Пятница, февраля 07, 2025
Важное

Январень 17-це чистэ Мордовиянь Технопарксо ютась Мордовия Республикань фермертнэнь II инекужось. Сонзэ важодемасо ульнесть Мордовиянь Прявтось Артём Здунов, региононь весе ведомстватнень ды агропромышленной комплексэнь учреждениятнень, районтнэнь администрациятнень ды хозяйствованиянь вишка форматнень представительтне.

 Инекужонть панжомсто МР-нь велень хозяйствань ды продовольствиянь министрась Антон Илюшкин тешкстызе, мероприятиясь кармась паро коекс. Бути мелят участниктнеде ульнесть сядодо аволь седе ламо, тедеде – малав 170. «Инекужонтень мелень явомась эрьва ие касы – те невти, ютавттано сонзэ аволь стяко!» – тешкстызе министрась ды ёвтась сюкпря региононь Прявтонтень АПК-нтень весемеёндонь лезксэнь явоманть кисэ.

Артём Здунов шумбракстнемань валсонзо тешкстызе, Мордовиясо хозяйствованиянь вишка форматне нолдыть 15 % велень хозяйствань валовой продуктанть эйстэ – те покш невтевкс.

 

«Мелявтовты вейкесь – минь нетяно хозяйствованиянь вишка форматнень ды целанек велень эрицятнень ламочинть киртямонть. Секскак, велентень, кода масторонь ярсамопелень безопасностень юронтень, лезксэнь явомань эрявиксчись пек покш», – тешкстызе Мордовиянь Прявтось.

 

Яволявтозь республикань бюджетстэ лездамонь зярыя тевтнеде, конат аравтозь велень эрицятнень туртов. Те скалонь рамамс ЛПХ-нь субсидиясь. Явовить 80 тёжат целковойть велень хозяйствань предприятиянть кедьстэ вейке скалонть рамамс, бути субсидиянь получамонь иестэнть семиясонть чачсь эйкакш, сестэ рамицянтень велявтови весе суммась. Те лезды ванстомс сюракшов ракшатнень ды лездамс ЛПХ-тненень.

 

Региононь руководителесь тешкстызе: «Чачтоматнень кастомась – минек прявт тевесь. Секскак улить ваннозь фермерэнь семиятненень лездамонь ёнкстнэ. Эдь самай велетнесэ сеедьстэ вастневить ламо эйкакшонь триця семият, ды те велень юр».

 

Истя жо анокставить лездамонь программат мекшень кирдицятненень – те производстванть ды мекштнень микшнеманть лангс ютавтовкстнэнь зярыя пельксэнть велявтомась.
Артём Здунов кортась раськеютконь вейсэнь важодемадонть, истя, Беларусь Республиканть марто. Сон тешкстызе, Белоруссиянь коллегатнень марто вейсэнь тевтееманть эряви виевгавтомс. «Бути минь кирдтяно ояксчинь сюлмот, сестэ алкукс кирдтяно неть сюлмотнень! Карматано топавтомо ратной тевтнень, кирдеме вейке-вейкень ды топавтомо весе максозь алтамотнень. Минь арсетяно изнявкст братской народонтень ды кирдьсынек Александр Григорьевич Лукашенконь масторонь Президентэнь таркантень сыця кочкамотнесэ», – мерсь Мордовиянь Прявтось.

 

Отраслянть икеле аштиця прявт тевтнень ютксо республикань руководителесь тешкстызе потребкооперациянть, агротуризманть ды Компетенциятнень куншкакуронть важодеманзо виевгавтоманть, СВО-нь ветерантнэнень ды сынст семиятненень важодема таркатнень максоманть – сынст туртов ней анокстазь федеральной грантонь башка лезксэсь.

 

Россиянь Госдумань депутатось, Аграрной кевкстематнень коряс комитетэнь председателень полавтыцясь Юлия Оглоблина тешкстызе, велень хозяйствасо важодемась сехте стака, ансяк сехте вадря. Видеосвязенть вельде сон ёвтнесь АПК-нь ёнкссо законодательствань одкстомтомадо, конась токши тевтеме аштиця модатнень тевс нолдамонть, велень хозяйствань туртов кадратнень анокстамонть, профориентациянь туртов агрокласстнэнь тееманть ды эрьва кодамо уровенень тонавтомань учреждениятнесэ условиятнень вадрялгавтоманть.

 

«Лездамонь од тевтне, конатнеде яволявтсь Артём Алексеевич, пек эрявить. Истямо робота икеле зярдояк арасель, ды те топавтовсь республикань экономикань шумбралгавтомань коряс региононь Прявтонь командань важодеманть вельде, – мерсь Юлия Оглоблина ды пшкадсь аграрийтненень. – Покш сюкпря республикань агропромышленной комплексэнь весе важодицятненень тынк аволь шожда тевтнень кисэ».

 

Мордовиянь Правительствань Председателень полавтыцясь Раиса Цыбизова кармавтсь региононь фермертнэнень эрязасто нолдамс тевс лездамонь од ёнкстнэнь: «Самай тынь нолдатадо продуктат, конатне пек эрявить, вансттадо велесэ эрямонь башка лувонть. Минек фермертнэ ней максыть малав 1200 важодема таркат. Кеман, вейсэнь вийтнень вельде минек весемесь лиси».

 

Прявт тевесь, конась ашти ней республиканть икеле, – Фермерэнь хозяйстватнень ассоциациянь теемась. Те важодемадонть ёвтнесь Компетенциятнень куншкакуронь прявтось Сергей Шевяхов.
Фермерэнь хозяйствань ветямонь эсь опыттэнть ёвтнесть республикань аграрийтне. Александр Малов сась эрямо Покш Березникень районов ошсто ды кармась ловсонь ракшань кирдеме. «Агростартапонь» грантонь получамсто ушодызе эсь кинть кода крестьянско-фермерской хозяйства. Ней тосо 25 скалт.
«Монень лездась се, Мордовиясо пек виев АПК-сь. Мон ваннынь республикасонть, ды натой сонзэ томбале, весе производстватнень опытэнть. Арсян, минек важодемань икелепелень невтевкстнэ ды таштазь опытэсь – вадрят! 2025 иестэ арсян лисемс проектэнь весе вийтнес», – мерсь Александр Малов.

 

Рузаевкань районсто Михаил Овчинников касты ягодань культурат. «Агростартапонь» грантонть вельде арси келейгавтомс тевенть. Ёвтась мель анокстамс тонавтомань турт эйкакштнень туртов эрьва кодамо ёнкссо важодиця фермерэнь хозяйстватнева.

 

Теньгушевасто «Союз-Агро» велень хозяйствань кооперативесь – республикасонть сехте вадрятнень ютксто вейкесь. Сонзэ представителесь Евгений Тепаев ёвтнесь, кода чачсь кооперативесь, истя жо сывелень скалонь кирдемань хозяйствадонзо.
Дубёнкань районсто Фёдор Волченков кирди мекшть. Сынст марто важоди весе эрямонзо перть – 1989 иестэ саезь. Ламо иень перть кодаткак мелявкст арасельть, 2019 иестэ саезь те отраслясь ёмамо лангсо, ды ламосо те сюлмавозь сюротнень-касовкстнэнь пестицидсэ валноманть марто.

 

«Мекшень кирдицятне парсте содыть, велень хозяйствань предприятиятнесэ важодицятнененьгак эряви чарькодемс, урожайностесь касы мекштнень важодеманть эйстэ, – тешксты Фёдор Алексеевич. – Истя жо парсте содатано, мекштне – экологиянь пелькс».

 

Эсь тевенть Фёдор Волченков ушодызе зярыя нешкестэ. Те тевсэнть котьмась ялгазо. Кода-бути цёрась понгсь сонзэ нешкепирес, весемесь истя вечкевсь. Сонськак арсизе варчамс. «Бути ломанесь карми кирдеме мекшть, те весе эрямос. Ды зярдо мекштне истожавить, тонськак ормалгадат», – корты мекшень кирдицясь.
Покш Березникстэ Александр Максимов истя жо нешкепирень азор. Александр Николаевич те тевсэнть 1986 иестэ саезь, зярс-бути роботась республикань Пчелконторасо. Мейле ютась лия роботас, рамась мекшень вейке рой ды теньстэ ушодовсь эрямонь тевесь.
Эряви ёвтамс, Максимовтнень весе кудораськест кирдсть мекшть. Весемесь ушодовсь эштё покштянзо покштястонть. Ней Максимовтнень цела производственной нешкепире, косо весемесь теезь технологиятнень кирдезь ды ули весе эрявикс оборудованиясь. Александр Николаевичнень мекштнень марто важодемасонть лездыть Владимир ды Артём цёранзо, Андрей нуцьказо ды Екатерина Фроловна низэ.

 

Максимовтнень, нешкепирень кирдемадо башка, сядодо ламо гектарт модаст, конатнень лангс виднить сюро.
Мекшень кирдицятне истят промкстнэнь эйстэ учить невтевкст, лездамонь программат. Ды кода уш седе вере тешкстынек, тедеде истямо программа нолдавсь тевс.

 

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».