Эрьва иень ноябрянь меельце недлячистэ минек масторсо тешкстави лембе ды мазый кенярксчись – Авань чись. Тень коряс ноябрянь 23-це чистэ Республикань Кудосо ютавтовсь кенярксчинь промкс, косо тешкстызь ламо эйкакшонь триця аватнень. Пурнавозтненень поздоровт ёвтась Мордовиянь Прявтось Артём Здунов.
«Мон сюконян тыненк, ават! – мерсь республикань Прявтось. – Ёвтан сюкпря минек аватненень, бабатненень, нитненень – весенень, кить трить-кастыть эйкакшт. Те ответственной эскелькс, эдь чачомась – те ансяк ушодкс, сехте прявтось – путомс эйкакшонть виде ки лангс, штобу эрямосонть сон прянзо маряволь кеместэ, содазо, кодат питнейчитне сехте эрявикст обществанть туртов – весенень тенень тонавты, васняяк, авась. Тень вадрясто невтизе специальной военной операциясь. Тиринь масторось тердсь лездамс, ды минь нетяно, сеть цёратне, конатнень видестэ кастызь-тонавтызь, видестэ ветить эсь пряст».
РФ-нь Президентэнть Владимир Путинэнь кармавтоманзо вельде минек масторсо топавтовить национальной проекттнэ ды «Десятилетие детства» весероссиянь программась, поладови школатнень ды эйдень кужотнень, поликлиникатнень ды больницятнень, ипотекань эрямонь таркатнень строямось, вадрялгавтовить парктне ды эйкакштнень туртов налксемань площадкатне.
Республикасонть тевс нолдазь эйкакш марто семиятненень социальной лезксэнь 30 ламо ёнкст. Улить пандомат «Демография» национальной проектэнть лувсо, государстванть пельде лезкс явови социальной контрактонть коряс, аватненень питневтеме мереви кастомс квалификацияст ды тонавтнемс эрявикс специальносттнес.
Ней Мордовиясо ламо эйкакшонь семиятнеде лововить 8 тёжадо ламо, эйсэст трявить-кастовить 26 тёжат эйкакшт.
«Вадря невтевкстнэде ламо, – мерсь Артём Здунов. – Вана вейкесь – «Мать-героиня» лемесь, сон максови Лямбирень районсто Исайкина Ольга Петровнанень, сон чачтсь-кастсь кемень эйкакшт». Республикань Прявтось шнызе арсеманть, што «Мать-героиня» лемесь ашти рядсек «Герой России» ды «Герой труда» лемтнень марто. Мордовиясо эштё ламо эйкакшонь триця 23 аватненень мереви пелькстамс те казненть кисэ.
Артём Здунов макссь Мордовия Республикань ламо эйкакшонь триця авань I степенень диплом Ельникень районсто Лидия Костинанень ды Отяжелень районсто Анна Максимованень. Сынст семиятнесэ трявить-кастовить сисемень-сисем эйкакшт. Мордовия Республикань ламо эйкакшонь триця авань II степенень Почётонь дипломсо казезь Саранскойстэ Любовь Агапова ды Ирина Федина, истя жо Зубова-Полянасто Надежда Лемясева. Ламо эйкакшонь триця 16 аватненень максозь III степенень Почётонь дипломтне.
Ицялонь районсто Элина Курепина ёвтась сюкпря Прявтонтень ламо эйкакшонь семиятненень лездамонть кисэ. «Мирдем марто од порасто тукшнынек Свердловской областев, кода кортыть, вадря эрямонь вешнеме. Ансяк куроксто велявтынек одов тиринь республикав, – мерсь сон. – Тесэ муинек важодема таркат, пурнынек покш ды кеме семия, муинек вадря ялгат, нилеце эйкакшонть чачтомадо мейле, республикань Правительстванть лезксэнзэ вельде, пекстынек ипотекань кредитэнть. Ней вете эйкакшонок, минь явтано покш мель сынст кастомантень-тонавтомантень, истя жо патриотизмантень – покш цёранок тонавтни Пензань артиллерийской академиясо, сон – пример седе вишкинетнень туртов. Минь бажатано сенень, штобу эйкакштне касовольть масторонь алкуксонь ломанекс».
Ицялонь районсто Валерий ды Елена Сидоровтнень кото эсест ды вете саезь эйкакшост. Артём Здунов макссь тенст «Семья года Республики Мордовия» пелькстамонь «Милосердие» номинациясонть изницянь диплом. Сидоровтнень те аволь васенце изнявксост – сынст уш улить ламо лия казнест. Невтемакс, тедеде сынь изнясть «Успешная семья Приволжья» пелькстамонь «Моя опора – отчий дом» номинациясонть.
Республикань Кудонь залсонть, косо ютавтовсь кенярксчинь промксось, ульнесь башка ёжо – лембень, паронь арсемань, мелень явомань. Ды чарькодевияк, мекс истя: эдь ламо эйкакшонь триця аватне – те вечкемань, цидярдомань, важодеме бажамонь, ёрокчинь певтеме лисьмапря. Неть дивавтыця, мазый ды валдо аватне казсть эсь лембест весе пурнавозтненень.
Юлия Еремина