Вторник, марта 19, 2024
Важное



2020-це иесь Восточной гороскопонть коряс ёвтазь Ашо Кшнинь Крысань иекс. Икелев молиця, превей, роботыця ды ёжов Крысась ушоды Китаень ковкерьксэнь од 12 иень цикланть. Сонзэ вановт ало ульнесть 1924, 1936, 1948, 1960, 1972, 1984, 1996, 2008 иетне ды истя жо карми Од 2020-це иесь. Ашо Кшнинь Крысань иесь вийс сови 2020-це иень якшамковонь 25-це чистэ ды юты 2021-це иень даволковонь 11-це чинть самс.



Бути тынь чачиде Крысань иестэ – тынь чарькодиця, превей, расчётливой ломань сюпав мель-арсема марто. Тыненк ладить творческой профессиятне, истя жо юристэнь, ветицянь, администраторонь, прявтонь эли телеведущеень специальносттне. Ули истят ломантнень предпринимателень ёрокчист. Ломантне, конат чачсть Крысань тешксэнть ало, пек шумбрат, эрязат, ули сатышка виест. Прявтось – максомс тенст явавтомс удомаст, эдь Крысатне а вечкить сыргоземе рана валске.

МЕЗЕ УЧОМА КРЫСАНЬ ИЕСТЭНТЬ:
АРСЕМАТ ДЫ ЁВТАМОТ 2020-це ИЕНТЕНЬ

Крысась – сэтьме ракша. Сон вечки ваньксчи ды вадря ёжо, секскак 2020-це иесь а алты кодаткак покш зыянт. Иень азоравась вечки кеме, важодиця ломанть. Тень коряс сыця иесь карми лездамо сетненень, кие вечки ды машты роботамо, ды путы весе вийтнень эсь эрямонть вадрялгавтомантень.

Крысась кеми ояксчинтень ды максы покш питне семиянь кеме сюлмотненень. Секскак сетненень, кие покш мель яви эсь малавикстнэнень, сон карми паро тешксэкс ды канды покш уцяска. Сень лангс апак вано, иесь високосной, учовить ламо свадьбат ды кенярксов тевть. Теке марто кодаяк а ютават беряненть вакска – кинень-бути учома ярмаконь ёмавкст, кинень жо эсь уцясканть кисэ сави мезеяк нолдамс. Прявтось – 2020-це иестэнть весементь теемс видестэ, эдь Крысась а вечки манчема.

КОДА ДЫ КОСО ВАСТОМА ОД ИЕНТЬ?

Штобу тердемс уцясканть ды мельс туемс Ашо Кшнинь Крысантень 2020-це иестэнть, кенярксчинть анокстама истямо, кона ули сонзэ коряс. Вадрясто арсинк менюнть, тарканть, анокстадо вадря мазылгавтомат. Бути Од иенть тынь арсинк вастомс кудосо – пурнынк-урядынк шкафонк ды тееде ваньксчи весе кудосонть. Крысась а вечки а эрявикс курмотнень-кармотнень пурнавома. Тееде истя, штобу кенярксчинь интерьерсэнть улевельть чевте, лембе тюст, эдь Од 2020-це иень прявт тюстнэ – ашо, валдо-ожо, сиянь, ашназа-якстере, валдо-сэнь.
Мезе жо инжетнень коряс? Од иенть вастомо тердинк роднянк ды сехте малавикс ялганк. Крысась тонадсь весёла компаниятнес ды кенярксчитнес – сон вечки кортамот, пейдемат ды киштемат. Ансяк пек стакасто яви ярмактнень марто ды а вечки невтевикс сюпавчи. Ды бути тынк икеле ашти кевкстема, косо седе паро вастомс Од иенть, кочкинк кудонть питней ресторанонть таркас.

МЕЙСЭ ВАСТОМА ОД ИЕНТЬ, ШТОБУ КРЫСАСЬ КАНДОВОЛЬ УЦЯСКА?

Эряви кирдемс мельсэ: Крысась а вечки рюшат, бантт ды лия сельмс каявиця тевть. Од иенть вастомантень седе паро кочкамс рунгонь коряс аштиця платия, фатинстэ стазь юбка эли келей штанат. Тюстнэ улест валдот, сельмс а каявицят.
Прявт ёнксось – оршамосонть улезэ аламошка цивтёрдома. Прясто пильгс цивтёрдомс а эряви, мереви кочкамс мазый карксамо, топ эли кардиган. Цивтёрдыця кирьгасуреть ды лия аксессуарт, цитниця туфлят истя жо меревить.

МЕЗЕ АНОКСТАМА
ТУВОРОНТЬ ЛАНГС?

Од иенть вастомантень анокстамсто башка мель явови сенень, мезе путома кенярксчинь туворонть лангс. Крысась весемеде а ярсы ды яви мель сеть ярсамопельтненень, конат вановт лангс аволь мазыйть. Штобу кенярдовтомс Од иень азораванть, туворонть лангс путодо эрьва кодамо сыра ды сывель марто кедьгеть, эмежть ды фруктат, тантей ды мазый ярсамот.
Анокстадо сывель, кал. Пеште ды таньшкавтома тикше марто од салатт. Сон а моли каршо, бути тынь анокстатадо ярсамопель сонзэ ёнов молиця.
Туворонть пурнамсто яводо мель детальтненень – кедьгетне улест валдо тюсонь, салфеткатне ды тувор лангсо вельтявксось улест истя жо ашот.

КИНЕНЬ КРЫСАНЬ ИЕСЬ КАНДЫ УЦЯСКА

Васняяк, иесь мизолды сетненень, кие чачсь Крысань иестэнть. Азоравась башка мель яви сеть ломатнененьгак, конат чачсть Букань, Обезьганонь, Кискань, Тувонь ды Дракононь иетнестэ. Неть тешкстнэнень Крысась карми лездамо ды ванстомо сынст. Башка мель сы иестэнть а эряви учомс Гуентень, Тигрантень, Лишментень, Нумолонтень.

ОД 2020-це ИЕНЬ ТЕШКСТНЭ

Од иень кенярксчись кодаяк а ютакшны вадря ды валдо тешкстэме. Прявттнэ эйстэст – Од иень венть ютавтома вадря ломань ютксо, куранттнэнь чавомаст шкасто жо кенеремс арсемс бажамо. Улить жо лия тешксткак.

Туворонть пурнамсто куншкас путодо сал марто кедьге, штобу тандавтомс берянь арсематнень ды чопода энергетиканть. Эряви меремс, Од иень вестэнть салонть почодомась – вадря невтема. Ансяк специальна тень теемс а эряви.

Кудосто шукшонть вень 12 часос илинк ёрто, теинк тень валске.
Кирдеде Од иень «дресс-кодонть» – оршадо ашо оршамо ды саеде мартонк талисман «крысыне», уцяскась свал карми мартонк.
Ули эштёяк тешкс, васенце валось, конань марясынк куранттнэнь чавомадо мейле, ёвтасы тенк, кодамо ули сыця иесь.
Мезе жо теемс а мереви – те сёвномс, пелькстамс, пеняцямс, аштемс нусманясто, порксамс чакшт, ёртнемс ярсамопельть ды шлямс пенчть-вакант.

Вастомс Од 2020-це иенть эряви вадря ёжосо, малавиксэнк ды ялганк ютксо. Ды сестэ Ашо Кшнинь Крысась канды тенк покш уцяска. Сыця Од ие марто!

Анокстызе Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».