Суббота, апреля 20, 2024
Важное

«Консервный завод «Саранский» АО-сь – Мордовия Республикань перерабатывающей покш предприятиятнестэ вейкесь. Неень шкань оборудованиясь ды тевс нолдавиця вадря сырьясь лездыть заводонтень анокстамс вадрячинь коряс экологической ванькс ды тантей продукция.
Неень шкасто предприятиясь нолды ловсонь, эмежень ды сывелень консервация, истя жо тесэ тееви ловсо, топо, сыра, симемань туртов ведь.



«Консервный завод «Саранский» АО-нть продукциянзо содасызь масторонь ламо регионтнэсэ. Сон ламоксть тешкстазь покш казнесэ, мезесь корты продукциянть вадрячидензэ. Аволь умок Саранскоень консервань теема заводонь сгущённой ловсось кармась изницякс «Продэкспо-2023» пелькстамосонть.

Предприятиясонть важодицятнень покш пельксэсь – эсь тевень вечкиця, мазый тейтерь-ават. Сынст лангсо тесэ кирдеви ламось. Тундонь прявт кенярксчиденть икеле минь вастовинек тесэ важодицятнень марто, нама, эрьвадонть ули мезе ёвтнемс ды сёрмадомс. Зярс жо содавттадызь кавто ёроков аватнень марто.

Кортыть, зярдо ломанесь котьми вечкевикс тевсэ, сон пек уцяскав. Ды, бути арсемскак, те алкукс истя. Истямо ломаненть вановтозояк лия: панжадо, валдо, сэтьме ды лембе. Газетасо важодемань иетнень перть савкшнось вастневемс ламо эрьва кодамо профессиянь ломань марто. Видькстан, аламот, кить эсь роботадонть, конанть марто сынь сюлмизь уш малав весе пингест, ёвтнить покш мельсэ ды уцяскав мизолкс марто. Течи эсь ловныцятнень ули мелем содавтомс превей, ёроков эрзянь аванть, «Консервный завод «Саранский» АО-нь кедьгетнень ды упаковкань материалонь коряс кладовщикенть Галина Николаевна ВОЛКОВА марто. Сон вана уш зярыя иеть роботы предприятиясонть ды ве чияк эзь янксе эсь тевенть кочкамодо.

Галина Волкова чачсь Отяжелень райононь Киржеманы велесэ. Прядызе школанть ды 10-це классто мейле мольсь тонавтнеме Саранскоень кооперативной техникумов, косо тензэ максовсь «товаровед продовольственных и непродовольственных товаров» специальностесь.
Техникумонть прядомадо мейле сеске ушодсь роботамо лавкасо микшницякс.

– Икеле ульнесть капторговской лавкат. Тосо ушодыньгак важодемань эсь кинть. Те ульнесь 1992 иесь, – ёвтни Галина Николаевна. – Сестэ эдь микшницятненень путовильть категорият – 1-це, 2-це, 3-це категориятне, мейле старшей микшниця, товаровед ды истя седе тов. Мон ушодокшнынь сехте ало чалгамостонть – карминь 1-це категориянь микшницякс. Ды аламонь-аламонь ютыя весементь. Сестэ эдь важодема лувось овсе лия ульнесь, аволь неень ладсо. Ней минек куш косо улить пек паро материально-технической базат, вадря компьютерт, малав весемесь автоматизированной. Сестэ жо минек ульнесть счётат. Ды теньсэ весе. Минек превенек роботасть. Те тонавтымизьгак пек ламос.

Микшницякс важодсь, зярс эзь туе декретэнь отпусков. Те таркантень одс уш эзь лисе. Зярдо эйкакшось кармась якамо эйдень кужов, Галина Николаевна ушодсь важодеме эйдень кужосо завхозокс, штобу улемс эсь тякинентень седе маласо. Истя ютасть ветешка иеть. Ды зярдо эйкакшось мольсь васенце классос, аламо шкань ютазь Галина Волкова сась Консервань теемань заводов.

Авась ушодсь важодицякс консерватнень теемань цехсэнть. Предприятиясонть парсте несть Г.Н. Волковань вадря важодеманзо ды бажамонзо, секскак зярыя шкань ютазь аравтызь кедьгетнень ды упаковкань материалонь коряс кладовщикекс. Тедедень майстэ топодить вете иеть, кода важоди те таркасонть.

Од тарканть марто аламодо полавтовсь важодема лувось ды, нама, ответственностесь седе покш кармась. Эдь сонзэ вановт ало весемесь, мезесь эрявикс предприятиянть важодеманзо туртов.

– Монь вановт ало весе кедьгетне, сынст туртов эрявикс вельтявкстнэ, этикеткась. Лиякс меремс, весемесь, мезесь эряви анок продукциянть пештнеманть-упаковканть туртов, – ёвтни Галина Волкова. – Монень складс ускить весе эрявиксэнть, мон пштистэ ванан ламочинть, вадрячинть мельга. Весементь аравтнян таркаваст, штобу содамс, косо-мезе, ды а ёмавтнемс шка вешнеманть лангс. Ды уш мейле яволявтомань коряс максан производстванть туртов эрявиксэнть. Яволявтоматне сыть эрьва чистэ. Эдь эрьва чистэ эряви мезе-бути лия. Мертяно, течи теить тушёнка. Вешить эрявикс кедьгеть (покшолмаст улить эрьва кодат), сынст туртов эрявикс вельтявкст, этикеткат. Мон ванан яволявтоманть, конань коряс кочкан, ды эрявиксэнть максса мельганзо сыцянтень.

Кода мерсь Галина Николаевна, важодемань иетнень перть весементь тонавтнизе педе-пес, секскак эсь складсонть куш мезенть мусы сельмень конязь.

– Мон весементь содаса: зяро тень складс товардонть усксть, зяро максынь производствас, – тешксты Галина Волкова. – Мон ломанесь материально ответственной, секскак лиякс а кода. Ды, эряви меремс, теньс ламосо тонавтымим микшницякс важодемась.
Самай те ответственностенть коряс Галина Волковань редизьгак предприятиясонть важодемань васенце читнестэ саезь.

– Зярдо сон миненек сась, васняяк ванынек важодемань ёрокчинзэ мельга. Ды сеске редявсть сонзэ истят ёнкстнэ, кода дисциплинась, ваньксчинь кирдемась, веши кармавтоматнень топавтома кода эсензэ, истя лиятнень пельдеяк, – тешксты «Консервный завод «Саранский» АО-нь исполнительной директорось Николай Геннадьевич Салмов. – Галина Николаевнань складсонзо ваньксчи, кода алкуксонь азораванть – весе эрявиксэсь эсь таркасонзо.

Ялатеке, кода тешксты сонсь Галина Николаевна, шнамонь валтнэ пек эждить седеенть. Ды сонзэ туртов прявтокс ашти се, кода кандоват эсь тевентень. Бути эсь роботат вечксак, важодема таркав ливтязь ливтят, эрьва тевентень кундат покш мельсэ ды кенярдозь.

ЛОМАНТНЕДЕ МЕЛЯВТОЗЬ

Ольга Николаевна СУНЯЙКИНА «Консервный завод «Саранский» АО-со важоди 26 иеть. Сась тей ютазь пингень 1997 иестэ. Важодемань кинть ушодызе фабрикатной цехсэ роботыцякс. Тевесь тосо ульнесь аволь шождатнестэ. Весементь савсь топавтомс кедьвийсэ – этикировканть, продукциянь ладсеманть. Тосо роботась кемень иень перть. Ней вана уш зярыя иеть важоди буфетсэ ды кенярдовты заводонь важодицятнень тантей ярсамопельсэ. Эсь роботанть пек вечксы, ланганзо ёвтни покш мельспаросо ды лембестэ.

Эрзянь авась чачсь-кассь Покш Березникень Перьмезь велесэ. Школанть прядомадо мейле сеске кармась роботамо. Важодемань кизэ ушодовсь республикань полупроводниковой заводсто, козонь саекшнизь ЭВМ-нь операторокс. Те ульнесь 1985 иесь.

– Мейле кода-бути сельме икелев понгсь яволявтома: Консервань теемань заводов эрявить важодицят. Арсинь, мекс бу а варчамс. Саимизь важодицякс фабрикатной цехс. Ушодынь роботамо ды эзинь арсеяк, што стака, мелявксов тевесь тень вечкеви, – корты Ольга Николаевна. – А мейле чамсь тарка буфетсэ, косо роботан нейгак. Минь андтано эсь заводонь важодицятнень. Эсенек столовой арась, эрьва чистэ весе эрявиксэнть ускить лиясто. Минек весемесь кода кудосо: вадря-паро обед, косо ули васенцеяк, омбоцеяк ды колмоцеяк.
Буфетсэнть важодить весемезэ колмо ават. Сыненст усксызь ярсамопельтнень, а сынь уш весементь явшесызь. Кода тешкстыть аватне, келя, ярсамкатне пек тантейть ды питнеськак «а суски».

Ольга Суняйкина тешкстызе, роботась ламосо вечкеви сень коряскак, пек паро коллективесь ды чарькодиця прявтось:

– Покш сюкпря, минек истямо паро прявтонок. Николай Геннадьевич Салмов – ёроков ды чарькодиця. Эрьванть ломанекс путы, весень марто муи кель-вал, бути эряви, лезды куш кодамо тевсэ. Сон пурнась истямо коллектив, конанть марто важодемась – те покш уцяска.
Ольга Николаевнань девизэзэ – улемс кемевикс эсь тевентень. Секскак важодема таркав эрьва чистэ сы покш мельспаросо ды свал мизолкс марто. Сон кеми, теи лезэв ды эрявикс тев.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».