Неть читнестэ С. Д. Эрьзя лемсэ изобразительной искусствань музейсэ Народной фронтонь «Бабушка. Онлайн» Весероссиянь проектэнть лувсо пурназель а покшке концерт. Виде эфир ладсо концертэсь невтевсь Саранск ошонь сыре ды лавшо шумбрачи марто ломантнень туртов кудосонть-интернатсонть.
Сыретнень эсь моросост кенярдовтызь Мордовской государственной филармониянь солисттнэ – МР-нь заслуженной артистэсь Вячеслав Зобков ды раськеютконь, весероссиянь музыкальной пелькстамотнень лауреатось Карина Сергеева. Артисттнэ покш мельсэ ды пек вадрясто морызь весенень содавикс моротнень, конатнень ютксо – «Валенки», «Какая песня без баяна», «Надежда», «Колодец» ды ламот лиятнень. Вечкевикс моротне кастызь весень мель-ёжост, ды сыре ломантне эзть жаля цяпамотнень истямо казненть кисэ.
Концерттэнть икеле жо видеоконференцсвязенть лувсо пурнавозтненень пшкадсь Общероссийской народной фронтонь исполкомонь прявтонь васенце полавтыцясь Евгения Калачёва:
– Народной фронтось Zoom вельде важоди весе масторонть келес, штобу кирдемс сыре ломантнень валсо ды тевсэ, кенярдовтомс. Тёжат покштятне-бабатне морыть морот артисттнэнь марто, кунсолыть лекцият, ледстнить ды кортнить фильматнеде. «Бабушка. Онлайн» проектэнтень уш кавто иеть ды апак кавтолдо можна меремс, минек проекттнэнь эйстэ те сехте содавикс ды эрявикс. Артисттнэ, морыцятне, творческой ломантне, кинень минь пшкадекшнинек, покш мельсэ кармасть проектэнь участникекс. Покш сюкпря тенст.
Ледстясынек, «Бабушка. Онлайн» проектэсь нолдавсь 2020 иень мартсто, зярдо масторсонть ушодовсь коронавирусонь кезовось. Сестэ минь весе парсте чарькодинек, сыре ломантне те орманть печтить пек стакасто, секс сыненст седеяк сави кирдемс самоизоляциянть.
Течи «Бабушка. Онлайн» проектэсь – те 35 вастовомат, концертт, кинонь ванномат ды мероприятият масторонь 65 региононь 280 пансионатонь 20 700 эрицятнень туртов.
– Сестэ, 2020 иестэ, сыретненень лезкс макссь Общероссийской народной фронтось. #МыВместе Весероссиянь акциянть лувсо нолдавсь «Бабушка. Онлайн» проектэсь. Сонзэ аравтлувось чарькодевикс – ютавтомс онлайн-вастовомат интернатсо эрицятнень туртов содавикс артисттнэнь, морыцятнень марто. Теке марто эдь артисттнэньгак кезовонть шкасто юткошкаст кармась ков седе ламо. Проектсэнть уш ульнесть истят содавикс ломантне, кода Мария Миронова, Евгений Миронов, Егор Бероев, Анатолий Белый, Алла Сурикова, Валерия Ланская ды лиятне, – мерсь МР-нь ОНФ-нь региональной штабонь сопредседателесь Людмила Нарбекова.
Сон истя жо ёвтась кемема, те проектэсь карми эсь койсэ «культурной прививкакс», конась лезды кирдемс эрямонь стакачитнень.
Юлия ЕРЕМИНА
Концерттэнть икеле жо видеоконференцсвязенть лувсо пурнавозтненень пшкадсь Общероссийской народной фронтонь исполкомонь прявтонь васенце полавтыцясь Евгения Калачёва:
– Народной фронтось Zoom вельде важоди весе масторонть келес, штобу кирдемс сыре ломантнень валсо ды тевсэ, кенярдовтомс. Тёжат покштятне-бабатне морыть морот артисттнэнь марто, кунсолыть лекцият, ледстнить ды кортнить фильматнеде. «Бабушка. Онлайн» проектэнтень уш кавто иеть ды апак кавтолдо можна меремс, минек проекттнэнь эйстэ те сехте содавикс ды эрявикс. Артисттнэ, морыцятне, творческой ломантне, кинень минь пшкадекшнинек, покш мельсэ кармасть проектэнь участникекс. Покш сюкпря тенст.
Ледстясынек, «Бабушка. Онлайн» проектэсь нолдавсь 2020 иень мартсто, зярдо масторсонть ушодовсь коронавирусонь кезовось. Сестэ минь весе парсте чарькодинек, сыре ломантне те орманть печтить пек стакасто, секс сыненст седеяк сави кирдемс самоизоляциянть.
Течи «Бабушка. Онлайн» проектэсь – те 35 вастовомат, концертт, кинонь ванномат ды мероприятият масторонь 65 региононь 280 пансионатонь 20 700 эрицятнень туртов.
– Сестэ, 2020 иестэ, сыретненень лезкс макссь Общероссийской народной фронтось. #МыВместе Весероссиянь акциянть лувсо нолдавсь «Бабушка. Онлайн» проектэсь. Сонзэ аравтлувось чарькодевикс – ютавтомс онлайн-вастовомат интернатсо эрицятнень туртов содавикс артисттнэнь, морыцятнень марто. Теке марто эдь артисттнэньгак кезовонть шкасто юткошкаст кармась ков седе ламо. Проектсэнть уш ульнесть истят содавикс ломантне, кода Мария Миронова, Евгений Миронов, Егор Бероев, Анатолий Белый, Алла Сурикова, Валерия Ланская ды лиятне, – мерсь МР-нь ОНФ-нь региональной штабонь сопредседателесь Людмила Нарбекова.
Сон истя жо ёвтась кемема, те проектэсь карми эсь койсэ «культурной прививкакс», конась лезды кирдемс эрямонь стакачитнень.
Юлия ЕРЕМИНА