Важное


Мон зярдояк араселинь Чувашиянь Алтышева эрзянь велесэнть. Секс, зярдо тердимизь тов, паро мельсэ пурнынь васоло килангов: мольть, зярс тердить, лисни – эряват.


Эрзянь велесь сови Алатырень райононтень, Алатырь ошонть эйстэ ашти 21 вайгельбень тарка. Алтышевадонть кавто вайгельбень тарка юты чугункань ки, чугункань кинть перька таргавсь Алтышева посёлкась. Велентькак, посёлкантькак улить эсест школаст – минь манявинек, васня токинек посёлкансентень, кувать эзинек чарькоде, мекс те школасонть а куш-а каш. А вана зярдо пачкодинек тов, ков эрявсь, ушосто уш неявсь: тесэ алкукс покш чи! Эрьва ёндо школанть пирсизь-куродызь машинат. Чарькодевсь: ламо инжеть састь.
Покш чись вана кодамоль. Котоце ие мельцек Алтышевань основной школась Чувашиянь Эрзя-мокшонь культурной центранть марто вейсэ тесэ ютавтнить «Эрзянь вайгель» пелькстамо. Те пелькстамонть шнызе ды кирдизе Чувашиянь Образованиянь ды од ломанень политикань министерствась. Конёвтнесэ сёрмадозь: «проект» – аволь пелькстамо. Монь те валось тандавтни, прок мерят, сонсь те валось корты коень кис тевенть ютавтомадо.

Эно вансынек, кода Алтышевань школасо ашти тевесь. Пек уш покшоль мелем неемс те вастовоманть, те пелькстамонть питней смустензэ. Невтьсы-а невтьсы сон: келесь тосо эри, эзь лепамо?
…Залось пешксель. Марявсть рузкс ды эрзякс кортамот. Сценанть велькссэ сёрмадозь «Республиканский конкурс «Голос эрзи». – Аволь эрзякс.
Мезе ули седе тов?

Эрьва иестэ «Эрзянь вайгель» пелькстамось алтави тиринь ёнксонь содавикс эрзянтень. Истя, икеле иетнестэ те пелькстамось алтавкшнось Мордовиянь народной писателентень Андрей Дмитриевич Куторкиннэнь, эсензэ раськенть превс путыцянтень-тонавтыцянтень Макар Евсевьевич Евсевьевнень. А вана тедеде сон алтавсь Мордовиянь народной писателентень Кузьма Григорьевич Абрамовонь чачома чистэнзэ 105 иетнень топодемантень – самай те чистэнть, октябрянь 30-це чистэ (ноябрянь 12-це чистэ), минек пек содавикс сёрмадеенть чачома чизэ.

Алтышевась содавикс весе эрзятненень скульпторонть Степан Эрьзянь лемензэ кувалма. Тесэ сон прядызе церковно-приходской школанть. А вана Кузьма Григорьевич Абрамов сёрмадсь минек ине скульптордонть роман. Ды а дива, мекс Чувашиянь ёнксонь тонавтницятнень пелькстамонть алтызь Абрамовнень.
Мордовиясто инжетне ульнинек колмонек: Эрзянь-мокшонь раськень вейсэндявксонь исполкомонь прявтось А.С.Лузгин, учёноесь-историкесь, сёрмадеенть цёразо В.К.Абрамов ды мон. Эрьвась ёвтась вал, эрьвась усксь казнеть пелькстыцятненень.

Тонавтницятне сакшность Алатырень, Ибресинь, Порецкоень буень ды Алатырь ошонь школатнестэ, 100 ламо цёрынеть ды тейтернеть, кото иестэ саезь кемзисемге иес. Те уш пек паро.
Вал максовсь пелькстамонть ютавтыцятненень, инжетненень. Васняяк весень икелев лиснесь тонавтыцясь, кона яволявтызе те покш чинь программанть. Пелькстамось ютась ниле курова: «К.Г.Абрамовдо ды сонзэ произведениятнень коряс тонавтницятнень валморост», «Тонавтницятне ловныть К.Г.Абрамовонь произведениятнестэ саевкст», «К.Г.Абрамовонь произведениянзо коряс сцена лангсо налксема», «Артовксонь пелькстамо».

Кода тонавтницятненень топавтовить истят а шожда тевтне? Виде, артовкстнэ уш понгавтнезь. Васолдо неявсть Кузьма Григорьевич ёнов молиця чачот. – Ванока, снартсть артовкссо невтемс содавикс сёрмадеенть!
Мейле кортасть Эрзянь-мокшонь культурной центрань прявтось В.П.Седойкин, А.С.Лузгин, В.К.Абрамов – весе ёвтасть лембе валт пелькстыцятненень, кадык парсте невтьсызь ёрокчист ды содамочист. Эряви меремс, А.С.Лузгин ды В.К.Абрамов сакшность аволь чавонь кедть, усксть мартост ламо книгат – пелькстыцятненень ды тонавтыцяст туртов казнекс.

Монсь кортамстон ледстия, кода умок-умок, зярдо вишкинелинь, минек Андрейвелев сакшнось Кузьма Абрамов. Минек клубось тыц пешксель, весе талнозь кунсолость сонзэ. Ламо иеть ютасть, эрямо эрязь, а вана сёрмадеенть марто се вастовомась а стувтовкшны. Покшсто, Мордовской книжной издательствасо важодемстэ, теевинь малавиксэкс Кузьма Григорьевич марто, савсь тень натой улемс сонзэ книгатнень редакторокс. А вана мартонзо эйкакшпингень се васень вастовомась лездась тень весе оймень путозь анокстамс сонзэ рукопистнень лисемс книгасо. Секс эйкакштнененьгак меринь: «Кадык тыненкак, течинь пелькстыцятненень, вий максыть паро арсематне, конатнень тенк ёвтызь истят содавикс инжетне: историянь наукань доктортнэ А.С.Лузгин ды В.К.Абрамов».

Весе явновсть класстнэва, косо яволявтозь куротнева пелькстасть тонавтницятне. Миньгак кунсолынек сынст васня вейке классо, мейле сыргинек лияс ды истямо ладсо кенеринек весень ваномс-кунсоломс.
Налксемс саезельть Кузьма Абрамовонь романсто аволь покш саевкст, конат сюлмавозь Степан Эрьзянь эрямонзо марто. Веенст эйкакштне кортасть эрзякс, седе ламотне рузкс. Истя жо ульнесь лия класстнэсэяк. Неявсь – весе парсте анокстасть те покш пелькстамонтень. Ансяк вана мезесь уш, нать, кадови авитевиксэкс: ламо эйкакштне уш а кортыть эрзякс эрзянь кудораськесэст, эрзянь велесэст, секс валтнэньгак ёвтыть аволь видестэ, тапазь-колазь.

Теке марто ульнесть пек ламо парсте кортыцяткак. Мелезэнь пек тусть Атрать велень школань тонавтницясь Екатерина Оглоткина (тонавтыцязо Т.И.Назинкина). Тейтересь пек ванькс эрзянь кельсэ ловнось романсто саевкс. Чарькодевсь сеске – эрзянь келесь сонзэ туртов тиринь кель. Седейшкава ловнызь, книгас апак вано, романсто саевкстнэнь Алатырень колледжень тонавтницясь Артём Марченков (Н.В.Рузавина) ды Алтышевань школань тонавтницясь Дмитрий Карпов (Н.В.Рузавина). Дима марто кортынь эрзякс – сонензэяк эрзянь келесь тиринь. Кудосо, ялга марто сон корты эрзякс. Ансяк вана ловномс сайсь текст рузонь кельсэ: «Сын эрзянский» Кузьма Абрамовонь романстонть. «Мекс?» – кевкстия. – «Ульнесь мелем рузкс ловномс», – мерсь тень цёрынесь.

Эрьва номинациянть коряс изницятнеде лиссть ламо – весень туртов казезельть К.Г.Абрамовонь ды В.К.Абрамовонь книгатне. Мон эсень пельде казия Алтышева велень школань директоронтень Самат Ильшатович Тазетдиновнень эсень тиринь веледе книганть – эдь ламосо минек велетнень уцяскаст малавикст. Кадык ловныть сонзэ тонавтницятне, кадык кармить содамо седикелень веленть эрямодонзо. Самат Ильшатович – татар, низэ – эрзява. Вана бу тонавтовлизь эйкакшост татаркс ды эрзякс кортамо! Кодат сюпавольть сестэ сынь – уш эйкакшпингстэ кармавольть содамо колмо кельть! – Эзть карма тонавтомост, кортыть кудосо эсь ютковаст рузкс. Мезе тень коряс мерят? – Тесэ уш эрьвась сонсь азор, кода улемс, кода теемс.
Алтышева велень прявтось Валентин Иванович Кедяров – эрзя, сонгак сакшнось те чистэнть школав, кунсолось, кода эрзянь эйкакштне чулгить эрзякс. Марявсь, прок а ён тензэ ульнесь сень кис – аволь уш истя парсте чулгить-кортыть эрзянь эйкакштне эрзякс. Кортамстонок прок идесь прянзо – мекс истя лиссь. Идек-иля прянть: мезесь уш нолдазь – а велявтови, а витеви. Ды а чумояк теньсэ велень прявтось, кода а чумот башка тонавтыцятнеяк, тонавтницятнеяк. Истямо шканть молемазо: меельце иетнестэ эрзятне пек перьгедсть-явовсть эсест келенть эйстэ. Истямо шканть молемазо...

Мелезэнь пек тусь лия ёвтнемазо: кода сон якась Якутияв, усксь тосто важодемань кис ярмакт ды рамась сынст лангс техника, конась пек эряви велесэ. Сонсь тельня ванськавты ловонть эйстэ китнень, тунда соки велень пиретнень. Вейке валсо – азор. Вана те пек паро: ули велесэнть азор!

Тамара БАРГОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».