Тесэ сокить, изыть ды видить паксятнень. Кода молить тосо тевтне, неинек эсенек сельмсэ. «ООО МАПО и К» ТНВ-нь прявтонть Н. В. Ютяевень валонзо коряс, весе, мезе эряви, сынст ули. Ней улезэ ансяк лембе ды маней.
Тесэ роботыть вадря механизаторт. Ломантне зярыя иень перть важодить эсь таркасост ды ковгак лияв а бажить туемс. Эрьва ие одкстомтови организациянть автопаркось, рамавить од тракторт ды лия оборудования. Кемить ансяк эсест лангс.
Велень хозяйствань организациясонть зярыя отделеният: Пятинасо, Вишка Березниксэ, Кочуновасо (Ромодановань район) ды Эрьмезёнкасо (Чаунзань район). Тесэ видематне ушодовсть апрелень 15-це чистэ саезь.
– Минек моданок, косо эрьва мезе видтяно, – 12 тёжат гектарт. Сынст ютксо 3 тёжат гектартнэ – озимойть. Теленть кирдизь парсте. Минь сынст тунда «андынек» удобрениядо. Яровойтнеде видтяно 2 тёжат гектарт шуж, 360 гектарт товзюро, 300 гектарт веиень тикше, 2 тёжат гектарт ламбамо якстерькай, 1200 гектарт кукуруза ды 2 тёжат гектарт ламо иень тикше. Эрявикс техниканок ули. Мелят раминек од комбайнат, тедеде – К-525 кавто тракторт, – ёвтни прявт агрономось Николай Арсентьевич Сараев.
Шкань апак сатстне, сыргинек паксяв, важодицятнень ваксс. Александр Александрович Потапов весе пингензэ перть, 32 иеть, важоди тесэ трактористэкс-механизаторокс. Чачсь теске, Лыковщинасо. Сась тей сеске школань прядомадо мейле. Армиясо служамодо мейле поладызе важодеманзо моданть лангсо.
– Тедеде тундось эзь капша курок само. Лисинек лия иетнень коряс седе позда. Тевтнень жо кенеринек тееме весе. Видинек клевер, люцерна, яровой товзюро, шуж, кснав ды, нама, ламбамо якстерькай. Минек туртов ней – сехте пси шка, – пачтясь А. А. Потапов.
Сонзэ марто тесэ лездыцякс важоди цёразояк. Владиславнень 17 иеть. Тонавтни Саранскоень автомеханической колледжсэ «Автомеханик» специальностенть коряс. Сон эрьва ие тесэ важоди, кизна лезды комбайнасо нуеме. Тедеде васенцеде невти прянзо сокамонь-видемань тевтнесэ. Валонзо коряс, пек тукшны мелезэнзэ паксясо важодемась. Тесэ сонзэ туртов тонавтнемаяк, практикаяк.
Алексей Михайлович Осипов истя жо тескень, Пятинань. Роботы трактористэкс.
– Паксятнесэ сокатано, видтяно, изатано. Важодемань чись ушодови валскень кото чассто саезь ды чокшнень кото часос. Мейле полавтсамизь лия сменась. Чинь ды вень перть изатано 120 гектарт мода. Эсь тевенек вечксынек, важодтяно мельспаросо, – ёвтнесь А. М. Осипов.
Татьяна Маторкина
Фототне: Э.Ретунский