?
– Арась мелем ёвтнемс весе салавачитнеде. Кадык ваныцясь сы ды дивазеви. Ансяк пачтян, тевс нолдатано мультимедийной ёнкст, карми важодеме экран. Минь вейсэндясынек алкуксонь геройтнень артозь персонажтнень марто. Аволь ансяк картинкат невтевить, карми арт-видео. Меленек-арсеманок ламо, теньсэ тенек лезды важодицянок Ильдар Неваев. Театрасонок мезеяк истямо арасель, те карми экспериментэкс. Ансяк ялатеке – сцена лангсо актёртнэнь налксемась – прявт тев, весе лиясь лезды паролгавтомс-мазылгавтомс путовксонть. Театрасо важодиця весе од ломантнеяк налксить спектаклясонть, сынь невтить валдо ды чопода вийтнень, вирень а неявиця эрицятнень. Сцена лангсо несынек Юртавань, Кудатянь образтнэнь.
Весе те важодемасонть бажатано невтемс вечкеманть, конась весементь изни. Спектаклясь невтеви тунда, мартонть прядовомсто.

«Каргонь кинь ломанть» драма тической сагань книгасонть Кочку ровтнень родонть вельде невте вить эрзянь раськенть сехте вадря ёнксонзо – стакачинь изнямосо виезэ-кемечизэ, лия раськетнень, васняяк, рузтнэнь марто ояксчисэ эрямозо. Сынст марто вейсэ эрзят не печтизь весе сеть стака китнень, конат ветизь Россиянть течинь уцясказонзо. Сагасонть домка сто панжови истямо темась, кода семиянтень кеме вечкемась, ояк счинтень, ине тевентень кемемась, сенень, мезентень Кочкуровтне ал тызь ламо пингень эрямост.

Татьяна Маторкина