Неть читнестэ тиринь газетань корреспонденттнэ пачколесть инжекс Отяжелень районов. Ушосонть ульнесь сексень алкуксонь тарькс. Ансяк минек эзимизь тандавто ушолксонть нусманя ежозо, сыргинек ки лангов. Зярдо пачкодинек эрявикс таркантень, корреспондентэнь команданок явовсь кавтов. Монень сатотсь уцяска совамс инжекс Отяжелень райононь администрацияв, косо лембестэ вастымизь важодицятне. Истя васенцеде теевинь содавиксэкс комплексной развитиянь коряс Отяжелень райононь прявтонть полавтыцянзо Александр Иванович Серов марто. Кортнинек седе-тонадо, лиссь апокш интервью, конань вельде карминек содамо, кода эри-ашти районось ды кодат полавтомат совавтозельть сонзэ эрямос ютазь иетнень перть.
Александр Иванович васняяк евтнесь эседензэ. Церась сон руз, чачсь-кассь Покш Манадыши велесэ, конась Отяжеленть эйстэ ашти кеменьшка вайгельбень тарка. Университетэнть прядомадо мейле сон кемекстызе мелензэ кадовомс эрямо тиринь енксос ды путомс весе вийтнень райононть кастомга-виевгавтомга. Муниципалитетсэ церась важоди малав 15 иеть. Уставась роботамо внештатной специалистэкс, шкань ютазь аравтозель Отяжелень ошонь поселениянь администрациянь прявтокс, ды вана уш зярыя шка важоди комплексной развитиянь коряс райононь администрациянь прявтонь полавтыцякс. Кода тешксты Александр Иванович, сонзэ эрямосо покш тарка саи тиринь енксонть ды сонзэ эрицятнень вечкемась. Сон свал анок лездамс ломантненень. Нейгак сонзэ кабинетс совамсто неинь коридорсо аштиця ломанть, весе сынь састь лезкс мельга. Чарькодеви, Александр Иванович эрьванть кунсолосы ды, мезе вийсэнзэ, лезды.
Вете иетнень перть Отяжелень районсо тевс совавтозельть зярыя эрявикс проектт, кой-конатне райононь прявтонть Константин Николаевич Николаевень пшти вановт ало поладовить те иестэнтькак.
– 2022 иестэ «Жилье и городская среда» федеральной проектэнь «Чистая вода» нацпроектэнть лувсо Отяжеле поселкасонть витнезель-одкстомтозель ведень максомань системась. Те тевенть куватьс учость поселкань эрицятне ды, арсетяно, кадовсть мельспаросо. Седе тов «Комплексное развитие сельских территорий» проектэнть вельде Отяжелень районсо строязель Укшномань бассейнась, ветязельть ялго ютамонь янт, Отяжелень поселкасо ламо таркатнева стявтозельть эйкакшонь кото площадкат ды истя седе тов; 2023 иестэ Кулязбуесэ ды «Сараст» птицесовхозсо Лесная ульцяванть витнезельть китне, ламоквартирань кудотнень перька теезельть одкстомтомат, ды те ансяк зярыя саевкст, эдь неть иетнень перть госпрограммань ды нацпроекттнэнь вельде топавтозель седеяк покш важодема. Бути кортамс ютазь 2024 иеденть, допрок витнезель Отяжелень поселкань 1 № школась. Полавтынек потсонзо весе ули-паронть, витнезельть коммуникациятне ды истя седе тов. Тедеде иень перть ютавтовсть витнемань тевть Кулязбуень 2 № школасонть, аравтовсь видеонаблюденияяк. Икелень иетнестэ школанть вакссо аштесь велень каладозь клубось, ней сонзэ таркас стявтозь кавто вадря площадкат – эйкакшонь ды спортонь. Весе сынь теезельть вишка эрицятнень мелест топавтомга. Важодематнень ушодомадо икеле минь пурнакшнынек эйкакштнень ды ютавтынек соцопросонь кондямо, конань вельде карминек содамо, мезе а сатны Кулязбуе велень школанть вакссо. Ней сельметь кенярдовтыть неть кавто площадкатне ды хоккейсэ налксемань одкстомтозь кортось. Эдь республиканть келес содыть, кода Кулязбуень эрицятне вечкить хоккейсэ налксеме. Меельце шкасто теевсь коекс налксемс Орозбиень понань кемсэ. Малав уш кеменьшка иеть минек районсо ютавтневить В.Г. Шуваловонь лемензэ ледстнемга хоккейсэ налксемань турнирт. Теде башка, «Инфраструктура для жизни» федеральной проектэнть «Формирование комфортной городской среды» нацпроектэнть лувсо Кулязбуень школанть эйстэ саезь Большевистская ульцянть видьс теезь ялго ютамонь ян, – евтни Александр Иванович.
Истя жо Александр Серов евтнесь, кодамо покш тев сынь тейсть «Сараст» птицесовхозонть маласо тарканть ванськавтоманзо коряс, тосо ульнесь пингень шукшпря. Сонзэ урядамга сиведезельть техника, ломанть, ютавтозельть ламо ярмакт, конатнень иенть ушодомсто арсесть ютавтомс лия тевс, ансяк лиссь лиякс. Полигонстонть ускозель малав 350 шукшонь тоннат. Мезе апарось – эрицятне аволь свал чарькодить, кодамо берянь тев теить, зярдо истя рудазкавтыть пертьпельксэнть.
Александр Иванович марто кортынек седеяк, кодамо лезкс максови Отяжелень райононть пельде СВО-нь таркатнес. Сон тешкстась, райононь эрьва велесэ, косо ванстовсь администрациясь эли велень клубось, эрицятне кодыть кекшемань алтымат, пурнавить гуманитарной лезкс марто посылкат. Теде башка, администрациясь лезды СВО-нь участниктнень семияст туртовгак.
– Минь а аштетяно ве ено те тевденть, лездатано цератненень мезе вийсэнек. 2023 иестэ Отяжелень райононь центрасо СВО-со чавовозтнень лемест ледстнемга панжозь кев, малаванзо озавтозь туянь чувтынеть. Райононь волонтертнэ свал тевсэть, минь жо эсенек пельде топавттано сынст вешемаст, – корты Александр Серов.
Александр Ивановичень валонзо коряс, чарькодеви, Отяжелень районсо эрить вадря, чевте седей ды важодемадо а пелиця ломанть, конатне свал анокт самс лездамо. Сон евтнесь, кодамо вейсэнь покш тев топавтыть администрациясо важодицятне райононь эрицятнень марто вейсэ эрьва иестэ.
– Отяжбуесэ ладявсь истямо кой, эрицятнень марто ютавтнетяно ошонь ванськавтомань чи (субботник). Сакшныть малав весе – вишкинетнестэ саезь покшос, важодтяно чокшнес, мейле весе вейсэ симтяно чайде. Тунда жо, экологической акциянть лувсо, ванськавтнесынек Седлейка леенть. Таркатне перьканзо пек уш мазыйть, юткошкасто ломантне пуромкшныть леенть чирес оймсеме, а вана эсест мельга кадныть ламо шукшт. Акциянть лувсо шукштненьгак истя жо пурнасынек, – евтни Александр Иванович.
Александр Серов тешкстынзе асатыкстнэньгак. Васенцесь ды сехте покш асатыксэсь – тиринь районсто од ломантнень ошов туемась ды тень кувалма предприятиясо важодицянь асатыксчись. Те кажось токинзе республикань ламо лия районтнэньгак. Кадык Отяжбуесэ улить важодема таркат, пандыть вадрясто, од ломантне ялатеке бажить ошов. Кода тюремс те зыянонть каршо, зярс кияк а соды...
Алена Артемьева
Фототне саезь Отяжелень райононь администрациянь архивстэ.