Суббота, июня 22, 2024
Важное

Покш Игнатовань райононь «8-ое Марта» ООО-сь велень хозяйствань прявт предприятиятнестэ вейкесь. Сон ашти Ташто Чамза велесэнть ды важодема таркасо топавты маласо аштиця зярыя велетнень ды шабра районтнэнь эрицятнень. Неень шкасто предприятиясь важоди сюротнень, ламбамо якстерькаень ды тикшень кастомань, сюракшов ракшатнень трямонь ды ловсонь нолдамонь ёнкстнэсэ. Хозяйстванть прявтсо ашти дока ды эсь тевентень чарькодиця аграрникесь Николай Иванович Куманев, конанть весе эрямозо сюлмавозь велень хозяйстванть марто.

 

Предприятиянть юрс совить ниле отделеният, конатне аштить Спасское, Моревка, Аржадеевка ды Ташто Чамза (прявт отделениясь) велетнесэ.

Кода ёвтнесь «8-ое Марта» ООО-нь прявтонь полавтыцясь Сергей Михайлович Темаев, неть читнестэ хозяйствасонть прядызь ламбамо якстерькаенть гербицидтнэсэ пургсеманть. Те культурадонть тесэ видезь 2 тёжат гектарт. Истя жо пургсевсть яровой сюротне. Паксятнесэ важодсть колмо агрегатт.

Эряви ёвтамс, те иестэ минь раминек «Туман» самоходной пургсемка. Техникась эряза ды вадря. Сонзэ руль экшсэ важоди опытной механизаторось Владимир Кузьмич Бахтин. Велень хозяйствантень сон алтась 35 ламо иеть ды вана уш кавксо иеть важоди гербицидсэ пургсемкань техникасонть ды агрегаттнэсэ, – ёвтни Сергей Михайлович.

Нуемань шкантеньгак анокстамотне уш ушодовсть. Механизатортнэ витнить-петнить комбайнатнень, конатнеде лововить кемень. Те иестэ рамазь эштё вейке од – те «Ростсельмашонь» Т500 сюронь нуемань комбайнась.

Неть читнестэ хозяйствасонть ушодовсь сенажонь ды тикшетнень  анокстамось. Сюракшов ракшатнень андоманть туртов сенаждонть эрьва ие анокстави сатышка. Тень коряс мелявкст арасть.

«8-ое Марта» ООО-сонть важодить 206 ломанть – алкуксонь труженикть, конатнень лангсо кирдеви хозяйствась. Тесэ аволь аламо истят, конатне велявтсть ошсто тиринь велев ды покш мельсэ роботыть.

Важодицятнень кудосто роботав ды мекев усксемга аволь умок рамасть эштё вейке автомашина УАЗ. Ней эйстэдест важодить кавто.

Истя жо Сергей Темаев пачтясь, хозяйстванть арсемасо неень шкань ловсонь комплексэнь теемась, косо кармить кирдевеме 900 потявтовиця скалт. Кизэнь перть истя жо арсить стявтомс 5 тёжат тоннас сюронь ванстомань утом. Строямонть коряс весе тевтне предприятиясонть техникенть-строителенть Николай Иванович Куманевонь вановт ало. Хозяйствасонть сон важоди весе эрямонзо перть, вечкевикс тевентень макссь 42 иеть. Кода предприятиясонть, истя Ташто Чамза велесэнтькак, ламось теезь сонзэ лезксэнзэ-вановтонзо вельде.

Ташто Чамзань МТФ-сь

Кода ёвтнесь «8-ое Марта» ООО-нь Ташто Чамзань отделениянь ловсонь-товарной фермань прявтось Алексей Михайлович Навдаев, течинь чине сынст МТФ-сэнть трявить-кирдевить 1360 сюракшов ракшат, сынст эйстэ 400 – потявтовиця скалт.

Меельце иетнестэ предприятиясонтькак ды фермасояк лиссть редявикс полавтомат. Васняяк тесэ ёвтама производствань одкстомтоманть. Важодемасо келейстэ нолдавить неень шкань технологиятне, конатне тевентькак седе шождалгавтыть, ёмавкстнэньгак аламолгавтыть. Неень шкасто тентеме кодаяк, – корты Алексей Михайлович. – Тень эйстэ ашти целанек предприятиянть роботазо. Ды бути ломантненень теемс важодемань вадря условият, тевесь эдь овсе лиякс туи, седе парсте.

Алексей Навдаевень валонзо коряс, меельце иетнестэ фермасонть вадрялгавтовсь потявтомань ды ловсонь ванстомань туртов оборудованиясь, теевсть кардот, витневсть кизэнь шкасто ракшатнень кирдема калдатне. Тесэ нейгак молить строямонь тевть. Стявтови вазтнэнь кирдемга-трямга од ферма.

Ней минек тесэ тееви од объект – вазонь кирдемань кардо. Пелезэ явови ансяк чачозь вазнэтненень, конатне тесэ кармить трявомо 3-4 ковс. Сон арсеви 180-190 таркас. Эштё пелезэ максови 4 ковсто саезь 6-7 ковс вазнэтнень туртов. Тесэ истя жо малав 200 таркат. Кардонть тееманзо ушодынек ютазь иень сёксня, ней роботась поладови. Кардонтень ведентькак уш ветинек. Вишка вазнэтнень туртов эрявикс инвентаресь, андома- ды симдемапельтне рамазь. Арсетяно, сёксенть малав весемесь карми анок ды объектэнть нолдасынек тевс. Теке марто кизэнь перть витнемань тевть ютавтовить лия кардотнесэяк, – ёвтни фермань прявтось. –  Зярдо мон тесэ ушодынь роботамо, резинань кемень ульнесть кумажадо верьга, ней иестэ иес весемесь вадрялгавтови, одкстомтови. Фермань кардотнесэ ды перькаст коське, ванькс. Неень шкань ферматне кода а кода икеленсетнень эйстэ явовить. Икеле фермасо важодемась ульнесь стакадояк стака. Скалонь потявтыцятненень эдь малав весементь савкшнось кедьвийсэ теемс. Ракшатненень коромонтькак явшильть, алксосткак нардыльть, кедьсэ потявтстькак. Ней жо ламось седе шождалгавтовсь.

Ды, эряви меремс, ферматнеяк ней седе пек молить кодамояк предприятия ёнов. Весе кардотнесэ-теевкстнэсэ ваньксчи, улить асфальтсо вельтязь яннэть. Истямонть неезь, ёжоткак паролгады.  

Алексей Михайловичень валонзо коряс, неень шкане эрьва скалсто потявтовить 22 литрат. Ловсонть ильтить «Сыродельный завод «Ичалковский» предприятияв.

Хозяйствась роботы аволь ансяк ловсонь нолдамонь – ракшань трямонь ёнкссонтькак. Поголовиянть ламолгавтомга трявить ведрекшкеть, букинетнень кастыть ды миить.

Неень шкасто Ташто Чамзань МТФ-нь отделениясонть роботыцятнеде лововить кодгеменде ламо. Тесэ – скалонь потявтыцят, ваз мельга якицят, зоотехник, осеменатор, ветеринарной врач, ракша мельга якицят, доярт, ванстыцят. Эрьва важодицясь пек питней хозяйстванть туртов, эдь сынст лангсо весемесь кирдевияк. Роботыцятне тесэ аволь ансяк эсест Покш Игнатовань райононь, усксить ве ёндояк. Ламот важодицятне шабра Орданьбуень.

Сонсь Алексей Михайлович тескень, Ташто Чамзань. Школанть прядомадо мейле тонавтнесь Орданьбуень ДОСААФ-со, макссть тензэ  водителень прават ды кармась важодеме шоферэкс эсь тиринь колхозсо. Мейле кавто иеть служась армиясо. Велявтозь, таго роботась шоферэкс. Велень хозяйствасо важодеманть аламос полавтокшнызе ды ульнесь Культурань кудонь прявтокс. Мейле одс шоферэкс, бензовозонь водителекс, заправщикекс. А ней вана уш комсте ламо иеть топавты фермань прявтонь тевенть.

Предприятиясь башка мель яви од ломантнень марто профориентационной важодемантень. Вана нейгак, кизэнь каникулатнень ушодовомадо икеле, Ташто Чамзань школань омбоце классто саезь сисемеце классос тонавтницятнень туртов «8-ое Марта» ООО-нь важодицятне ютавтсть экскурсия. Эйкакштне якасть фермав, косо тенст ёвтнесть важодемань лувдонть, кодамо ламонень вечкевикс ярсамопеленть – ловсонть, кизэ. Истя жо кортасть сюракшов ракшатнень трямодонть-кастомадонть. Эйкакштне жо ёвтнесть, кодамо продукция неень шкасто тееви ловсосто ды мезе сыненст седе вечкеви. Нама, вишка инжетнень тесэ учось тантей каванямояк.

Кода тешкстызе «8-ое Марта» ООО-нь прявтонь полавтыцясь Сергей Темаев, эйкакштнень марто вастовомат тесэ ютавтовить сеедьстэ. Предприятиянь прявттнэ бажить седе вадрясто содавтомс эйкакштнень велень хозяйствань ёнксонть марто, штобу, касозь, сынь кочкавольть эстест тев те сферасонть. Од ломантнень марто истямо важодемась неень шкасто пек эрявикс.

Юлия Еремина

Фототне

Марина Девятовань

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».