Пятница, марта 29, 2024
Важное

Цифровой экономикась

«Цифровая экономика» национальной проектэнть юрсо минек республикасо тевс нолдавить «Информационная инфраструктура» ды «Информационная безопасность» региональной проекттнэ. Истя, «Цифровая экономика» нацпроектэнть прявт тевезэ – информациянь ванстомань, максомань неень шкань инфраструктурань теемась. Тесэ мель явови конкуренциянь кирдиця эсенек теевкстнэнень.

 

Проектэнть лувсо 2021 иентень Мордовия Республикань социальной весе эрявикс объекттнэ ды властень органтнэ совавтовить Интернетэнь неень шкань сетентень. Маласо иетнень перть проектэнть юрсо покш робота Интернетэнь связенть ветямонзо коряс арсеви велетнесэ, штобу вейкеяк социальной учреждения аволь лиядо. Теке марто одкстомтови максоматнень ванстомань региональной куншкакурось, ды информациянь систематне ды ресурстнэ пурнавить вейке платформас. Те лезды вишкалгавтомс ярмаконь ютавтоманть кирдеманть ды тевс нолдамонть коряс ды седе вадрялгавтсы Мордовиянь электронной правительствань инфраструктуранть.

Проектэнть тевс нолдамонзо лангс явовить 7 миллионт целковойть.

«Информационная безопасность» региональной проектэнть прявт тевезэ – информациянь сэтьмечинть топавтомась, конань юрсо ванстовить ломантнень, бизнесэнть ды государстванть максоматне.

Те проектэнть юрсо арсеви анокстамс ды тонавтомс госвластень органонь важодицятнень информациянь ванстомань кевкстематнень коряс. 2020 иестэ информационной безопасностень тонавтомань программатнень коряс высшей ды средней профессиональной образованиянь учреждениятнесэ анокставить 38 ломанть, 2021 иестэ – 46.

Истя, проектэнть тевс нолдамонть юрсо топавтови информационной ресурстнэнь ванстомась, конась тевс нолдави электронной документтнэнь марто важодемасонть, эрицятненень государственной ды муниципальной электронной услугатнень максомасонть, персональной максоматнень ванномасонть.

 

Демографиянь кевкстемась ашти прявтокс

«Демография» нацпроектэнть юрсо Мордовиясо тевс нолдави «Финансовая поддержка семей при рождении детей» региональной проектэсь. Сонзэ лувсо ярмаконь лезкс максови семиятненень, косо чачить эйкакшт. Истя жо истят семиятненень максови лезкс эрямо таркань рамамс. Проектэнть юрсо башка мель явови медицинань лезксэнь максомань кевкстематнененьгак ды ули программа, конань коряс аватненень мереви ютамс ЭКО-нь процедуранть (обязательной медицинской страхованиянь программань ярмактнень лангс).

Неть мероприятиятнень тевс нолдамось лезды седе кастомс семиятнень доходост ды вадрялгавтомс демографиянь тевтненьгак. Истя, республикасонть эйкакштнень чачомань коэффициентэсь 1,279 (2019 иесь) касы 1,360 2024 иестэ.

 

Велень эрицятнень эрямост вадрялгавтомга

Те иестэнть Кочкуровань райононь куншкакуросонть «Формирование комфортной городской среды» региональной проектэнть юрсо куншкакуронть вадрялгавтоманть туртов федеральной, республиканской ды районной бюджеттнэстэ явозь 477 тёжат целковойть. Ярмактне ютавтовсть Школьной куронь 14-це, 59-це ды 61-це №№ кудотнень малава тарканть вадрялгавтомантень. Подъездтнэнь икельга площадкатне ацазь асфальтсо, куронть валдомтомга ладязь фонарть.

Ды, кадык тедедень тевтне зярс апак прядо, райононь Администрациясь уш арси тевть сы иентень. Истя, 2020 иестэ кемекстазь вадрялгавтомс теке куронь 10-це ды 12-це №№ кудотнень перька тарканть ды Кочкурова велень парконть. Парконть коряс ванновить эрицятнень пельде весе кармавтоматне. Неть читнестэ тень коряс ютавтовсь вастовома, кунсоловсть весе мельтне-арсематне.

 

«Точка роста» центрась –

Козловкань

школасонть

«Образование» нацпроектэнь «Современная школа» региональной проектэнть юрсо Отяжелень райононь Козловкань средней школасо ушодызе важодеманзо «Точка роста» цифровой ды гуманитарной профилень тонавтомань центрась. Проектэсь арсезь сень туртов, штобу а улевельть явомат ошонь ды велень школатнень ютксо.

«Точка роста» – те колмо предметтнэнь домка тонавтомась: ОБЖ-нть, технологиянть ды информатиканть. Технической ёнкстнэнь келейгавтомга школантень явовсь неень шкань эрявикс оборудования: компьютерт, интерактивной комплекс, планшетт, фотоаппарат, виртуальной реальностень сельмукшт ды шлем, 3D-принтер, квадрокоптерт. Истя жо весе эрявикс оборудованиясь технологиянть ды ОБЖ-нть туртов.

Центрасонть важодеманть туртов школань тонавтыцятне ютасть эрявикс курсат.

 

Фермертнэнень лездамга

«Малое и среднее предпринимательство и поддержка индивидуальной предпринимательской инициативы» нацпроектэнь региональной проекттнэстэ вейкекс ашти «Создание системы поддержки фермеров и развитие сельской кооперации» проектэсь. Темниковань районсо сонзэ участникекс кармасть кавто фермерт – Ш.Ш.Поздняков (Русско-Караевской велень поселениясь) ды С.И.Турнаев (Бабеевской велень поселениясь). Сынь вадрясто ютызь пелькстамонть ды эрьвантень максовсть 3 миллионт целковойть эсь хозяйстватнень кастоманть-вадрялгавтоманть туртов.

Ш.Ш.Поздняковонь уш улить11 гектармоданзо, арси рамамс оштё 54 гектарт. Тень лангс улить эсензэ ярмаконзо (40 %). Бизнес-планонть коряс, эрьва ие фермерэсь алты нолдамс 63 центнерт сывель ды пандомс бюджетс 20 тёжат целковойть. Ды эрьва ие неть цифратнень карми кастомо.

«Грантонь ярмактнень лангс арсян теемс лишметнень туртов ферма, лато марто калда ды тикшень туртов тарка. Ули мелем эсь ярмак лангс рамамс оштё комсь лишметь», – тешксты Ш.Ш.Поздняков.

С.И.Турнаев явозь ярмактнень лангс арси трямс сывелекс скалт ды букат. Васняяк рами комсьветее прят ракшат. Эсь ярмак лангс уш строясь ракшань кирдемань тарка. Хозяйстванть кастомга-виевгавтомга сонзэ улить 186 гектарт моданзо, ракшань кирдемань кардонзо, сюронь ванстома складозо ды весе эрявикс техникась. Азорось арси виевгавтомс райононь велень хозяйстванть – теемс ракшань трямонь-кирдемань ферма, панжомс важодемань од таркат, кастомс продукциянь ламочинть ды вадрячинть.

 

  Анокстызе

 Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».