Дмитрий Тимофеевич Надькин чачсь 1934 иень маень 28-це чистэ Нижегородской областень Лукояновабуень Иваньбиё велесэ. Тетязо чавовсь войнасо, авазо ськамонзо кепединзе эйкакшонзо.
Тонавтнесь Лукояновань педучилищасо (1952), Горькоень госуниверситетсэ (1957), МНИИЯЛИЭ-нь аспирантурасо (1967). Тонавтсь рузонь кель ды литература Дагестанонь ды Нижегородской областень школатнесэ. 1972–1992-це иетнестэ важодсь М. Е. Евсевьев лемсэ МГПИ-сэ эрзянь ды мокшонь языкознаниянь кафедрань прявтокс. Ваннось эрзянь ды мокшонь кельтнень диалектологиянть, морфологиянть, орфографиянть, орфоэпиянть. Сон – малав 60 научной важодевксэнь автор, сёрмадсь учебникть ды тонавтомань пособият.

 
Научной тевтнеде башка, лиссть стихень пусмонзо: «Кустемат», «Чачома эле», «Эрямонь лув». Эрзянь кельс ютавтсь рузонь содавикс поэттнэнь – Пушкинэнь, Лермонтовонь, Блоконь, Есенинэнь ды лиятнень произведенияст. 1993 иестэ, куломадонзо мейле, лиссь «Пинкст» публицистикань ды поэзиянь сборникезэ. Д. Т. Надькин – «Масторава» эрзянь ды мокшонь покш движениянть пурныця-теиця ды васенце председатель.

 
1992 иень июлень 8-це чистэ сон тусь Финляндиянь Хельсинки ошов эрзянь кельс Библиянть ютавтомо. Июлень 15-це чистэ седеезэ лоткась чавомодо. Кавто недлянь ютазь (ламо ванкшномадо мейле) уловонть ускизь Мордовияв ды калмизь. Дмитрий Надькин эсь мельганзо кадсь валдо тешкс. Сонзэ ялганзо ды малавиксэнзэ те шкас ризныть ды мелявтыть, кода куроксто сезевсь эрямозо те паро, превей ды валдо ломаненть.
Вастовомасонть вал сайнесть МР-нь культурань, национальной политикань ды архивень тевень министрань васенце полавтыцясь А. И. Карьгин, Эрзянь ды мокшонь раськень регионъютконь общественной вейсэндявксонь прявтось Ю. А. Мишанин. Вадря ды мельстуиця доклад ловнось филологиянь наукань докторось, М. Е. Евсевьев лемсэ МГПУ-нь филологиянь факультетэнь литературань методикань тонавтомань ды литературань кафедрань профессорось В. И. Рогачев. Сон ульнесь Надькинэнь студентэкс.

 
– Дмитрий Тимофеевич ламо макссь минек наукантень. Нолдась алкуксонь важодевкст. Сон ютавтнесь келень экспедицият, сёрмадсь школасо тонавтницятнень туртов учебникть. Те – ломань-исследователь, свал ульнесть ламо мелензэ-бажамонзо. Свал кортыль, эрзянь кельсэ ёвтавить весе ёжомарямотне. А кода ловныль стихть! Сонензэ натой сакшныльть минек актёртнэ, тонавтнесть пельдензэ сцена лангсо парсте ловномантень, – ледстнесь Владимир Ильич.

 
Видеосвязь вельде тетядонзо ёвтнесь Надькинэнь цёразо Тимофей Дмитриевич. Сон – историянь наукань доктор, М. Е. Евсевьев лемсэ МГПУ-нь отечественной ды омбо масторонь историянь ды тонавтомань методикань кафедрань профессор.

 
Д. Т. Надькинэнь содылизь ламот, сондензэ ледстнесть зярыя инжеть. Мазылгавтызь ледстнемань чокшненть «Ламзурь», «Толава» ды «Тяштеня» фольклорной ансамблятнень моротне.

Промксонть пурнызе эрзянь ды мокшонь раськень регионъютконь общественной вейсэндявксось «Раськень каштанчи» проектэнть лувсо.

 

Татьяна Маторкина