Пятница, марта 29, 2024
Важное
Мордовиянь Прявтось Артём Здунов ульнесь кенярксчинь промкссонть, конась алтазель Велень хозяйствань ды перерабатывающей промышленностень важодицянь чинтень. Вастовомась ютавтовсь Республикань Кудонь Покш залсонть санитарно-эпидемиологиянь вешематнень топавтозь.


Кенярксчинтень видеоконференциянть вельде вейсэндявсть республикань весе районтнэ, тосо студиятнес пурнавсть аграрной отраслянь важодицятне. Мордовиянь Прявтось лембестэ пшкадсь пурнавозтненень, сынст вельде – региононь АПК-нь весе важодицятненень.

«Минек республикань агропромышленной комплексэнь мельвановикс важодицят! Течи пек покш кенярксчи. Арсян, кшинть ды моданть марто важодицятнень кенярксчись – те обществанть юрозо. Мереви сёрмадомс программа, мереви важодемс производствань аравтлувтнень коряс, ансяк эрьва чистэ минь стятано ды арсетяно, кода андомс минек семиятнень, кода андомс обществанть, – тешкстызе Артём Алексеевич. – Сюкпря Пазонтень, улить ломанть, кить аволь ансяк сынсь важодить те тевсэнть, истя жо кастыть покш династият, сынь кадовить отраслясонть, ковгак а туить, важодить моданть лангсо, виевгавтыть эсь бизнесэнть. Минек туртов те – Пазонь лезкс, Мордовиясо теезь истямо лув».

А. А. Здунов тешкстызе, те иень аволь шожда, коське сезонстонть республикасонть пурназь аволь берянь урожай. Свалшкань касома невти ракшань кастомань отраслясь. «Мордовиясь масторонь келес васенце алонь производстванть коряс. Тедеде лисинек Россиясо васенце таркас ловсонь производстванть коряс, – мерсь республикань Прявтось. – Зярыя од проектт топавтовить Дубенкань районсо, те лезды лисемс васенце таркатнес ловсонь производстванть коряс». Сон тешкстынзе изнявкстнэнь, конат саезь переработкань отраслясонть. Истя, Равчирень федеральной округсонть нолдавиця колбасань теевкстнэнь эйстэ Мордовиясо тееви сынст колмоце пельксэсь. «Тепличное» предприятиясь тедеде арси пурнамс 30 тёжат тоннат эмежть, виевгавтови цецятнень кастомась Кадошкинань районсо.
Мордовиянь Прявтось истя жо кортась экспортонть коряс. «Истят тевть путы Россиянь Правительствась. Тешкстаса, 32 мастортнэ важодить Мордовиянть марто. Те истя жо покш невтевкс. Тешкстаса «Атяшевский» МПК-нть, конась иенть перть 20-ксть кастынзе экспортонь продукциянь покшолматнень, «Чамзинская» птицефабрикась – кавксть. Экспортонть коряс эрязасто важодить «Саранский» консервань заводось, «МордовАлкоПром» ды «Рузово» предприятиятне», – мерсь сон.

Тедеде республикасонть ушодозь покш важодема ярсамопелень кластерэнь тееманть коряс. «Минь важодтяно федеральной уровенень научной организациятнень марто. Науканть, производственниктнень марто вейсэ эряви саемс те рынканть. Покш тев, ансяк сонтемензэ стака ули эскелямс икелев. Конкуренциясь касы», – мерсь Артём Здунов.

Тедеде омбо мастортнэс арсеви пачтямс 67 тёжат тоннат велень хозяйствань продукция (35 млн США-нь долларонь питнесэ). «Миненек кармавтозь лисемс 60 млн США-нь долларонь невтевксэнтень, тевесь аволь сеньсэ – а миемань рынкатнесэ, ярмактнесэ, конат сыть республикав, конатнень мереви ютавтомс ломантнень эрямост вадрялгавтоманть туртов, – тешкстызе Мордовиянь Прявтось. – Покш тевесь – велень ломантнень эрямост вадрялгавтомась. Минь важодтяно ламот проекттнэсэ. Кемтяно бизнесэнь социальной лезксэнть лангс. Мон свалшкане сонзэ неян. Сеть ярмактне, конат пачтявить федеральной центрасто, конатнень яви республикань бюджетэсь, нама, а сатыть. Тесэ эряви велень хозяйствань товаронь производительтнень, минек производственниктнень лавтовост. Од куротнева ютамсто, од кудотнень ванномсто, программатнень неезь, ёвтан тенк покш сюкпря! Кеман, эрьвась эйстэнк теи покш путовкс!»
Артём Алексеевич кармавтсь поладомс велень льготань ипотекань программанть.

Мордовиянь Прявтось истя жо явсь мель органической анокставкстнэнь ды удобрениятнень производстванть лангс. «Минек ули Россиянь Президентэнть кармавтомазо, ды Мордовиясь кочказь органической продуктатнень производствань куншкакурокс. Эряви топавтомс те аволь шожда тевенть. Вейсэ минь тень тейсынек!» – тешкстызе сон.

Артём Здунов истя жо ледстясь хозяйствованиянь вишка форматнень кастомадост-кепетемадост.
Кенярксчинь вастовоманть лувсо отраслянь важодицятненень явшевсть государственной казнеть.

Мордовия Республикань Прявтонть Указонзо коряс Славань I степенень орденсэ казезь Сиушов Сергей Иванович – Чаунзань муниципальной райононь «Чамзинская» птицефабрикань генеральной директорось.

Славань II степенень орденсэ казезь Сидоров Евгений Николаевич – «МордовАлкоПром» ООО-нь генеральной директорось.

Славань II степенень орденсэ казезь Ютяев Николай Всеволодович – Ромодановань муниципальной райононь «Общество с ограниченной ответственностью «Мордовское агропромышленное объединение и компания» кемема лангсо товариществань управляющеесь.

Славань III степенень орденсэ казезь Декасова Любовь Юльевна – Чаунзань муниципальной райононь «Чамзинская» птицефабрикань бройлерэнь инкубациянь цехень технологось.

Славань III степенень орденсэ казезь Новичков Пётр Иванович – Рузаевкань муниципальной райононь «Агросоюз» ООО-нь трактористэсь. Славань III степенень орденсэ казезь Овечкин Михаил Александрович – Рузаевкань муниципальной райононь «Авангард» ООО-нь прявтось.

Славань III степенень орденсэ казезь Резчикова Александра Кузьминична – Темниковань райононь Козловка велень КФХ-нь прявтось.

Славань III степенень орденсэ казезь Салмов Николай Геннадьевич – «Саранский элеватор» ООО-нь прявтось.

Велень хозяйствань важодицятненень поздоровт истя жо ёвтасть МР-нь Госсобраниянь Председателесь Владимир Чибиркин, МР-нь Правительствань Председателесь Владимир Сидоров, МР-нь Велень хозяйствань ды продовольствиянь министрась Александр Кечайкин.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».