Четверг, июня 20, 2024
Важное

Неень шкасто Мордовия Республикань «Здравоохранение» национальной проектэнть вельде мель явови велетнесэ ФАП-тнень витнемантень, медицинской учреждениянь зданиятнень одкстомтомантень, сынст туртов автотранспортонь максомантень ды истя седе тов.


Велень фельдшерэсь, куш кодамо шкасто, – васень лездыця ормалгадомсто. Сеедьстэ сонензэ эрицятне сыть аволь ансяк сэредемстэ, лиясто седейризксэст пачтямо, превс путомань кевкстеме.
Самай истямо лембе седей, весенень паронь арсиця фельдшер пингень перть важоди Покш Березникень райононь Кузым велесэ. Те – Надежда Ивановна СУРОДЕЕВА.

Эйкакшпингень арсемась топавтовсь

Надежда Суродеева (тейтерьксэнь фамилиязо Вишнякова) чачсь-кассь Дубенкань райононь Морга велесэ, ламо эйкакшонь триця семиясо. Тетязо-авазо, Иван Григорьевич ды Мария Илларионовна, пингень перть важодсть тиринь велень Пушкин лемсэ колхозсо. Сынь трясть-кастсть ниле эйкакшт: колмо тейтерть ды вейке цёра. Васенце эйкакшост, Надежда, чачсь 1958 иень сёксня, зярдо допрок прядовкшность паксянь тевтне. Сонензэ, кода сехте покшонтень, савсь седе ламо тевть топавтомс кода кудоютксо, истя жо сазортнэнь ды ялаксонть мельга ваномсто. Тейтерькась кассь кунсолыцякс ды бажась мейсэяк а ризнэвтемс тетянзо-аванзо ды Агафья Анатольевна вечкевикс бабанзо седейтнень. Кавксо классонь прядомадо мейле, кода лия ялганзояк, школасто эзь туе, тонавтнеманзо поладызе Чеберчина шабра велесэ.
Школанть прядомадо мейле, профессиянь кочкамсто, тейтеренть кавтолдоманзо арасельть. Сон эштё вишка пингстэ арсесь туемс покш патянзо (крёстной аванзо) кияванть. Тетянзо сазорось, Вера Григорьевна, эсь шкастонзо прядокшнызе Ардатовань медицинской училищанть ды пингень перть важодсь медицинасо.
Сеть шкатнестэяк ульнесь истямо кой – туемс важодеме ве ёнов. Истя, Вера Григорьевна сыця шкань эрямо ды важодема таркакс кочкизе Туркмениянть. Тосо лиссь мирденень, тосо нолдась ундокст… Мекев Мордовияв самс тензэ эзь саво. Васняяк, важодсь акушеркакс кишлаксо, косо эрьва семиясо ульнесть 10-15 эйкакшт. Седе тов больницясо медсестракс, мейле аравтызь прявт медсестракс. Сон ламо ёвтнесь, кода эряви важодемс медицинасо, ды тонавтсь Надянь эсь тевезэнзэ. Васняяк алкукс сонзэ вечкеме.
Виде, бути тон пият-палат важодемасот, сестэ теветькак ков седе парсте топавтови. Лиятнененьгак теде ёвтнемстэ ламо лезэв превс путомат максат.

Од таркасо вастызь парсте

Виде, икеле од специалисттнэнь кучсть важодеме сеть таркатнес, косо эзть сатно кадрат. Истя, Надежда Вишняковань (Суродеевань) вейсэ ялганзо Анастасия Сайгушкина марто кучизь Покш Березникень районов. Самай се шкане Кузым велесэ допрок чамокшнось фельдшерэнь-акушерэнь пунктось. Сеть шкатнестэ те велесь а вишкинель. Тосо эрясть малав 400 ломанть.
Анастасия Сайгушкина ялгазо тосо кувать эзь кирдеве, аламо шкань ютазь лиссь мирденень ды семиянек тусть эрямо васоло Якутияв. Нама, сынь нейгак кадовсть малавикс ялгакс. Эдь якшамо таркасо эрямодо мейле сынь састь эрямо мекев Мордовияв – Дубенкань райононь Пуркаева велев, косо эштё икеле путокшность паро кудо.

Уцясканзо муизе важодема таркасто

Овсе лиякс эрямо кизэ юты Надежда Ивановнань. Сон кадовсь эрямо ды важодеме теке велесэнть. Лиссь мирденень Кузым велень эрицянть, Суворов лемсэ колхозсо важодицянть Василий Суродеевень экшс. Василий Николаевич ульнесь истя жо ламо эйкакшонь триця семиясто. Масторонть икеле долгонть топавтомадо мейле велявтсь тиринь велев ды кармась важодеме трактористэкс Суворов лемсэ колхозсо.

Тешкстасынек, мирденть семиясо ульнесть ниле цёрат, велень кудотне аволь покшольть. Сень ловозь, Василий Николаевич ды Надежда Ивановна венчамодо-урьвакстомадо мейле вейке иень ютазь тусть эрямо велень медпунктонть маласо стявтозь кудонтень.
Советской шкань кавксоньгеменце иетнень прядовомсто Суворов лемсэ колхозсонть эрязасто ушодсть эрямо таркань тееме. Истя, Суродеевтненень макссть од эрямо тарка. Се шкантень сынст ульнесть кавто эйкакшост: Николай цёраст ды Наталья тейтерест. Эрямс бу ды кенярдомс, эйкакштне кассть. Ансяк минь а содатано, мезе эйсэнек учи.
Нать, Пазось эзь максо кувака пинге кудазоронтень Василий Николаевичнень, сон кулось 2009 иестэ стака ормадо.

Вечкевикс тевентень максы весе виензэ

Неень шкасто Кузым велесэ весемезэ эрицятнеде 107, ютксост 9 эйкакшт. Ули ламо эйкакшонь триця семия. Те – Ольга Ламкина, косо касыть вете эйкакшт, сехте вишкинентень кавто ковт. Нама, те икелень коряс ков седе аламо.
Кода масторонь, истя жо Мордовиянь эрицятнененьгак алкуксонь варчнема нардевчи лангс ульнесь пандемиянь шкась. Надежда Суродеевань валонзо коряс, сынст велесэ те ормась ютась аволь пек стакасто. Васняяк, эряви меремс, эрицятнень ютксто малав 100 % ютасть вакцинация. Надежда Ивановна покш мель яви профилактикань тевтненень, эрицятнень марто кортамонтень ды шкастонзо орматнень редямонтень. Кода мерсь Надежда Суродеева, сынст велесэ малав весе путовтсть прививкат, ансяк ниле ломанть (эсест тувталонь коряс) тень эзизь тее. Тевс нолдасть Спутник V вакцинанть, кить сэредсть, ды од ломантненень путсть Спутник Лайт.

– Монсь ванынь, кинень ды зярдо эрявсь теемс ревакцинациянть, сынсь эрицятнеяк те кевкстемантень явсть покш мель, – ёвтни Надежда Ивановна. – Сеть, кинь виест ульнесть самс медпунктс, тосо тенст теинь, лиятненень сакшнынь кудос.
Кода пачтясь велень фельдшерэсь, ней те ормась малав тусь эйстэнек. Ансяк а эряви стувтнемс, сондензэ башка улить эштё ламо лияткак. Пертьпельксэнь коштонть полавтневемстэ сыть тенек экшендемань ды лия орматкак. Эдь велетнесэ неень эрицятнестэ ламотне сыре ломанть, конатнень улить свалшкань (хронической) ормаст. Сыненст истя жо свал эряви медицинань лезкс.

Надежда Ивановна свал кирди кеме сюлмот участковой терапевтэнть Марина Черашева марто. Марина Николаевнань кармавтоматнень велень фельдшерэсь топавты шкастонзо. Истя, чинь васенце пельксстэнть Надежда Ивановна ашти важодема таркасо, обедтэ мейле сырги кудосо ормалгадозтненень.
Тундонь-кизэнь шкасто Кузым велесэ ломантне свал седе ламолгадыть, сыть тиринь велев икелень эрицятне, тей пачтясызь эйкакштнень, нуцькатнень. Фельдшерэнтькак тевензэ седе ламолгадыть. Неть шкатнестэ велень свалшкань эрицятнененьгак аютко совамс медпунктс. Надежда Ивановна жо сонсь соды, кинень ды зярдо молема, кармавтома тенст, штобу авольть стувтне симемс тенст эрявикс ормаменькстнэнь.

Надежда Ивановна марто кортамсто карминек содамо, сынст ФАП-сь теезь советской шкань кодгеменце иетнестэ, пароль бу сонзэ витнемс ды лембелгавтомс… Эдь те иень телень якшамотнестэ пек стакаль весенень, кить тов сакшность, сехте пек тосо важодицянтень. Тень лангс апак вано, Надежда Ивановна кеми, прявттнэ явить мель ды лездыть сынст ФАП-нть одкстомтомс. Истямо жо мельс прасть МР-со ОНФ-нь представительтне, кить ютазь иестэ тенст сакшность медицинасо максовиця тевтнень ванкшномо.

Тамара СЕЛЯКИНА, Покш Березникень муниципальной райононь Кузым велень поселениянь прявтось:
– Надежда Ивановна Суродеева, ловт, пингень перть важоди Кузым велесэ. Сень лангс апак вано, сонзэ чачома таркась Дубенкань районось, сон допрок минек ломанесь. Свал анок лездамс минек ёнксонь эрицятненень, кодамо энялдома марто а пшкадить тензэ Кузым велень эрицятне, весенень бажи лездамс. Те эрзянь аванть лангс путозь покш ответственность, ванстомс ды, бути эряви, лецямс минек велень ломантнень. Сон эсь тевензэ парсте содыця ды седейшкава топавтыця. Кадык Пазось максы тензэ вийть эштё кувать важодемс Кузым велень эрицятнень лезэс.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».