Вторник, декабря 01, 2020
Важное

Сундерьковонь 10-це чистэ эсь профессиональной кенярксчист тешкстыть Российской Федерациянь Внутренней тевень органтнэнь важодицятне.
Зярдо-бути те профессиясонть службанть кандсть ансяк виев, мездеяк а пелиця алкуксонь цёратне. Меельце шкастонть жо те тевенть марто яла седе сеедьстэ эсь эрямост сюлмить тейтерь-аватнеяк. Истятнэнь ютксо минек течинь героинясь – Россиянь МВД-нь Чаунзань райононь полициянь куронь прявтонь личной составонть марто важодемань коряс лездыцясь, внутренней службань подполковникесь Альбина Александровна Ютяева. Те виев обуця авась полициясо важодемантень макссь комсь иеть ды вейкеяк чи эзь янксе эйкакшпорасто кочказь тевенть коряс.

Альбина Ютяева чачсь-кассь Дубёнка буень Чиндянова велесэнть. Тесэ прядызе средней школанть ды кандынзе конёвонзо М.Е. Евсевьев лемсэ МГПИ-нь школадо икелень педагогикань ды психологиянь факультетс. Прядызе институтонть ды кармась роботамо эсест райононь "Солнышко" эйкакшонь кужосонть. Теке шкастонть тейтересь тонавтнесь Н.П. Огарёв лемсэ МГУ-со "Практическая психология" специальностенть коряс.
– Эйдень кужосо важодемась а берянь, ансяк вана те весе ульнесь аволь монь коряс, – корты Альбина Ютяева. – Прясон свал ульнесь милициясо важодемась, оштё эйкакшпингстэ саезь. А саевсь сон вана косто. Школасо тонавтнемстэ эрьва валске каршонок яла понгильть мирдть-нить – Климовтне. Сынь кавонест служасть милициясо, ды эрьва валске важодема таркав ютамсто минь сынст вастылинек. Кавонест формасот, мазыйть, рунгост кирдить видестэ. Монень те истя вечкевиль, натой эстень путынь кемекстамо – карман важодеме.

Ды вана уцяскась мизолдозевсь тейтерентень. 2000 иестэ Дубёнкань райононь РОВД-нь паспортонь-визань службасо чамсь тарка, козонь саизьгак Ютяевань. Альбина Александровна тосо роботась кото иеть. Мейле службанть токизе реорганизациясь ды сонзэ совавтызь УФМС-нь структуранть юрс. Пелест важодицятне кадовсть тевтеме.
Молемс роботамо ковгак лияв тейтерь-авась эзь арсеяк, бажась служамс полициясо.

Секскак пурнынзе весе виензэ ды пшкадсь Мордовия Республикава Внутренней тевень сестэнь министрантень Н.С. Ларьковнень. «Анок служамс тосо, ков кучсамам руководствась», – пшкадсь министрантень Альбина Ютяева. «Молят Чукоткавгак?» – кевкстизе Ларьков. «Молян», – мерсь Ютяева.

– Монь ульнесь пек покш мелем роботамс милициясо, секскак ульнинь анок ардомс масторонь куш кодамо ёнксов, – ёвтни Альбина Александровна.
Нама, служамс Крайней Северсэ авантень эзь саво. МВД-нь прявттнэ кучизь сонзэ Чаунзань ОВД-в кемгавксово иеде седе вишкинетнень тевест коряс инспекторокс. Меельце ниле иетнень перть Альбина Ютяева эрьва чистэ валскень 7 чассто лисиль ки чирес ды ардыця машинатнесэ Дубёнкасто, косо эриль, пачкодиль Чаунзав.
Психолог васень образованиянть коряс, сон куроксто мусь кель-вал эсь подопечнойтнень марто.

– Роботась тень пек вечкевсь, кадык ульнесь аволь шождатнестэ. Эйкакштнень колазь уцяскаст мон весе нолдылинь эсь пачкан. Паряк, тень коряс, эйкакштнеяк панжильть тень эсь потмоёжост, кемильть, мон тенст лездан, – тешксты Альбина Александровна.

Теке шкастонть Ютяева заочна тонавтнесь Н.П. Огарёв лемсэ МГУ-нь юридической факультетсэ, топавтсь эсь содамочитнень.
Кавто иень ютазь А.А. Ютяева аравтови кадратнень марто важодемань коряс отделэнь прявтокс теске жо Чаунзань ОВД-нтень.
2009 иень ацамковсто Ютяевань аравтызь Общественной безопасностень милициянь подразделениянь прявтокс тиринь Дубёнкань районсонть. Истя сон кармась васенце тейтерь-авакс Мордовиясо, кона ашти милициянь сехте покш ды народной службань прявтсо.

Ютяева майоронть вановтонзо ало роботасть участковойтне, дознавательтне, ПДН-нь, СИЗО-нь, конвойной службань сотрудниктне. Мейле тесэяк службанть токизе реорганизациясь, ды А.А. Ютяева поладызе важодеманзо Чаунзань районсонть полициянь куронь прявтонь личной составонть марто важодемань коряс лездыцякс, кона тевсэнть канды службанть течинь чис.

– Минек межмуниципальной отделениянть юрс совить Чаунзань, Дубёнкань ды Покш Березникень районтнэ, весемезэ важодицятнеде 181 ломань. Эрьванть мон парсте содаса, ветян мартост домка важодема. Теде башка, роботан сетнень мартояк, конат бажить понгомс минек юткс: ёвтнян, кодат вешемат улить кандидатонтень, кевкстнян сынст шумбрачиденть, тонавтнемань уровенденть, пачтян эрявикс должностьсэнть важодема лувдонть. Теке марто эрявкшны ютавтомс огневой анокстамонь коряс занятиятнень. Леднематне минек эрсить эрьва недля, свал эряви улемс анок, зярдояк ды мезеяк теть илязо меша.

Полициясо важодян вана уш комсь иеть ды зярдояк кочказь тевенть коряс эзинь янксекшне. Роботав свал ютан покш мельсэ ды вадря ёжосо, а эдь стакачить эрсить сеедьстэ, – ёвтни Альбина Ютяева.
Сехте покш уцяскакс ды эрямосо прявтокс жо аванть туртов аштить Диана тейтерезэ ды колмо нуцькинензэ. Сынст марто сон ютавты весе юткошканзо ды кази тенст эсь вечкеманзо ды седейлембензэ.

– Зярдо роботынь ПДН-нь инспекторокс, эринек Дубёнкасо, ардтнемс жо савиль Чаунзав. Кудосто туилинь валске марто ранаяк, эрявсь шкастонзо пачкодемс роботав ды вадряль оштё кенеремс содавтомс эсь подопечнойтнень. Мекев кудов жо велявтылинь позда чокшне. Сеедьстэ савкшнось кирдевемс, лиясто тевтнень прядомга, лиясто жо сыльть пачтямот, косояк эйкакшт тейсть тамашань тевть. Тейтеренстэнь сестэ ульнесть 12 иеть ды сонзэ лангс прасть кудонь, пирень весе тевтне. Сон сеедьстэ продуктатненьгак рамиль, ярсамопелентькак пидиль. 7 классо тонавтнемстэ школасо тенст макссть сёрмадомс сочинения, сон кочкизе "Мои родители работают в полиции" теманть. Ды сёрмадсь тозонь: "Авам сась кудов чокшнень 10 чассто ды тагояк стувтсь рамамс кши". Мон зярдо ловныя те сочинениянть, чарькодинь, овсе эзинь нее эсь тейтерень эйкакшпоранзо.

Зярдо Диана прядызе школанзо, мон пек бажинь, штобу сон сыргаволь минек, тетянзо-аванзо, киява (мирдем истя жо ульнесь полициянь сотрудникекс) ды молевель тонавтнеме Нижней Новгородонь Полицейскоень академияс. А сон монень тень каршо мерсь: «Бажан улемс авакс ды трямс-кастомс эсь эйкакшон».

Тейтерем превейка. Сон монь каштанчим ды уцяскам. Сырнень медаль марто прядызе школанзо, якстере диплом марто Н.П. Огарёв лемсэ МГУ-нь географиянь факультетэнь бакалавриатонть ды магистратуранть. Ней тонавтни аспирантурасо. Сон ды нуцькинетне – весе монь эрямом.
Бути жо кортамс полициясо важодемадонть, мерян: тевесь те аволь тейтерь-авань, ансяк мон эсь прям муия самай те профессиясонть. Ды бути саволь весементь ушодомс одс, мон кочкавлия ансяк те кинть, – кемекстызе Альбина Александровна.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».