Пятница, марта 29, 2024
Важное


Малав кеветее иеть Андрей Анисимов важоди Эрзянь ды мокшонь национальной драмань театрасо. Сон – актёр ды режиссёр. Налкси ламо спектаклятнесэ ды сонсь путни невтемат.

Театрась – истямо тарка, ков понги ломанесь ды тестэ ковгак лияв а туеви. Аволь умок Андрей нолдась «Саня, Ваня, мартост Римас» путовкс, конань ваныцятне вастызь пек лембестэ.

Андрей Анисимовонь ундоксонзо Кочкурбуень Мурань ды Тавла велетнестэ. Сонсь чачсь Саранскойсэ. Тонавтнесь 32 № школасо. Самай тосо, покш классо тонавтнемстэ, кармась яксеме школань театрань кружокс. Сонзэ ветясь завучось ды литературань тонавтыцясь Наталья Алексеевна Ермилова (ней важоди 28 № школань прявтокс). Театрань кружокось пек вечкевсь цёрантень. Тень редизе тонавтыцязо. Сон ёвтась, Н.П. Огарёв лемсэ МГУ-со ули национальной культурань факультет, косо пурныть актёронь отделенияв тонавтницят. Истя, 1999 иестэ Андрей ушодсь тонавтнеме те таркасонть. Сон нейгак ёвты сюкпрянь валт Наталья Алексеевнанень.

Те факультетсэнть тонавтнемась мелезэнзэ тусь. Сынст тонавтсть Е.С. Грачёва, Н.И. Пискаев, В.С. Брыжинский. Курссонть ульнесть кеветее ломанть. Эйсэст анокстасть Национальной театрасо важодеме. Нолдасть кавто дипломной спектаклят (М. Горькиень «На дне», В.Катаевень «Квадратура круга») ды явсть мель эрзянь ды мокшонь произведениятненень. Мирдть-нить Е.С. Грачёва ды Н.И. Пискаев важодсть нацтеатрань труппасо. Сынь пек ризнэсть ды мелявтсть театранть кисэ, учость од ломанть, од вийть, конатнень марто кепедемс раськень театранть, путомс покш спектаклят. Мезе парось, теде икеле актёронь вейке курс нолдасть уш.

– Тонавтыцятне ды миньгак пек бажинек вузонь прядомадо мейле курснэк самс важодеме театрав. Путомс од ломанень спектаклят. Сынек ансяк вете ломанть. Тешкстаса, минь нейгак важодтяно тесэ. Неть: Алексей Егранов, Дмитрий Мишечкин, Екатерина Исайчева, Татьяна Холопова ды мон. Сеске ушодынек налксеме спектаклясо. Колмо-ниле иень перть пурнавсь паро репертуар. Путозельть «Не в свои сани не садись», «Уроки радости», «Толмар», «Власть тьмы», «Делец», «Чудеса пренебрежения» ды лия спектаклятне, – ледстни Андрей.

2004 иень сёксня Андрей капшась кудов Марий Элстэ «Шумбрат, Майатул» фестивальстэ, косо невтезель «Тюштя» путовксось. Совась кудов – тосо пурнавсть весе малавиксэнзэ. Учить ансяк сонзэ. Омбоце чинь валскестэ од актёронть ильтизь армияв.
Армиясто самодо мейле сон сеске велявтсь театрав. Самай се шкане И. Кузьмин путызе В. Шукшинэнь коряс «Крыша поехала» спектаклянть. Анисимов тосо налксесь Жеребцовонь.

2008 иестэ Андрей Анисимовнень макссть театрань искусствасо МР-нь Прявтонь премия – «Цёрань сехте вадря роль» номинациясо В. Мишанинань «Толмар» спектаклясонть Лёксонь роленть кис. Те путовкс, кона киньгак эзизе кадо мельтеме.
2009 иестэ театрань сестэнь прявтось Е.Н. Пулов мерсь Андрейнень кундамс режиссёронь ассистентэнь тевентень. Эрявсь ютавтомс репетициятнень, ветямс репертуаронть. Театрасо сеедьстэ ульнесть ве ёндо тердезь режиссёрт, сынст туемадо мейле эрявсь ветямс тевтнень. Самай Андрей топавтсь тень. Сон ульнесь свал режиссёртнэнь вакссо се шкастонть саезь, кода ушодыльть спектаклянть лангсо важодеме.

Шкань ютазь Е.Н. Пулов мерсь тензэ варчамс виензэ ёвксонь путомасо. Истя, 2011 иестэ Андреень ульнесь режиссёронь тевсэ дебютозо. Сон путызе А. Пудинэнь «Козни Ведявы» эйкакштнень туртов ёвксонть. Весе лиссь парсте. Теде мейле путозельть Од иенень эйдень спектаклят. Г. Самаркина марто путызь В. Илюховонь «Как Баба-Яга дочек замуж отдавала» ды К. Абрамовонь «Эрьванть эсензэ ормазо» путовкстнэнь. Нама, тесэ эряви тонавтнемскак. Секскак Андрей кармась тонавтнеме Московсо дополнительной профессиональной образованиянь кастомань-кепетемань институтонь режиссёронь отделениясо.


– Минь кувать арсинек, мезе путомс тедеде Ине Изнямонь 75 иетненень. Апак учне понгсь кедезэнь содавикс драматургонть, режиссёронть В. Гуркинэнь «Саня, Ваня, мартост Римас» пьесась. Те произведениясь пек содавикс ды сон токизе оймем. Сеске пряван кармасть чарамо-велямо арсематне. Мон уш неинь, кие кодамо роль карми налксеме. Бажинек невтемс тиринь кельсэ. Эрзякс ютавтызе Г. Самаркина. Рузонь ваныцятнень туртов невтьсынек рузокскак. Гуркинэнь келезэ пек сюпав ды мазый. Октябрянь 9-10-це читнестэ карми премьера рузонь кельсэ. Пек бажинек невтемс сонзэ Маень 9-це чинтень. Ансяк те карантинэсь… Одс кундынек спектаклянтень кизна. Эзинек ардтне гастрольга ды лия таркава, арасельть спектаклянь невтемат, явинек покш мель те путовксонь репетициятненень.

– Андрей, мезе сехте стакась режиссёронь тевсэнть?

– Эрьва важодемасо улить стакачить. Стака сестэ, зярдо а содат, мезе тонеть эряви, мезе теевлить, а содат, кода ютамс седе тов. Бути прясот улить арсемат, улить мельть – сестэ несак сценической виде кинть ды ютат икелев, содат, мезе тонь лиси песэнть.

– Улить-арасть вечкевикс спектаклят?

– Пек вечкса А. Островскоень «Не в свои сани не садись» путовксонть, тосо налксян Иван Бородкинэнь. Мелезэнь тукшныть Н. Гоголень «Урьвакстома» (Кочкарев), В. Шукшинэнь «Латось сыргась» (М. Жеребцов), А. Толстоень «Делец» (Распер) ды ламо лия путовкстнэ.
Театрасо паро важодеманть кисэ Андрей Анисимов казезь МР-нь Государственной Собраниянь, МР-нь Культурань, национальной политикань ды архивень тевень министерстванть пельде Почётонь грамотасо. Невтизе прянзо театрань раськеютконь фестивальтнесэ. Ульнесь эрямосонзо истямо тевгак, сон налксесь А. Федорченконь «Небесные жены горных мари» фильмасонть.

Театрадо башка, Андреень свал пек учить кудосо. Семиянтень сон яви покш мель. Елена Алексеевна нинзэ марто кастыть колмо эйкакшт. Татьяна тонавтни 4-це классо. Сон якси П.Ф. Рябов лемсэ эйкакшонь художественной школав. Пек вечксы артома тевенть. Иван тедеде мольсь васенце классос. Сон яви мель гимнастикантень. Ардтнесь пелькстамо лия ошовгак, сайнесь изнямонь таркат. Вованень вете иеть, сон яки эйдень кужов. Сеедьстэ эрси театрасо репетициянь шкасто эли спектаклянь ваномсто. Ваны ды а чарыяк. Чокшне кудосо сонсь тетянзо-аванзо туртов невтни спектаклят. Аравтни стулт, лисни буто кулисатнень удалдо ковбоекс, сеельнекс ды лия героекс. Кие соды, паряк, эйстэнзэ касы покш артист?

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».