Отяжелень райононь «Сабанчеевское» ООО-сь – велень хозяйствань кеме предприятия. Важодема таркат максы аволь ансяк Сабанцелень эрицятненень, истя жо шабра Таразбуень, Дюрькинань, Аловелень, Селищань ломантненень. Хозяйствась виевстэ важоди аволь ансяк сюротнень видемань-кастомань коряс, тесэ свалшкане ули сюракшов ракшань трямонь фермаяк, конась иестэ иес касы-виензы, важодемасо нолдавить неень шкань од технологиятне.
Кода тешкстызе «Сабанчеевское» ООО-нь прявтонь полавтыцясь Борис Николаевич Игушкин, течинь чине хозяйствасонть трявить-кирдевить 670 ламо сюракшов ракшат, сынст эйстэ 340 – потявтовиця скалт.
– Меельце иетнестэ предприятиясонть теевсть редявикс полавтомат. Васняяк тесэ ёвтама производствань одкстомтоматнень. Важодемасо келейстэ нолдавить неень шкань технологиятне, конатне тевентькак седе шождалгавтыть, ёмавкстнэньгак аламолгавтыть. Течинь чине тентеме кодаяк, – корты Борис Николаевич. – Тень эйстэ ашти целанек предприятиянть роботазо. Ды бути ломантненень теемс важодемань вадря условият, тевесь эдь овсе лиякс туи, седе парсте.
Борис Николаевичень валонзо коряс, меельце иетнестэ фермасонть рамазель потявтомань ды ловсонь ванстомань туртов од оборудования, теевсть кардот, витневсть кизэнь шкасто ракшатнень кирдема калдатне. Тесэ нейгак молить строямонь тевть. Стявтови скалонь кирдемань туртов од ферма.
МТФ-нь прявт
Павел Иванович УЧЕВАТКИН – «Сабанчеевское» велень хозяйствань предприятиянь ловсонь-товарной фермань прявт. Важоди тесэ уш зярыя иеть. Сонзэ вановт ало роботыть весемезэ ниленьгемень ломанть, кементне эйстэст – скалонь потявтыцят, эли, кода ней сынст лемдить, операторт. Истя жо улить вишка ваз мельга якицят, слесарть, ракшатнень мельга якицят.
– Мон хозяйствасонть важодян 1991 иестэ саезь, – корты Павел Иванович. – Васень шкасто комбайнасояк роботакшнынь, тракторсояк, савкшнось эсь маштомачим пилорамасояк варчамс. Мейле прявтонок Дмитрий Николаевич Игушкин кортась мартон молемс важодеме фермав, истя вана тесэ ушодыньгак.
Учеваткинэнь валонзо коряс, Д. Н. Игушкин прявтось чарькодиця ды теи весементь эсь важодицятнень лезэс. Секскак, кодамо мелявкс марто тензэ иля пшкаде, весементь куроксто решасы, весементь коряс лезды.
– Неень шкань ферматне кода а кода икеленсетнеде явовить, – тешксты МТФ-нь прявтось. – Икеле фермасо важодемась стакадояк стакаль. Скалонь потявтыцятненень эдь малав весементь савкшнось эстест теемс. Ракшатненень коромонтькак явшильть, алксосткак нардыльть, сеедьстэ кедьсэ потявтомскак савиль. Ней жо ламось седе шождалгавтовсь.
Ды, эряви меремс, ферматнеяк ней седе пек молить кодамояк предприятия ёнов. Весе кардотнесэ-теевкстнэсэ ваньксчи, ушова тейнезь цецянь клумбат, улить асфальтсо вельтязь яннэть. Истямонть неезь, ёжоткак паролгады.
Зярдо важодемась канды кеняркс
Марина Дмитриевна ТИКШАЙКИНА «Сабанчеевское» ООО-нь фермасо важоди скалонь потявтыцякс. Авась тескень, Сабанцелень. Велень хозяйствантень алтызе весе эрямонзо. Важоди уш 37 иеть. Тевензэ вечксы. Рана валске, зярдо велень эрицятне кудонь тевтнескак кундасть эштё аволь весе, М.Д. Тикшайкина уш фермасо. Ванкшны весе-аволь ракшатне таркасост, кода анокстазь скалтнэнь потявтомань оборудованиясь, кортни мартост. Ды истя теи уш зярыя кементь иень перть.
– Мон кода школам прядыя, кода сынь колхозс роботамо, весе эрямон перть тесэ, – тешксты Марина Дмитриевна. – Скалонь потявтыцякс сестэ важодсь патям Валентина Дмитриевна Гусева. Сон яла ёвтниль фермасо важодемадонть, скалтнэде, конань кодамо обуцязо, кода вастыльть фермав сонзэ самонть. Монень те марявсь истя мельстуицякс, истя токиль седеем. Эстень сестэ кемекстынь, истя жо карман фермасо важодеме. Школасо тонавтнемстэ яла мартонзо тей сакшнылинь, ванынь, кода потявтыцятне эсь тевенть теить, рединь весементь. А мейле, ансяк школам прядыя, важодеме уш сынь.
Марина Дмитриевна тешксты, ней важодемась сынст седе шожда кармась. Содасызь ансяк эсест тевест ды топавтыть сонзэ покш мельсэ.
– Зяро иеть тесэ роботан ды зярдояк эзинь янксекшне. Эсь тевем пек вечкса. Пек парт тесэнь важодицятне. Минь весементь тейтяно вейке-вейкенень лездазь, вейке-вейкень чарькодезь. Вейсэнь тевсэ те пек эрявикс ёнкс, – тешксты Марина Тикшайкина.
Мартонзо истя жо скалонь потявтыцякс важоди Лидия Николаевна ИГНАТЬЕВА. Авась колхозонь промкомбинатсояк важодекшнесь, ве шкане аламос Саранскоев туекшнесь, варчизе ошонь эрямонть. Мельс тензэ эзь туе. Велявтсь мекев эсь тиринь велев ды кармась важодеме колхозсо. Ней уш скалонь потявтыцякс. Се шкастонть ютасть комсь иеть. Кода жо корты сонсь Лидия Николаевна, аволь ютасть, ливтязь ливтясть.
– Неть комсь иетне тень овсе эзть марявояк. Мерят, ансяк зярыя шкадо икеле сынь. А тесэ пенсияс лисема шкаськак сась, тевенть жо кадомс мелем арась. Мекс бу а роботамс, бути ули косо, бути важодемась вечкеви, – кемексты Лидия Игнатьева.
Зярдо ульнинек Сабанцелень фермасо, малавгалесь обедэнь шкась. Аватне самай састь потявтомо аволь умок вазыязь скалтнэнь. Тесэ истяттнэде лововить аволь аламо. Эряви меремс, скалонь кардосо потявтома таркась ашти аламодо башка. Ве шкасто те «каруселентень» паневить зярыя скалт ды потявтовить. Истя, аволь покшке группасо потявтовить весе.
А вана Светлана Александровна СОРОКИНАНЬ тевезэ сюлмавозь фермань сехте вишкине эрицятнень марто. Сон яки ансяк чачозь вазнэтнень мельга. Кода корты сонсь авась, роботы чачтома кудосо.
Светлана Александровнань колхозсо важодема кизэ ушодовсь овсе эйкакшпорасто. Тесэ весе пингест перть важодсть тетязо-авазо – Александр Иванович ды Мария Яковлевна Слугинтнэ. Тейтерькась, меремс, кассь фермасо. Свал яла педиль аванзо эйс, штобу мартонзо фермав саевлизе. Тонась эзь карда эйсэнзэ, аламонь-аламонь тонавтсь потявтыцянь тевентень. Велесэ истят маштомачитне свал эрявикст.
– Истя, васня авань марто лездыцякс сакшнылинь, мейле монськак карминь колхозсо роботамо скалонь потявтыцякс, – ёвтни Светлана Сорокина. – Потявтыцякс важодинь зярсыя. Мейле ютавтымизь вишка вазнэтнень мельга якамо. Тесэ вазыязь скалтнэяк кирдевить. Сынст колмоксть потявттано ды ловсонть симдтяно вазнэтненень. Вазнэтне тесэ кирдевить комсь чить, мейле сынст лияв сайсызь. Ней зярс ансяк чачозь вазтнэде тесэ аволь ламо, маласо шкастонть учови эштё 25 скалтнэнь вазыямось. Тевесь седе ламолгады.
Светлана Александровнань марто эштё важодить Мария Ивановна Бояркина ды Светлана Владимировна Сидорова. Бути вазнэтнеде ламо, роботыть колмонест вейсэ. Бути жо аволь, вейкень-вейкень.
Эсь важодемадонть С. А. Сорокина ёвтнесь истямо мельспаро марто, сельмсэнзэ натой сяткинеть редявсть. Вана косо мереват, авась алкукс эсь тевсэ. Седе ламо бу истят!
Юлия Еремина
Фототне: Эдуард РЕТУНСКИЙ