Пятница, марта 29, 2024
Важное

Неть читнестэ минек республикав сакшнось лия ёнов а молиця таркасто таркас ардтниця музей – «Изнямонь поезд». Те – масторлангсо васенце иммерсивной инсталляция, кона ладязь ардтниця поездсэ.

Проектэнть лангсо важодемстэ башка мель явовсь архивень фото-видеодокументтнэнь марто важодемантень, консультантокс ульнесть историктне ды Ине Отечественной войнань ветерантнэ.

Течинь чине масторлангонь вейкеяк музейсэ арасть зняро скульптурань композицият, кода «Изнямонь поездсэнть». Тесэ теезь ломанень сэрьсэ 150 ламо рунгот, 4000 ламо се шкань кедьёнкст, ладязь 50 видеопроекторт, 18 видеостенат, 12 тач-стольть, конат валдонть ды гайттнень вельде невтить коштсо тюрематнень ды танконь атакатнень, солдаттнэнь эрямонть ды войнадо икелень сэтьме шканть. Те весемесь экспозициянть теи марявиксэкс, ёжомарямотнень – седе пштикс.

Тешкстасынек, «Изнямонь поездэсь» – те историянь-содавтомань проект, кона теезель Ине Отечественной войнасо Изнямонь 75 иетненень. Проектэнь арсицятне-анокстыцятне: Россиянь Наукань ды высшей образованиянь министерствась ды «Россиянь чугункань китне» ПАО-сь. Кода ёвтнесь «Красный квадрат» медиагруппань «Изнямонь поезд» группань администраторось Сергей Лукша, поездэсь эсь кинзэ ушодызе 2020 иень октябрясто Московонь Киевской вокзалсто. Саранскоесь кармась 91 ошокс, козо сон пачкодсь.

– Минь ютынек весе масторонть – Крымстэ саезь Владивостоконть видьс, – тешксты Сергей Лукша. – Чарькодеви, аволь весе савить покш ошов, штобу молемс музеев, секскак музеесь сонсь арды тыненк. Минек музеесь – масторлангсо васенце иммерсивной музей. Составонть юрсо 12 вагонт, конатнень эйстэ 9 – экспозиционнойть, 3 – техническойть. Эрьва вагонсонть ёвтневи чугункань кинь историясь, мезе ульнесь Ине Отечественной войнанть шкасто. Поездэнтень совамсто минь понгтано васенце вагонс – те плацкарт, 1941 иень сэтьме шкась, мезеяк а корты се кажодонть, конась уш маласо. Ды седе тов, лия вагонтнэс ютамсто, чарькодеви, войнась ушодовсь, молить стака тюремат ды сэтьме эрямонтень тарка уш арась. Весемесь прядови 9-це вагонсонть – Изнямо, кудов велявтома.
Саранскойсэ экспозициянть ваннызе Мордовия Республикань Прявтось Артём Здунов. Мордовиянь Прявтось вейсэндявсь школасо тонавтницятнень-юнармеецтнэнь туртов экскурсиянтень ды ваннызе экспозициянть.

– Музеесь – историяс целанек кандовома, – экспозициянть ванномадо мейле мерсь Артём Здунов. – Тесэ пек ламо историянь материалт, се шкань ули-парот, кедьёнкст, конатнень покш мель ванномс ды токшемс. Пек вадря проектэсь, конась лади патриотизмань лувонтень, а максы стувтомс войнань зыянтнэнь. Экспозициясь карми пек мельстуиця од ломантнень туртов, выставканть мереви ванномс группасо эли тетятнень-аватнень марто вейсэ.

Неть читнень перть экспозициянть ваннызь пек ламо ломанть. Сынст ютксо Саранск ошонь эрицясь, трудонь ветеранось Лидия Яковлевна Скворцова. Маень 6-це чистэ Лидия Яковлевна тешксты 90 иень юбилеензэ, сон – войнань эйкакш. Зярдо ушодовсь Ине Отечественной войнась, сонензэ ансяк топодекшнесть вейксэ иеть. Секскак Лидия Яковлевна, кода марясь, минек ошов сась истямо поезд, сась музеенть ванномо ды экспозициянть ламолгавтомга кандынзе эсь медалензэ.

– Мон чачинь-касынь Лямбирень райононь Александровка велесэ. Зярдо ушодовсь войнась, монень ансяк топодсть вейксэ иеть. Войнань иетне пек стакальть, вачочинть савсь кирдемс весенень. Цёратне фронтсольть, весементь тейсть аваломантне. Секскак авам ламо важодсь паксясо ды фермасо, а мон кудосо азоравакс ульнинь. Кедь лангсон эштё кавто сазоркаень. Сынст эрявсь мездеяк андомс. Нейгак превсэнь истямо тев. Веленть маласо паксянть видизь кснавсо, мон тов ветинь сазоркан, ды сынь кочксесть кснавнетнень, куш аламодо пештямс вачо пекенть. Ды ней, зярдо ютынь поездэнь вагонтнэва, мерят, се шкатнес понгинь, весе апаркстоминь – мон эсь сельмсэ неия войнанть чачонзо, – сельведень пачк корты Лидия Яковлевна.
Эряви меремс, Лидия Скворцовань эрямозо кеместэ сюлмавозь чугункань кинть марто, мирдезэ весе эрямонзо алтызе Саранск ошонь чугункань кинь вокзалсо важодемантень – ульнесь составонь пурныцякс.


«Изнямонь поезд» проекттэнть

Войнадо икелень иетне – Ине Отечественноесь – Изнямось. Историянь те маршрутканть музеень ваныцятнень вети Лидия тейтересь. Лидия – аволь ансяк аудиогид, те – советской од тейтерька. Сонзэ уцясказо – масторонь уцяска. Лидия ёвтни эсь ледстнематнень, семиянь историянть, стакачинь печтямонь ды Изнямонь опыттэнть. 1941 иестэ сонензэ ульнесть 19 иеть, сон тусь тетянзо киява ды кармась паровозонь машинистэкс. Вейсэ Лидия марто, сонзэ кондятнэнь – минек покштятнень-бабатнень марто – минь ютасынек кинть Гомельстэ саезь Московонть видьс, Сталинградсто саезь Берлинс. Несынек войнань сеть стака ды героической шкатнень неицятнень сельмсэ.

Экспозициясь келейстэ ёвтни Ине Отечественной войнасо советской народонть а кулыця подвигтенть. Сонзэ прявтсо – войнань шкатнес целанек кандовомась. Поездэнтень совамсто (экспозициянть ушодовомсто) сыцясь «ютасы» войнань кувака кинть, конась, автортнэнь арсемаст коряс, ушодови 1941 иень лембе тундостонть ды прядови 1945 иень Изнямонь майсэнть.
Совамо вагонось ашти ушодксокс. Тесэ весенень максови аудиогид, пачтяви вагонтнэнь ламочиденть ды сынст тематикадонть, видеороликтнестэ можна ваномс проектэнь теемадонть ды автортнэде.

Седе тов ардыцясь понги войнадо икелень шкатнес, косо вальманть тона пеле – сэтьме эрямо. Те пассажирэнь вагон, конасонть ардыть эрьва кодат ломанть: инженерт, пионерт, лётчикть... Эрьвась эйстэст, паряк, кармаволь минек масторонь нежекс, теевель путовкс сонзэ вандынь чинтень. Ансяк те весемесь эзь топавтово. Зярыя шкань ютазь ушодови войнась.

Седе тов вагонось – сэтьмечистэ войнас эряза ютамось. Тесэ пек парсте неяви, кода полавтови эрямось. Ансяк ульнить 1941 иень июнень 22-це чинь сэтьме валскестэ эрямо комнатасо ды вана уш вальманть тона ёно неявить немецень бомбардировщиктне. Минутань ютазь музеень ваныцятне понгить ДОТ-с, ды истя жо Брестской крепостенть малас – Ине Отечественной войнань васенце минутатнестэ саезь советской ломаненть кемечинь тешксэнтень.
Лия вагонсонть несыть овсе од цёрынетнень, конат ардыть фронтов. Чамасост ашти а содамонь пелема, кедьсэст – куломань медальонт. Вагононь омбоце пелькссэнть понгат алкуксонь окопс, ды тонсь марясак, мезе истямось улемс леднематнень ало.
Седе тов ютыця вагонсонть аудиогидэнь ёвтнематнень пачк понгат концлагерьс. Проектэнь автортнэ тешкстыть, келя, ёжомарямотнень коряс тесэ маршрутонь сехте стака тарка. Полонс понгозтнень образост тесэ лиссть пек виевть.

Мейле юты санитарной вагонось. Ды тесэяк тюремань пакся, ансяк тюремась ветяви войнасо колазь солдаттнэнь эрямост кисэ. Те вагононть прявт аравтлувозо – ледстямс фронтсо ды тылсэ медиктнень тевдест ды подвигтест. Тесэ жо кармат содамо советской народонь научной арсевкстнэде, конат лездасть ятонть изнямосо.
Ули составсонть баня-прачка марто вагон. Тесэ ардыцятне васенцеде вастовить ятонь солдаттнэнь марто: тей ветизь полонс понгозь немецтнень, сынст ютксо – 6-це армиянь генералось-фельдмаршалось Фридрих Паулюс, кона полонс саезель Сталинград ало.
Мейле экскурсиянь инжетне понгить поездэнь составонь теплушкас, конась моли Ленинградов Поляны – Шлиссельбург чугункань кинь веткаванть («Изнямонь ки», сон жо «Куломань коридор»). Вагононь вейке пелькссэнть – ардыцят, омбоцесэнть ускови сталмо.
Эштё вейке тамбуронть ютазь, понгат Константин Рокоссовскоень штабс. Тесэ ашти содавикс столеськак, конань велькссэ полководецэсь кортась «Багратион» операциядонть.

Меельце вагонось алтави Изнямонтень ды советской солдаттнэнь велявтомантень. Ды тесэ, проектэнь автортнэнь арсемаст коряс, ваныцятне марясызь, кодамо питне минек народось макссь Изнямонть кисэ. Тесэ эрямось ды куломась молить кедте кедьс кундазь, сон невтезь фотографиятнесэ, конатнень теить уцяскав солдаттнэ вейке купесэнть, чавовозтнень лемс поминкатнесэ – лиясонть.

«Изнямонь поезд» экспозициянь весе эпизодтнэ сюлмавозь аванть-железнодорожникенть пельде вейкине ёвтнемасо. Экспозициясо прявт героинянть лемезэ – Лидия, сонзэ прототипекс кармась Елена Чухнюк – паровозонь колоннань машинистэсь, кона Ине Отечественной войнань шкасто фронтов пачтясь оружия ды боеприпас марто воинской поездтнэнь.

Юлия ЕРЕМИНА
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».