Суббота, июля 13, 2024
Важное

Республикань велень хозяйствань предприятиятнесэ эзть кенере прядомо тундонь видемань тевтнень, трудий ломантнень уш лия мелявкс – ракшатнень туртов теленень тикшетнень-андомапельтнень анокстамось. Паксятнесэ тевтне лаказь лакить. Неть читнестэ минь ульнинек «Птицефабрика «Атемарская» ОАО-со ды ваннынек, кодамо алкуксонь «пси» шка, ды аволь ансяк пертьпельксэнть коряс, печтить минек аграрийтне.



Кода ёвтнесь предприятиянь прявтось Александр Валентинович Щемеров, хозяйстванть паксятнесэ ламо иень тикшетнеде видезь малав 1100 гектарт. Ледезенть теить сенажокс ды пештить латкотнес, косо сон вадрясто ванстови ламо шкань перть. Сенажось юты андомапелекс сюракшов ракшатненень.

– Ламо иень тикшетне минек ютыть сенажокс. Ней сынст урядамонть уш прядтано, – ёвтни хозяйствань агрономось Иван Фёдорович Глухов. – Сонзэ анокстамосо роботыть ледиця кавто комбайнат, кавто комбайнат, конатне тикшенть теить сенажокс. Истя жо сенажонть усксемасо важодить кавксо единицат КамАЗт ды тракторт, кавто тракторт роботыть сенажонь ванстомань латкосонть.
Истя жо Иван Фёдорович тешкстызе, тикшетнень анокстамонть марто ве шкасто пургсить касовкстнэнь ды изыть од модатнень. Те сеть модатне, конатне икеле эзть нолдаво тевс.

Иван Глуховонь чачома-касома ёнксозо – Покш Березникень районось. Чачсь Симкинасо, кассь Эрзянь Наймансо, эрясь Тазинасо. Комсте ламо иень перть Тазинань колхозсо роботась агрономокс. 2008 иестэ сась важодеме «Птицефабрика «Атемарская» ОАО-в. Ды вана уш тесэяк агрономонь тевсэнть кеветее иеде ламо.
Кода тешксты Иван Фёдорович, сон весе эрямонзо перть роботы мода лангсо, кепеди республикань велень хозяйстванть.
– 1985 иень маень 28-це чистэ прядыя Н. П. Огарёв лемсэ МГУ-нь Аграрной институтонть ды ушодынь роботамо. Весе эрямон перть вечкевикс тевсан, – тешкстась Иван Фёдорович.
Агрономонть валонзо коряс, хозяйствасонть важодемась моли, весемесь тееви шкастонзо ды вадрясто.

– Важодемстэ механизатортнэнень пек лезды техникась. Сон хозяйствасонть малав весе вадря, неень шкань. Автопарконок меельце иетнестэ одкстомтови сеедьстэ, – мерсь Иван Глухов.
Предприятиянь тракторонь-машинань парконть важодемадо седе домкасто ёвтнесь «Птицефабрика «Атемарская» ОАО-нь прявт механикесь Алексей Александрович Марков. Цёрась чачсь-кассь Чаунзань райононь Покш Маризь велесэ, аламошкас роботась тосконь предприятиясо. Зярдо семиянзо марто састь эрямо Саранскоев, вешнесь важодема тарка маласо аштиця хозяйстватнестэ. Истя понгсь «Атемарская» нармунень фабрикав.

– Зярдо тей сынь, озавтымизь тракторонь руль экшс, мейле нармунень трямонь-кастомань фермасо роботынь оборудованиянь витнемань цехсэ, седе тов ульнинь комбайнёрокс ды ютазь иень сёксня аравтымизь прявт механикекс. Хозяйствасонть весемезэ роботан колмоце ие, – корты Алексей Марков.
Неть колмо иетнень перть технической ёндо хозяйствасонть сон тонавтнизе весементь, секс аравтызьгак истямо покш таркас. Прявт механикекс улемс а шожда, эдь тон кирдят вал весе техниканть важодеманзо кисэ.

– Предприятиясонть техникась весе вадря, ламо мезе од. Вана тедедеяк раминек «Кировец К-743» трактор ды сонензэ крандаз, культиватор, ротационной борона, истя жо «Беларус-1222» кавто од тракторт. Техникась миненек рамави эрьва ие, тракторонь паркось малав целанек одкстомтозь, – ёвтни Алексей Марков. – Паряк, тень коряс те иестэ тундонь видематне ютасть шождасто ды куроксто. Кодаткак мелявкст эзть лисне.
Ды теньсэ покш путовксозо самай прявт механикенть. Видемань тевтне ютасть мелявкстомо сень коряс, што техникась весе ульнесь анокстазь шкастонзо ды вадрясто. Видемань шкастонть сонзэ витнеманть лангс шка эзь ютавтово.

Кода роботы неень шкань техникась, Алексей Александрович невтизе тевсэ. Минь сонзэ марто ардынек Атемаронть маласо паксянтень. Тосо механизаторось Михаил Алексеевич Ганькин важодсь тикшень ледемань комбайнанть руль экшсэ.
– Ней коромонь урядамонь комбайнасо важодян, тикшенть анокстатано, – ёвтни Михаил Ганькин. – Истя жо мельган кемекстазь трактор, конасонть важодян тундонь видемасонть. Нуема шкастонть роботан сюронь нуема комбайнасонть. Лиякс меремс, свал тевсан. Эсь тевенть пек вечкса. Кадык кортыть, велень хозяйствасо важодемась пек стака, монень жо сон мелень коряс.
Тикшень урядамонь комбайнасонть роботась механизаторось Владимир Владимирович Орешкин. Хозяйствасонть важоди кавксо иеть. Сон, комбайнадонть башка, истя жо «Беларус» тракторсонть роботы, видемань шкастонть – «Джон Дирсэ».

Владимир Орешкин тескень, Атемаронь. Школадо мейле прядсь техникум, тонавтнесь автомеханикекс. Мейле ютась служба армиясо ды, кудов велявтозь, сась важодеме нармунень трямонь-кастомань фабрикав. Весе те шканть перть роботы механизаторокс.
Минь ваннынек, кода сон маштозь важоди эсь комбайнасонть: ледезь тикшесь пурнави комбайнань чарыця барабанонтень, весе сон човинестэ керсеви ды тестэ жо ютыця коштонть вийсэ ёртови комбайнанть вакссо ардыця машинань эли тракторонь крандазс. Чинзэ перть истямо комбайнась пурны-теи аволь вейке сядот тоннат сенаж.
Орешкинэнь комбайнанть марто рядсек арды водителенть Антон Борисович Полушкинэнь КамАЗось. Цёрась Покш Березникень, важодема таркакс жо кочкизе нармунень трямонь-кастомань фабриканть. Корты, зарплата тесэ пандыть шкастонзо ды паро, од специалисттнэде роботыть ламо, коллективесь пек вадря. Мезе эштё эряви?!

Хозяйствасонть улемстэ ванынек, кода паксясто ускозь сенажонть пештить латкотнес. Эряви меремс, тевесь а шожда ды ответственнойгак. Эдь бути сенажонь пештямось-каямось тееви эрявикс аравтлувтнень апак кирде, ракшатне кадовить вачо. Ледезь тикшесь зярыя шкань ютазь «сырги» ды чапаськады. Секскак ансяк стака техникасо сон матрави ды калгодкстомтови.
Самай те тевенть эсь техникасонть топавтсть механизатортнэ Алексей Александрович Зубенков ды Андрей Владимирович Коротаев. Цёратне важодить вадрясто, тевенть парсте содасызь.
– Сенажонть вадрячизэ ламова ашти минек важодицятнень эйстэ, – кемексты агрономось Иван Глухов. – Анокстамонь технологиятнень акирдемадонть андомапелесь коли. Скалтнэ истямо коромонть ярсамо а кармить. Секскак минек важодицятне читнень стяко а ёмавтнить. Весементь теить шкастонзо ды вадрясто. Тень кисэ тенст покш сюкпря! Лангозост ули кемема.

Юлия Еремина
Фототне Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».