МР-нь Някань государственной театрасо меельце читнестэ моли пси важодема. Тесэ анокстыть путомо О.Мартовань «Сказание о крыльях» од спектаклянть. Те – Р. Рождественскиень «210 шагов» поэмасто Сёлмотнеде исторической отступлениянь мотивтнень коряс. Режиссёрось-путыцясь – РФ-нь заслуженной артистэсь, содавикс актёрось Эвклид Кюрдзидис. Мекс кочкизе те произведениянть ды сась путомо Мордовияв? Теде ёвтнесь «Эрзянь правда» газетантень.
– Весть гайневтсь тень Саранскойстэ вейке ломань, сон яволявтызе прянзо Някань государственной театрань прявтокс. Те ульнесь Е. Я. Романовский. Минь мартонзо теевинек содавиксэкс зырыя иеде икеле, кода панжинек тынк ошсо Ж. Депардьень лемсэ культурань центранть. Сон тердимим путомс Някань театрасо эйкакштненень ёвкс. Те кулясь дивавтымим ды кецявтымим. Нама, мельсэнь ульнесь варчамс виень режиссурасо, киносо эли театрасо. Ансяк эзинь арсеяк, тердемась ули аволь Московсто. Мон ёвтыя мелем путомс «Сказание о крыльях» вечкевикс произведениям, конань ловнан сцена лангсо ламо ваныцятнень икеле. Те режиссёронь васенце тевем. Нама, пек талнан ды мелявтан. Валске марто сан репетицияв ризнэзь, чокшне жо туян сизезь ды мельспаросо. Весе вейсэ важодтяно путовксонть лангсо. Театрань труппась кармась васенце лездыцякс. Сехте стакась – някатнень, декорациятнень, валдонть, гайтенть вельде теемс те эли тона сценанть. Сюкпря ёвтавлинь художникентень-путыцянтень Наталья Кочневанень. Васенце эскизтнэнь неезь, чарькодинь, весе минек лиси. Сцена лангсо кармить някат ды живой план, – ёвтнесь Эвклид Кюрдзидис режиссёрось.
Спектаклянть мереви ваномс эйкакштненень ды весе семиянек. Путовксось – ломанень мельде-бажамодо. Эрьвантень эряви топавтомс эсь мелензэ. Варчамс топавтомс. Паряк, лиси!
– Арсетяно теемс истямо путовкс, конань ваномадо мейле аволь ансяк эйдетне, тетяст-авасткак кармить бажамо топавтомс мелест. Зярс эрятано, эряви кенеремс тень теемс. Эйкакштне чарькодьсызь эсест ладсо, покштне неить эсест история, – тешкстась режиссёрось.
Эвклид Кюрдзидис чачсь Грузиясо. 1987 иестэ прядызе Днепропетровской театральной училищанть. Важодсь Луцкоень ды Пятигорскоень драмтеатратнесэ. Служась армиясо Капустин Яр космодромонь ракетной войскатнесэ. 1997 иестэ прядызе ВГИК-нь актёронь отделениянть (А. В. Ромашинэнь мастерскоензэ). Налксесь малав 80 фильмасо, улить ролензэ театрасо. Концерттнэсэ невтни поэтической программат. Ессентуки ошсо панжсь эйкакшонь кинотеатральной школа, косо тонавтнить 5–17 иесэ эйкакшт. Истя жо ВГИК-нь филиалонь актёронь факультетсэ пурнась мастерской, косо тонавты студентт.
– Кода тынь эрьва ков кенертядо?
– Кенери се, кона ламо теи! Неть валтнэнь марто молян эрямованть ды тень содасызь весе малавиксэнь, – мерсь Эвклид.
Спектаклянь премьерась карми неть оймсема читнестэ, ноябрянь 9-10-це читнестэ. Садо, карми пек мельстуицякс!
Татьяна Маторкина