Четверг, марта 28, 2024
Важное

 

…Отяжелень райононьТрокскужо велесь ашти мазыйдеяк мазый таркасо. Пандо прясо. Велесь, бути истя можна меремс, ваясь чувто потс. Тосонь пижелдыця паксятне седеяк мазылгавтыть пертьпельксэнть. Малаванзо чуди Нуя леесь. Сон аволь покш, берёконзо истя жо  чувто ды куракш потсот. Трокскужосо ули Казанской церькова, конась стявтозель  1890 иестэ. Сон ашти пандо прясо  ды ловови веленть мазылгавтыцякс. Ине Отечественной войнасо чавовозь солдаттнэнь ледстнемга велесэнть стявтозь кеврунго.

 

Самай тесэ, 1963 иестэ чачсь Николай Слугин. Эсь ульцянь ялгатнень-оятнень марто кизна чинь -чоп пансесть осканть, тельня ардтнесть сокссо. Шкась ливтязь ливтясь.

… 1980 ие. Николай Слугиннэнь макссть средней школань прядомадо аттестат. Косо поладомс тонавтнеманть? Те кевкстемась сонзэ эзь талновто. Зярс арсесь, кодамо тев кочкамс, эзь марявояк, кода сась шкась  туемс армияв. Николай Слугин служась Германиясо. Тесэ ялгакс теевсь Орданьбуень райононь Каласева велень од цёранть Николай Николаевич Тремаскин марто.

1983 иестэ, советской армиясо служамодо мейле, кавто ялгатне арсесть-тейсть ды максызь документэст Н.П.Огарев лемсэ МГУ-в.Кочкизь велень хозяйствань факультетэнть. Николай Слугинэнь мельс пек тусь агрономонь тевесь.

– Университетсэ тонавтнемстэ производственной практикам ютыя тиринь велень колхозсо, – ледстни «МАПО «Восток» предприятиянь прявт агрономось Н.И.Слугин. – Кода ней теи монь цёрам Андрей. 1988 иестэ университетэнть прядомадо мейле сынь важодеме тиринь велень Ленин лемсэ колхозов. Сестэ хозяйствань прявтокс важодсь Николай Дмитриевич Потапов. Вадряль ломанесь. Сон тонавтсь аволь эсь тевсэнть пиеме-паломо, истя жо ломань марто кель-валонь муемс. Ломань лангс вайгель зярдояк эзь кепсе. Вейсэ арсинек сень лангсо, штобу эрьва гектарось хозяйствантень кандоволь сюпавчи.

Сестэ Ленин лемсэ колхозонть моданзо ульнесть 2360 гектарт. Лангсост кастсть сюро, силосокс кукуруза, мушко. Эрьва иестэ сюро сайнесть пек ламо. Эрьва гектарсто – 20 центнерт. Се шкасто те а берянель.

– 2007 иестэ, зярдо теезель «МАПО «Восток» велень хозяйствань предприятиясь, ютынь важодеме Ламбаськев. Куш Ламбаське велень модатнень содылинь, ялатеке савсь эште сынст тонавтнемс.

Прявт агрономонть Н.И.Слугинэнь валонзо коряс, течи «МАПО «Восток» велень хозяйствань предприятиянть мельга кемекстазь 19 тёжат 500 гектарт мода. Тезэнь совить аволь ансяк Ламбаське веленть маласо велетнень модатне, истя жо шабра Ицялонь райононь зярыя велень модатне. Лангсост кастови ламбамо якстерькай, сюро, силосокс ды зёрнакс кукуруза, рапс ды истя седе тов.

– Мелят важодинек виевстэ, – ёвтни прявт агрономось Н.И.Слугин. – Истя, эрьва гектарсто саинек 522,7 центнерт ламбамо якстерькай. Весемезэ – 114 тёжат 994 тоннат. Озимой товзюро видекшнинек 1402 гектарт, эрьва гектарстонть саинек 47,1 центнер сюро, весемезэ – 6603 тоннат. Яровой товзюро видекшнинек 1520 гектарт, эрьвасто саинек 52,3 центнерт сюро. Весемезэ  пивсэзь 7 тёжат 949 тоннат.

«МАПО «Восток» велень хозяйствань предприятиянь прявт агрономонть Н.И.Слугинэнь ушодксонзо коряс хозяйствасонть полавтневить сюронь видьмекстнэ. Тедеде тунда паксятне видезельть од сортонь видьмекссэ: «Заозерский-85», «Радуга», «Гранни», «Уралосибирская», «Скипетр».

– Элитной видьмекст рамсинек «1 Мая» опытно-производственной хозяйствасто ды «Калиновская» велень хзяйствань предприятиясто, – видькстась Николай Иванович. – А мезть сёпомс, тедеде видемась а шождатнестэль. Сеедьстэ мольсть пиземеть. Сон тенек паро ладсо важодемс эзь максо. Тень кувалма мелень коряс, видемась таргавсь.

Прявт агрономось Н.И.Слугин пек шнынзе трактористтнэнь Николай Инчинэнь, Анатолий Девяткинэнь, Виктор Макаровонь, Сергей Пугачевонь, Валерий Каталовонь, Александр Киселевонь, Алексей Киринкинэнь. «Сынь оймамонь апак сода видсть хозяйствань паксятнень», – тешкстызе прявт агрономось Н.И.Слугин.

– Прявт агрономось Николай Иванович Слугин монь кеме нежем, – ёвтни «МАПО «Восток» велень хозяйствань предприятиянь прявтось А.В.Трошин. – Тундонь паксясо тевтнень топавтомсто Николай Ивановичень кабинетсэ а вастсак. Сон – паксясо, тосо, косо моли урожаенть кис бороцямось. Эзгаст чизэнзэ арды 230-250 вайгельпеть. Эрьва валске тень ёвтни седе, кода молить тевтне хозяйствасонть. Сон мезеяк а менсти: яжавсь сеялкась – сеске терди слесарть, сетнень, кить кемекстазь видемань те эли тона агрегатонть мельга. Николай Иванович паксянь алкуксонь азор.

Н.И.Слугинэнь мельспарозо, нама, цёразо Андрей. Сон тонавтни Н.П.Огарев лемсэ МГУ-нь Аграрной институтсо, магистратурасо. Кочкизе сюронь кастыцянь, агрономонь тевенть.

… Минь ламбамо якстерькаень паксясонть. Касовкстнэ кецявтыть. Сынь уш лиссть, виевгадсть.

– Арсетяно, тедедеяк гектарсто саемс малав ветесядт центнерт ламбамо якстерькай, – мерсь Н.И.Слугин.

«МАПО «Восток» велень хозяйствань предприятиясо важодицятне мезе арсить теемс – сень топавтсызь. Кавтолдомс тень коряс а эряви. Николай Иванович варма мельга валт а ёртни.

Петр Зиновьев

Отяжелень район

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».