Сундерьковонь 16-це чистэ Мордовиянь Прявтось Владимир Волков содавтызе «Октябрьская» Агрофирманть, косо ульнесь торжественной промкссонть, кона алтавсь предприятиянь 40 иетненень ды Велень хозяйствасо ды перерабатывающей промышленностьсэ важодицянь чинтень. Кенярксчинь мероприятиясь пурназель Покш Елховка велень Культурань кудосонть.
Республикань Прявтось ёвтась сюкпря Агрофирмань коллективентень вадря важодеманть кисэ, сынст вельде предприятиясь вана уш зярыя иетнень перть республикасонть ловови сехте вадрякс. «Октябрьская» Агрофирманть минь свал аравттано невтемакс весемесэ: эсь тевенть вадрясто топавтомасо, од технологиятнень тевс нолдамосо, производстванть диверсификациясонть, нолдавиця продукциянть покшолматнень коряс, – мерсь Владимир Волков. – Агрофирмась теевсь агропромышленной покштояк покш комплексэкс. Неень шкань весе од технологиятне, конат нолдавить Европасо, неявить тесэ».
Башка сюкпря Мордовиянь Прявтось ёвтась предприятиянь прявтонтень Иван Андиннэнь. «Иван Семёнович домкасто содасы эсь тевензэ. Теньстэ предприятиянть икелев молемаськак», – тешкстызе Владимир Волков.
Икеле чистэнть торжественной промкссонть, кона алтавсь Велень хозяйствасо ды перерабатывающей промышленностьсэ важодицянь чинтень, региононь Прявтось Иван Андинэнь казизе «Аграрная слава» Мордовия Республикань Прявтонь почётонь призсэнть республикань агропромышленной комплексэнь социально-экономической потенциалонть кепедеманть кисэ. Славань III-це степенень Орденсэ тешкставсь «Октябрьская» Агрофирмань генеральной директоронь васенце полавтыцясь Александр Андин.
Агрофирманть важодемазо алкукс редявикс. Иван Андин ёвтась истят невтевкст: 1985 иестэ саезь сывелень нолдамонь покшолматне кассть 22-ксть, алонь – 26-ксть, ловсонь – 29-ксть, сюронь – 106-ксть, миезь продукциянь покшолматне – 738-ксть. Производстванть кастомга меельце кеветее иетнень перть ютавтозь 11 миллиард целковойть. Агрофирмась а саекшни кредитэнь ярмакт, производстванть вадрялгавтомс сон ютавты эсь прибыленть. Меельце иетнень перть теезь ды одкстомтозь аволь вейке кементь корпуст ды цехть, эрязасто тевс нолдавить инвестициянь проекттнэ, ярмактнень покш пельксэсь ютавтови зарплататнень кастомантень. Течи предприятиясонть сон косо-бути 43 тёжат.
Предприятиянь коллективентень поздоровонь ёвтамо истя жо сакшность МР-нь Правительствань Председателень васенце полавтыцясь – Велень хозяйствань ды продовольствиянь министрась Владимир Сидоров ды Лямбирень райононь прявтось Юрий Голов.