Суббота, сентября 18, 2021
Важное
Россиясо, маряви, арась истямо тарка, косо авольть эря эрзят. Ламо пингень перть эрьва кодамо тувталонь кувалма сынь срадсть весе масторлангонть келес. Превсодыйтне те шкас пря яжить, косоль минек покштятнень-бабатнень эрямо юртост.
Веенст эрзятне эрямонь юртокс ловить Обран ошонть ды сонзэ перька таркатнень. Сон, паряк, истя улияк. Теде кортыть оштнень, велетнень, лейтнень-эрьктнень, пандтнэнь-латктнень леместкак. Неть таркатнес понгозь, эрьва косто вастат «лей», «кужо», «биё» вал марто лемть.

Эрзянь вал марто велеть весемеде ламо Лукоянова буень модатнень лангсо. Тесэ, келя, 68 велеть. Икеле сындест седеяк ламольть. Кода эрьва косо, ков ие сынь чамить ды чуролгадыть. Кадовозтнень ютксто эрзянь велетнеде ней тосо – 14. Неть: Атиньбиё, Салманьбиё, Аоре (Шандрова), Иваньбиё (тесэ чачсть эрзянь содавикс ломантне: Д.Т. Надькин, Н.Ф. Мокшин), Чирьгужо, Пичингуши (те велестэнть лиссть превсодыйтне З.И. Клементьев, М.И. Сумгин, тонавтыцясь А.А. Куманев), Николаевка. Ёвтазь велетнесэ эрямось зярс эзь лотка. Производствась тосояк эно икелень коряс пек седе лавшомсь, велетне ялатеке пря а максыть, кыжнэзь-выжнэзь «лексить». Тосонь эрицятне трить-андыть эсь пряст кода маштыть. Лия велетнень – Кельдюшвеленть, Килей Веленть учи секе уцяскась, кодамос пачкодсть Мессингась ды Пандасось. Васенценть таркасо ней касы тусто вирь, омбоцесэнть эзь кадово вейкеяк эриця.

Ули таго вейке веле. Сонзэ лемензэ рузтнэ полавтнесть ды аволь вестькак. Васня мерсть тензэ Вере Пичингуши, мейле лемдизь – Ново-Архангельскоекс. Ней содасызь кода Новоселки веленть. Сон ашти Трокспал пандочиресэ. Веленть эйстэ аволь васоло «Лукаш» кужось, козонь ламо пингень перть эрзятне пурнавкшность Пазнэнь озномо. Сонзэ куншкасо – покштояк покш кев, конань лангсо кирвазтнесть штатолт, ютавтнесть кизэнь озкст. Те тарканть эйстэ лия ёно чави лисьмапря кувака лем марто: Кельмелисьмалей. Ведезэ эрексиядо ванькс ды кельме. Самай сонзэ перька кужось кочказель озксонь ды «Эрзянь лисьмапря» фестивалень ютавтнема таркакс. Васенце фестивалесь ульнесь 10 иеде икеле. Тедеденсесь – кевейкеецель. Сон ютась медьковонь (июлень) 24-це чистэ.

Сюконямо валт эрзянь раськень алкуксонь цёрантень
Н.И. Аношкиннэнь (Аношонь Тумайнень)

Тедеде фестивалев сакшность икелень коряс седе аламо ломанть. Чумось – кезовось. Сонзэ кувалма эзь мереве тердемс инжеть ве ёндо. Секс морыцят, киштицят ды сынст кунсолыцят-ваныцят тов седе ламо пурнавкшность Обран ёнксонь буетнестэ. Зярыя ломанть якасть Мордовиястояк. Сынст ютксольть – Регионъютконь эрзянь, мокшонь раськень вейсэндявксонь прявтось Ю.А. Мишанин, эрзянь раськень культурань сюпавчинь ванстомань ды кемекстамонь фондонь прявтось Т.И. Ларина, эрзянь келень ванстома фондонь икелень прявтось Г.Д. Мусалев, «Сияжар» телепрограммань журналистэсь А.А. Данильчев ды минь, «Ламзурь» ансамблясо морыцятне.

Сеске мерьсынек, фестивалень ютавтома коесь эзь полавтово. Икеле ладсо, вастасть эйсэнек седейшкава, васня тердсть ярсамо тоско пидезь ямдо, симеме седикеле ладсо лезэв тикшестэ лакавтозь чайде. Нусмакавтсь эйсэнек вейкесь: вастыцятнень ютксо арасель те коенть ушодыцясь Николай Иванович Аношкин (Аношонь Тумай). Сонензэ эзь учово эрзянь раськень Озксонь ютавтома чись, куломась апак учо саизе эрямонзо. Те кажось лиссь аштемковонь (июнень) 6-це чистэ. Н.И. Аношкиннэнь ульнесть 73 иеть. Сонзэ лемезэ кеместэ совась минек раськенть историяс васняяк кода ломаненть, конань ушодксонзо коряс Лукояновасо панжозельть Эрзянь культурань музеесь ды Эрзянь лисьмапря этнопаркось, косо ней эрьва ие ютавтневи те фестивалесь. Паркось седе пек моли менель ало музей ёнов. Сон мазылгавтнезь ды сюпалгавтозь эрьва кодамо скульптурасо, конатне теезь Н.И. Аношкинэнь ды Николай Николаевич цёранзо кедьсэ. Н.И. Аношкинэнь лемезэ свал карми гайгеме «Эрзянь лисьмапря» фестиваленть ютавтомсто. Нейгак Н.И. Аношкиндэ паро валсо ледстнесть ламо кортыцятне, валдо лемезэ кундазель ве минутань перть каштмолемасо.
Кода ютазь фестивальтнестэяк, неенсенть ушодовомадо икеле кепедезельть Россиянь, Обран ёнксонь, Лукоянова буень ды эрзянь раськень масторкоцтнэ. Мейле ютавтозель Инешкипазонтень ознома коесь. Пурнавозтне васня стякшность вейке кирьксэс, «Вирев молян» моронть гайгеманзо коряс ютасть Лукаш кужонть куншкасо кепедезь мааронть перька, седе тов сонзэ лангс кузнесть озксонь ютавтыцятне ды те коенть ушодыцятне ды ванстыцятне. Ютксост – Нижегородской ёнксонь национально-культурной автономиянь прявтось М.И. Безаев. Михаил Иванович ламо вийть максы минек раськенть лезэс. Сонзэ пингстэ Обран ёнкссо, косо эрить ламо эрзят ды мокшот, неявиксстэ кармасть виензамо тевтне, конат сюлмавозь минек раськень культуранть ванстоманзо марто. Чачсть морыцянь од коллективть, велетнесэ кармасть вельмеме кезэрень койтне, седе ламо од ломанть саить мель школадо мейле молемс тонавтнеме Мордовияв. Те фестивальсэнтькак Михаил Иванович тердсь весень а стувтнемс эсь ундокстнэнь, ванстомс весе сеть сюпавчитнень, конатнень тенек кадызь минек покштятне-бабатне.

Зярдояк илязо коське Эрзянь лисьмапрясь!

Кортамотне поладозельть сцена лангсо. Лембе валт покшчинть кувалма ёвтась Лукоянова буень прявтось С.Н. Малышев. Регионъютконь эрзянь, мокшонь раськень вейсэндявксонь прявтось Ю.А. Мишанин, кода свал, сакшнось аволь чавонь кедть. Исполкомонть пельде шнамонь коневсо ды питней казнесэ тешкстазельть сеть ломантне, кинь вийсэ Лукояновасо ютавтови те покшчись. Неть, васняяк, Лукоянова буень культурань отделэнь прявтось Лариса Владимировна Семьина, Обран ёнксонь Лукоянова буень мокшэрзянь раськень «Лисьмапря» национально-культурной автономиянь прявтось Марина Константиновна Голодова. А кода а шнамс сеть ломантнень, кить анокстасть те фестиваленть, пурнасть эйзэнзэ сыцятнень, ладясть мартост сюлмавкстнэнь. Те, васняяк, Галина Алексеевна Александрова. Те эрзянь аванть лангс путозельть, маряви, весе тевтне-мелявкстнэ, кодат эрсить фестиваленть ютавтомсто: сценариень сёрмадомась, программанть теемась, инжетнень тердемась ды истя седе тов Теке марто, Галина Алексеевна эрзянь цёранть Владимир Кузьмич Володинэнь марто вансть весе сень мельга, кода мольсь фестивалесь, ветясть концертэнть.

Озкстонть ды кортамотнеде мейле кужось пешкедсь мазый ды гайтев моросо. Васенцекс лиссть сехте одтнэ. Зярыя од цёрынеть ды тейтернеть невтсть киштемань сценка мазый вайгельсэ гайгиця моронть коряс, конань серьгедизе пек паро морыцясь Мария Попова. Тейтересь важоди Дзержинск ошонь химикень культурань кудосо. Тов, «Разгуляй» киштемань куров, яксить тонавтнеме од артисттнэяк.
Вейке омбоце мельга кужонть куншкасо ладязь сценанть лангс кармасть лиснеме лия ансамблятнеяк. Пек лембестэ вастозельть «Ламзурь» ансамблясо морыцятне. Кунсолыцятне вешсть натой пельдест серьгедемс «Тиринь веле» моронть, конань туртов валтнэнь сёрмадынзе Лукояновань мода лангсо чачозь содавикс учёноесь Н.Ф. Мокшин.

Фестивалев пуромозь ломантнень эзинзе тандавто пиземеськак, кона секе тев поцёрдсь весень лангс. Веенст морасть, омбонст кунсолость ды киштсть. Весе вейкень пес кадовсть ансяк паро ёжосо.
Мекев сыргамодо икеле Кельмелисьмалеень ванькс ды тантей ведтензэ симезь, кода минекак, истя лиятненьгак превс, секень вант, састь истят мельть: кадык зярдояк а коськи Эрзянь лисьмапрясь, кадык сон карми чавомо пингеде пингес!

Раиса Щанкина,
Лукоянова, Обран ёнкс
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».