Сентябрянь 24-це чистэ Ицялонь райононь Национальной культурань «Смольный» этнопарксонть ютавтовсь покш чи, кона алтазь Мордовиянь содавикс поэтэнтень-тонавтыцянтень И.П. Кривошеевнень.
Вастовомась ютась лембестэ. Мероприятиянтень тердезельть ламо инжеть, конатнень ютксо: Эрзянь раськенть этнокультурань наследиянзо ванстомань ды виевгавтомань фондонь прявтось Т.И. Ларина, Мордовиянь Писателень союзонь председателесь, «Чилисема» журналонь главной редакторось Н.И. Ишуткин, Мордовия Республикань заслуженной артисткась, «Келу» ансамблянь солисткась Елена Воронина, Мордовия Республикань заслуженной артисткась Н.Я. Медведская, Ицялонь муниципальной райононь «Центр Культуры» МБУ-нь директорось Н.А. Буянова ды ламо лият.
Мероприятиянть ютавтомасо покш таликаст И.П. Кривошеевень тейтерензэ – Ольга Ильинична Горбуновань (Кривошеевань) ды нуцьканзо Анжеликань.
И.П. Кривошеевень ледстнемга ловность стихть, морасть морот, ёвтасть ламо лембе валт.
Сон кадови Мордовиянь поэзиясонть, кода Мордовиянь поэзиянь ушодыця, тонавтыця…
И.П. Кривошеев печатавкшнось Илька Морыця псевдонименть ало. Сон чачсь 1898 иень июлень 19-це чистэ Саратовской губерниянь Петровской уездэнь Пылковской волостень (ней Пензенской областень Лопатинской райононь) Маяк хуторсо, крестьянинэнь семиясо. Сёрмадыцянть авазо – Ефимия Петровна – Мордовиянь содавикс сказительница. Нама, сонзэ пельде сы шкань поэтэнтень ютась тиринь келентень ды устной поэзиянтень вечкемась. 1910 иестэ сон прядызе Тарасовской церковно-приходской школанть ды тонавтнеманзо поладызе Русско-Камешкирской кавто классонь школасо.
1913 иестэ саезь 1917 иес Кривошеев тонавтнесь Казанень учительской семинариясо… Учителень семинариянть прядомадо мейле, 1917 иень майстэ, сонзэ саизь армияв. 1918 иень январьстэ сонзэ, кода тонавтыцянть, армиясто демобилизовизь, ды кармась важодеме Петровской уездэнь Дьяковка велесэ тонавтыцякс. Гражданской войнань иетнестэ сон таго служась Якстере Армиясо. Войнадо мейле Кривошеев тонавтсь тиринь кель ды литература Маяк хуторонь школасо. Аламо шкань ютазь путызь Петровской уездэнь национальной школань инспекторокс.
1927 иестэ сон прядызе Н.Г. Чернышевский лемсэ Саратовской госуниверситетэнь педагогической факультетэнь общественно-экономической отделениянть.
Сонзэ тонавтыцякс, валдо превень максыцякс ульнесть содавикс учёнойтне-лингвисттнэ: Б. Соколов, А. Скафтымов, В. Буш, А. Мадуев, А. Гераклитов. Тонавтнемадо мейле сонзэ кучизь Мордовиянь Петровской педагогической техникумов общественной дисциплинань тонавтыцякс.
Стихень сёрмадомо ушодсь пек рана, эштё Казанень учительской семинариясо тонавтнемстэ.
Эсензэ творческой эрямонзо перть Кривошеев нолдась малав комсь книгат. Мордовиянь литературань историяс совась кода поэт-лирик.
1940 иестэ саезь пенсияв туемазонзо важодсь Ицялонь педучилищасо.