Четверг, марта 28, 2024
Важное


Чаунзань районсо эсь шкасто важодсть велень хозяйствань ламо предприятият. Сынь ульнесть Сабур-Мачкасы, Вишка Маризь, Отрадное ды ламо лия велетнесэ. Течи карминдерят ловомо велень хозяйствань предприятиятнень, конат соксить-виднить паксятнень, кирдить ракшат, сатыть вейке кедень суртнэяк. Ютксост – «Ремезенское» велень хозяйствань предприятиясь, кона Эрьмезенка велесэ.
Тесэнь эрицятне покш сюкпря ёвтыть А.Б.Ботайкиннэнь. Александр Борисович весементь тейсь велень хозяйстванть ванстомга. Сон ванстынзе трактортнэнь, автомашинатнень, комбайнатнень ды, нама, ракшатнень. Тень кувалма шкастонзо видневсть ды урядавсть паксятне. Ды иестэ иес «Ремезенское» велень хозяйствань предприятиясь виензась, тракторонь паркось кармась кирдеме неень шкань тракторт, комбайнат, велень хозяйствань прицепной инвентарь.

– Минек хозяйстванть мельга кемекстазь 2500 гектарт мода, – ёвтни «Ремезенское» велень хозяйствань предприятиянь прявтось А.Б.Ботайкин. – Сюротнень алов явозь 900 гектарт мода, виднетяно 400 гектарт ламбамо якстерькай, 200 гектарт – силосокс кукуруза ды ракшатнень андомс тикше – люцерна, ламо иень тикше.
Хозяйствасонок важодить кодгемень вете ломанть, – полады Александр Борисович. – Сынь велень хозяйствань алкуксонь важодицят, сюронь алкуксонь кастыцят. А мезть сёпомс, велень хозяйствань важодицянь тевесь ашождатнестэ, коллективсэнек арась истямо ломань, кие бу важодевель мельде-валдо.

«Ремезенское» велень хозяйствань предприятиянь прявтонть А.Б.Ботайкинэнь валонзо коряс, Ремезенка велень трудий ломантне виевстэ важодсть мелят. Истя, эрьва гектарсто саезь 42 центнерт сюро, весемезэ пивсэзь 43 тёжат тоннат, 400 гектартнэнь лангсто эрьва гектарсто саезь 507 центнерт ламбамо якстерькай, весемезэ таргазь 20 тёжат 281 тонна. Теньсэ, нама, покш таликаст хозяйствасонть весе важодицятнень.

Тесэ а кода а ледстямс комбайнертнэнь О.А.Наумкинэнь, Н.В.Парчайкинэнь ды А.С.Авторинэнь. Эйстэст весемеде ламо сюро пивсэсь эсь комбайнасо Н.В.Парчайкин.
– Николай Викторович пивсэсь 11 тёжа 800 тоннат сюро. Те результатось хозяйствасонть весемеде вадря, – ёвтни хозяйствань прявтось Александр Борисович. – Кода а шнамс Авторинэнь?! Александр Сергеевич мелят васенце сезон урядась сюро. Ды те удалась.
А.Б.Ботайкинэнь мельспарозо – ракшань комплексэсь. Тесэ кирдевить-андовить 1050 скалт, эйстэст 350 – потявтовицят. Ракшань комплекссэнть важодить скалонь кемень потявтыцят. Мелят эрьва скалсто потявтозь 7,755 килограммат. Весемеде ламо – 331,873 килограммат – потявтсь Е.Н.Кублицкая. Сон эрьва скалсто потявтсь 6 тёжат 740 килограммат ловсо. Тевензэ истя жо парсте топавты В.А.Казаковаяк. Сон пенсиясо, ялатеке эштё важоди. Одтнэнь эйстэ овсе а каднови. Мекевлангт, сон тевензэ топавты вадрясто. Сон тонавты одтнэнь скалонь потявтомань тевентень. Эдь ней ловсонь комплекссэнть оборудованиясь неень шкань.

– Теленть ловсонь комплекссэнть ютавтынек парсте. Коромонь коряс кодаткак стакачить эзинек сода, – ёвтни А.П.Горбунов зоотехникесь. – Эрьва скалс анокстазельть 35 центнерт кормовой единицат.
Тешкстасынек, Александр Павлович хозяйствасонть важоди умок. Сон нучк-пачк содасынзе велень паксятнень, косо касы вадря тикше. Сон весементь теи скалонь стаданть ванстомга. Теньсэ сонензэ пек лездыть Н.Н.Наумкина осеменаторось ды С.Н.Кублицкий ветеринарной врачось.
– Сергей Николаевич тедеде прядсы Ицялонь райононь Кемлянь колледженть, – корты А.П.Горбунов зоотехникесь. – Сонензэ эрьва тевсэ примерэкс ашти ветврачось Николай Александрович Казаков. Сон хозяйствасонок важоди умок. Те шканть перть теевсь аволь ансяк эсь тевень алкуксонь специалистэкс, истя жо паро тевень ушодыцякс. Истя, хозяйствань скалтнэнь луга лангов ливтемадонть икеле ветеринарной врачось скалтнэнень тейсь прививкат. Те тевсэнть тензэ эрьва мейсэ лездыть республикань ветеринарной службасо важодицятне.
Кецявты, «Ремезенское» велень хозяйствань предприятиясо покш мель явови велень специалисттнэнь анокстамонтень. Вана, саемга, хозяйстванть ярмаконзо лангс Н.П.Огарёв лемсэ университетэнь Аграрной институтсо тонавтнесь А.А.Алексин агрономось ды Механикань ды энергетикань институтсо Д.О.Наумкин механикесь.
– Сынь минек вандынь чинек, – видькстась хозяйствань прявтось А.Б.Ботайкин. Сынь монь кеме нежень. Од цёратне важодить виевстэ, парсте. Истя тееме тердить лиятненьгак.

Тешкстасынек, «Ремезенское» велень хозяйствань предприятиянть кеме материальной базазо. Тракторонь-машинань парксонть кирдевить вете «МТЗ-1221», вете «МТЗ-82», «К-744» тракторт, колмо «КамАЗ»-т ды ПАЗ-53 автомашинат. Тесэ сатышка велень хозяйствань инвентарь.
А мезть сёпомс, хозяйствасонть тевтне молить велувсо ды парсте. Теньсэ, нама, покш таликаст бухгалтериясо важодицятненьгак. Эсь тевест парсте топавтыть главбухось Е.В.Осипова, сонзэ полавтыцясь Е.С.Акимова, диспетчерэсь-кассирэсь Е.И.Фадеева, кадрань отделэнь прявтось Т.И.Ботайкина. Сынь весементь теить «Ремезенское» хозяйстванть виевгавтомга.

«Ремезенское» велень хозяйствань предприятиянь паксясо вастовинек прявт агрономонть А.А.Алексин марто.
– Мон предприятиясонть важодян 2016 иестэ саезь, – ёвтни прявт агрономось Андрей Александрович. – Яровойтнень видинек 500 гектарт. Те тевентень покш мель явсь А.Н.Коробков трактористэсь. Видьмекстнэнь усксесть Ф.В.Наумкин, И.В.Усанов, С.П.Паркин.
– Видьмекстнэ ульнесть элитнойть, – ёвтни прявт агрономось А.А.Алексин. – Сынст раминек «1 Мая» опытно-производственной предприятиясто, кона Кочкуровань районсо.
Прявт агрономонть А.А.Алексинэнь валонзо коряс, ламбамо якстерькаенть видемстэ парсте тевензэ топавтсь А.Н.Акимов трактористэсь.
Моданть ламбамо якстерькаенть алов анокстасть О.А.Наумкин, А.С.Авторин, Н.В.Парчайкин.
Тесэ а кода а ледстямс сетнень, кить усксесть видьмекстнэнь. Ютксост А.П.Акимов, Н.Г.Арзамаскин. Удобрениянть усксесть В.И.Акимов, В.Е.Потекаев.
– Неть читнестэ пиземетнень лангс апак вано, минь весементь тейтяно тундонь роботатнень шкастонзо прядомга. Ды минь тень тейсынек, – меельцекс мерсь прявт агрономось А.А.Алексин.
Апак кавтолдо мертяно, «Ремезенское» велень хозяйствань предприятиясо важодицятне валост кирдить. Лисни, сень, мезе арсить топавтомс велесэ важодицятне, тейсызь.
…Ютыть зярыя чить ды паксятнесэ видемась прядови. Велень трудий ломантне аламос таргасызь оймест. Ансяк аграрийтнень тевест а прядовить.

Пётр ЗИНОВЬЕВ. Фототне Э.Ретунскоень
Чаунзань район
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».