Неть читнестэ Саранскойсэ ютавтовсь «Опора России» общественной организациянь ды «НП Опора» Ассоциациянь лидертнэнь инекужось. Сон ушодовсь «Электронная торговля для развития семейного бизнеса» пленарной промксстонть.
Мордовиянь прявт ошонтень пурнавкшность масторонь 65 регионтнэстэ бизнесэнь малав 300 представительть. Неть: вишка ды средней предпринимательствасо важодицят, экспертт, банконь прявтт ды лия ответственной ломанть. Ванкшновсть электронной микшнематнень-рамсематнень вельде семиянь бизнесэнть виевгавтомань кевкстематне.
Пленарной промксонтень сакшность Мордовия Республикань Правительствань Председателень васенце полавтыцясь Наталья Таркаева, «Опора России» общественной организациянь президентэсь Александр Калинин, те вейсэндявксонть Попечителень советэнь прявтось Сергей Борисов. Видеосюлмавоманть вельде пурнавозтненень икельце вал марто пшкадсь РФ-нь Государственной Думань «Единая Россия» фракциянь прявтонь полавтыцясь Сергей Морозов.
МР-нь Прявтонть пельде паронь арсемань валт евтась Наталья Таркаева. Истя жо сон ловнось доклад, конасонть тешкстась, цифровизациянь шкастонть электронной микшнемась кармась улеме бизнесэнь ветямосонть аволь ансяк башка каналокс, истя жо од инструментэкс ды од лувокс, конань вельде аламолгавтовить ярмаконь ютавтоматне ды виевгавтови бизнесэнь ветицятненень лезксэнь максомась. Истя жо сынь теевить седе малавиксэкс рамицятненень.
– Мордовиясо предпринимательтнень ды бизнесэнь ушодкстнэненень, инфраструктуранть виевгавтомантень явови башка мель. Ламо кевкстематнень минь решатано вейсэ «Опора России» деловой вейсэндявксонтень совиця члентнэнь марто ды эксперттнэнь мелест кунсолозь, – мерсь Наталья Таркаева.
Тешкстазель, «Опора России» общественной организациянь Мордовиянь отделениянть важодеманзо вельде ульнесть анокстазь зярыя документт, конат совавтовсть республикань законопроектнэс ды нормативной правовой акттнэс. Истя, максозь налоговой лезкс башка экономической зонань резидентнэнень, теке марто сеть предпринимательтненень, кить организацияст полавтомадо мейле сонзэ васенцеде кемекстызь Мордовия Республикань территориясо.
МР-нь Прявтонть Артем Здуновонь пельде Наталья Таркаева евтась покш сюкпря «Опора России» вейсэндявксонь члентнэнень, кить макссть лезкс ды нейгак а стувтнить специальной военной операциянь участниктнень ды сынст семиятнень.
Седе тов сон пачтясь вишка ды средней предпринимательстванть Мордовиянь экономикантень путовкстонзо.
– Региононь валовой продуктантень вишка ды средней бизнесэнь путовксось кармась 25 %. Те секторонть марто сюлмавозь республикань экономикасо эрьва колмоце важодицясь. Колмо иетнень перть инвестициятнень покшолмась кармась 220 млрд целковойть, сынст эйстэ 80 % – аволь бюджетэнь.
Ютазь вете иетнень перть региононь валовой продуктась кассь малав 13 %, промышленной производствань индексэсь те шканть перть кассь 1,4-ксть, 60 % кассь розничной микшнемань оборотось, – мерсь Наталья Александровна.
Теде башка сон пачтясь, кода важоди МР-нь Правительствась бизнесэнтень лездамга, конань ютксо национальной проекттнэсэ улемась.
Александр Калининэнь валонзо коряс, «Опора России» вейсэндявксонь инекужотнень ютавтоматне кортыть аволь ансяк вишка бизнесэнть касомадонзо, истя жо регионтнэсэ путыть питне государственной властентень. Сон тешкстынзе сеть паро енкстнэнь, конат меельце шкастонть теевить минек республикасо.
Инекужонь эксперттнэ евтызь мелест-арсемаст ламо кевкстематнень коряс. Сынь пачтясть неень шкань онлайн-площадкатнень вельде бизнесэнь оптимизациянь китнеде-янтнэде, кода чуросто вастневиця продукциянть миемстэ нолдамс тевс электронной микшнематнень, семиянь бизнесэнть ветямосо од законтнэде ды седе тов.
* * *
Ноябрянь 21-це чистэ «Опора России» вейсэндявксонь инекужос сыцятне поладызь важодемаст секциятнева. Вейкесэнть домка кортамо ульнесь Мордовия Республикасо неень шкане предпринимательтнень праваст ванстомадо. Сонзэ важодемасо ульнесть Мордовия Республикань Правительствань Председателесь Батыр Эмеев, МР-нь Прокурорось Сергей Лапин, МР-со Предпринимательтнень праваст ванстомань коряс уполномоченноесь Елена Юрченкова.
Батыр Эмеев тешкстась, кодамо покш мель вишка ды средней предпринимательтнень марто важодемантень явсь Мордовиянь Прявтось Артем Здунов МР-нь Госсобраниянтень Кучомасонзо.
Сергей Лапин пачтясь предпринимательтнень коряс тевтнень ванкшномадонть. Сон тешкстась, сеедьстэ эрси республикань предприятиятнесэ, вастневи вишка ды средней бизнесэнь важодицятнень марто.
Лия секциясонть, косо кортавсь бизнесэнь ветицятнень анокстамодо, предпринимателень наставникесь, персоналонь коряс экспертэсь Виктория Лис евтнесь седе, кода кочкамс од кадратнень эсь тевень ветицятненень. Спикерэсь пачтясь, кода видестэ ютавтомс собеседованиятнень персоналонь пурнамсто, мезе теемс важодицятнень мелест кепедемга, штобу сынь виевгавтовлизь тевенть.
Артур Салякаев экспертэсь ютавтсь «Как вести бизнес с родственниками и не испортить отношения» теманть коряс кругловой столь. Сонзэ превс путоматне лездыть сетненень, кить ветить тевест вейсэ малавиксэст марто, эли жо арсить ушодомс истямо тев. Кода эряви ладямс важодеманть, вейкень-вейкень марто апак севно, видестэ явомс тевтнень весень юткова, эдь семиянь бизнесэнть ветицятнень невтевксэст ков седе покшт лиятнень коряс.
Эште вейке покш кортамо ютавтсь Алексей Лигер – цифровой трансформациянь ды AI-решениянь тевс нолдамонь коряс экспертэсь.
Елена Юрченкова, Мордовия Республикасо Предпринимательтнень праваст ванстомань коряс уполномоченноесь:
– Предпринимательтнень ды властенть ютксо чарькодемась свал эрявикс тев. Минек республикасо вишка ды средней бизнесэнь ветицятнень ды государственной властенть ютксо теезь ве лувонь лиятнень енов а молиця важодема. Ды неть аволь стяконь валт, эдь мон малав эрьва чистэ вастневан ды кортнян предпринимательтнень марто эрьва кодамо кевкстемань коряс.
2020 иестэ, кода монь ладимизь те тевентень, пшкадематнеде ульнесть колмосядто седе ламо, иень ютазь кармасть – 180. Неень шкане эйстэдест – 122. Кеман, икелепелевгак сынь кармить киртявомо.
Наталья Егорова, Адыгея Республикасо «Опора России» общественной организациянь отделениянь прявтось:
– Мордовиясо «Опора России» вейсэндявксонь ды «НП Опора» Ассоциациянь лидертнэнь инекужось ютавтовсь пек парсте, весемесь тусь мелезэнек.
Теньсэ покш путовксост «Опора России» общественной организациянь президентэнть Александр Калининэнь ды Попечителень советэнь прявтонть Сергей Борисовонь ды, нама, сеть ломантнень, конат минек лембестэ вастымизь Мордовиясо.
Минь весенцеде сынек истямо мероприятияс тынк республикав. Мелезэнек тусь Саранск ошось. Сехте пек тесэ эриця ломантне, кить тенек лездасть весе кевкстематнень коряс.
Валентина Юдина