Среда, февраля 28, 2024
Важное

Ноябрянь 14-це чистэ поздоровт ёвтасть велень хозяйствань ды перерабатывающей промышленностень важодицятненень. Тедеде республикань аграрийтненень тагояк удалась саемс покш ды редявикс невтевкст.



Мордовиясо пурназь 2 миллиондо ламо тоннат сюро – те исторической цётавкс ды сехте вадря невтевкс ПФО-нь регионтнэнь ютксо. Эштё зярдояк республикань паксятнестэ эзть пурнакшно истямо покш норов!
Тедеде «Сырнень сёксь – 2023» Весероссиянь агропромышленной выставкасонть республикань аграрийтне сайсть 31 казне. Сынст ютксто 25-тне – сырнень. Эрьва медалесь – те покштояк покш важодема, эсь тевентень вечкема, велень вельмевтемантень ды аграрной койтнень-кирдатнень ламолгавтомантень бажамо.
«Минь содатано, мода лангсо важодиця ломанесь ульнесь ды кадови обществань юрокс, сонзэ виекс ды питнейчикс. Масторонть туртов стака шкатнестэ – сонзэ нежекс. Сюкпря весенень, кие важоди паксятнесэ, велесэ, ферматнесэ, перерабатывающей промышленностень предприятиятнесэ. Сюкпря тынк важодеманть, тиринь масторонтень вечкеманть, эсь семиятнень, Мордовиянть, минек покш масторонть лезэс важодеме маштоманть ды бажамонть кисэ! Самай тынк вийтнень вельде Мордовиянь АПК-сь пек полавтовсь, кармась алкуксокс конкуренциянь кирдицякс, высокотехнологичноекс. Башка сюкпря аграрийтненень, конат свалшкане примить участия военнослужащейтненень ды од регионтнэнь эрицятненень гуманитарной лезксэнь кучомасонть. Минек боецтнэ а кирдить кодаткак стакачить. Ды те целанек тынк путовксось», – тешкстызе Мордовиянь Прявтось Артём Здунов.

Течи Мордовиянь товартнэ улить аволь ансяк Таможенной союзонь лавкатнесэ, истя жо Азиянь, арабонь мастортнэсэ. Республикань аграрийтнень вельде ладяви вейсэнь важодема Китаенть, Беларусенть, БРИКС-нь мастортнэнь ды СНГ-нть марто. Истя жо сюлмот ладявить Херсонской областенть ды подшефной Каланчакской округонть марто. Тесэ уш микшнить минек продуктатнень, конатне вечкевить эрицятненень.

Мордовиянь аграрийтненень поздоровт ёвтасть Российской Федерациянь Федеральной Собраниянь Государственной Думань Аграрной кевкстематнень коряс комитетэнь председателень полавтыцясь Юлия Оглоблина ды Россиянь Велень хозяйствань министерствань Велень территориятнень виевгавтомань департаментэнь прявтонь полавтыцясь Виталий Платонов. Сон ловнызе РФ-нь велень хозяйствань министрань васенце полавтыцянть Оксана Лутонь пшкадеманзо:

«Мордовиянь агропромышленной комплексэсь теи покш путовкс Россиянь продовольствиянь безопасностень топавтомантень. Тедеде, весе стакачитнень лангс апак вано, республикань аграрийтне эштё весть невтизь покш профессионализмаст, топавтызь отраслянь свалшкань важодеманть ды кастызь весе прявт ёнкстнэнь коряс производствань покшолматнень. Сюкпря тынк важодеманть ды вадря невтевкстнэнь кисэ!»

Эряви тешкстамс, Мордовиясь целанек топавты внутренней рынканть продуктатнень прявт видтнэнь коряс.
Кенярксчинь промкссонть отраслянь сехте вадря важодицятненень максовсть государственной наградат. Аграрийтнень тешкстасть цела семиянек. Семиянь ферматнень ютксо изницякс кармась Ицялонь районсто Валерий Сидоровонь фермась, сонзэ хозяйствасонть 78 сюракшов ракшат. Нинзэ марто сынь кастыть 11 эйкакшт. Сынь састь тетяст-аваст туртов поздоровонь ёвтамо.
Истя жо республикань агропромышленной комплексэнь виевгавтомантень покш путовксонть кисэ Мордовия Республикань Славань I степенень орденсэ казезь Темниковань муниципальной райононь «Подсобное хозяйство» ООО-нь прявтось Григорий Самолькин.

Мордовия Республикань Славань III-це степенень орденсэ казезь: Кочкуровань райононь «Норовское молоко» ООО-нь прявтось Владимир Поздняков, «Ликероводочный завод «Саранский» ООО-нь прявтось Кирилл Чапайкин, МР-нь велень хозяйствань ды продовольствиянь министрань полавтыцясь Иван Учайкин ды лиятне.
Истя жо велень хозяйствань ёнкссо вадря важодеманть кисэ башка номинациясо тешкставсть республикань районтнэ. «Район эффективного ведения сельскохозяйственного производства» номинациясонть 2023 иестэ изницякс ёвтазь Чаунзань ды Инсаронь районтнэ. Чаунзань райононь предприятиятне тедедень вейксэ ковтнень перть анокстасть продукция 15 млрд целковойс.
Растениеводствань ёнкссонть изницякс лиссть Лямбирень, Ташто Шайговань ды Покш Березникень районтнэ. Истя, Лямбирень районось пурнась 182 тёжат тоннат сюро, гектарсто саезь 60,5 центнерт. Покш Березникень районось пурнась 109 тёжат тоннат, гектарсто – 62 центнерт.

Ламбамо якстерькаень видиця районтнэнь ютксо васенце таркасо аштить Ромодановань ды Отяжелень районтнэ. Ромодановань районсо тедеде пурназь 290 тёжат тоннат ламбамо якстерькай, гектарсто саезь 418 центнерт. Отяжелень районсо якстерькайденть пурназь 208 тёжат тоннат, урожайностесь лиссь 400 центнерт гектарсто. Вадря важодеманть кисэ дипломтне максовсть районтнэнь прявттнэнень Сергей Ведяшкиннэнь ды Константин Николаевнень.
А вана ракшатнень трямонь-кастомань ды ловсонь нолдамонь ёнкссонть изницякс лиссть Ицялонь, Дубёнкань, Рузаевкань, Кочкуровань районтнэ ды Саранск ошонь Октябрьской районось. Истя, Ицялонь районось те иестэ сайсь 46 тёжат тоннат ловсо. Вейке скалонть лангс лиссь 7 тёжат 735 килограммат.

Истя жо «За эффективное ведение сельскохозяйственного производства» номинациясонть, кинь нолдазь продукциянь покшолматне 500 миллиондо ламо целковойс, тешкстазь Ицялонь райононь «Дружба» ООО-сь. Тедедень вейксэ ковтнень перть продукциядонть анокстазь 1 млрд ламо целковойс. Вейке скалсто тесэ саеви 9 тёжат 122 килограммат ловсо.

Казезтнень ютксо истя жо «Ромодановосахар», «МПК «Атяшевский» ООО-тне, «Консервный завод «Саранский» АО-сь ды лиятне.
Эряви меремс, иенть коряс республикань велень хозяйствань предприятиятнень невтевксэст а берянть. Сехте вадрятне тешкстазь покш казнесэ, лиятненень жо ули мезе лангсо важодемс ды лисемс васенцетнень юткс сы иестэ.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».