Уцяскавокс ловови се ломанесь, конань ули эсензэ семиязо ды кудозо, косо сонзэ эйсэ свал учить ды лембе седейсэ вечкить. Семиясь - те покш кеняркс, кеме сюлмо, кецямонь сюпавчи! Те - зярдо тонь эйсэ свал парсте чарькодить ды лездыть, ёвтыть теть лембе валт ды кисэть аштить. Арась моданть лангсо истямо кеме ды виев сюлмо, кода уцяскав ды кенярксов семиясь.

Медьковонь 8-це чистэ минек Россиясь тешксты Семиянь ды вечкемань покш чинть. Сон пек сюлмазь историянть ды эрямонь-аштемань иневанькстнэнь Петрань ды Феврониянь марто, конатне эрясть пек покш вечкемасо, мерят, сюлмазельть вейкест-вейкест марто кеме сюлмосо, конатне аштить весенень покш вечкемань невтемакс.
Сынь эрясть Владимирской областень Муромсо ХП-ХШ-це пингетнень шкасто. Петрань ды Феврони­янь ютксо ульнесь покштояк покш вечкема, чарькодема ды лездамо, конась кармась улеме весе Россиянь семиятнень туртов уцяскав эрямонь, покштояк покш вечкемань невтемакс! Ёвтамотнень коряс, сынь кулость вейке чистэ - аштемковонь 25-це чистэ (од ковкерьксэнть коряс - 1228 иень медьковонь 8-це чистэ).
Секскак Петрань ды Феврониянь те чинть Россиясо теизь Покш чикс. Муром ошсо ютазь пингень 90-це иетнестэ, а 2008 иестэ те проектэнть кемекстызь ламот обще­ственной вейсэндявкстнэ ды деятельтне, Рузонь Право­славной Церьковась ды лиятне. Те чинть Советэнь Феде­рациям ды РФ-нь Госдумасо кемекстызь ды теизь Покш го­сударственной кенярксчикс.

Кармась валдо коекс те чистэнть тешкстамс сеть семиятнень, конатне истямо покш вечкемасо вейсэ эрить ламонь-ламонь иеть...
Паракина велесэ Паракшинтнэнь фа­милиям ловови историческойкс, эштё кезэрень шкасто саезь велесэнть канды покштояк покш смусть ды питне. Раськетнень-покштятнень ёвтнемаст коряс, велеськак секс истя лемдезь - Паракина (икеле мерсть - Парынзэле).

Кезэрень шкане, зярдо веленть таркасо кассь тусто пиже вирь, а виренть куншкава чудсь келей ды домка лей, те мазый таркантень сась эрямо васенце эриця - цёра ломань, конань лемезэ ульнесь Паракш. Сонзэ мельс те таркась пек тусь, ды стявтсь кудо, мейле урьвакстсь. Сайсь никс важодемадо а пелиця, эрзянь, кувака черьбуло марто вадря тейтерь. Сынь кармасть вейсэ парсте эрямо, кудост-чист ветямо, эйдест трямо-кастомо. Раськетнень ёвтнемаст коряс, сынь эрясть покш вечкемасо ды вейкест-вейкест туртов лездазь, вейке-вейкеде мелявтозь. Кодамо стака эрямось илязо уле, весе кудоютконь тевтнень тейсть велувсо, пингест эризь пек вечкезь... Семиянь те паро коенть поладызь сынст эйдесткак.

Се шкастонть саезь ютасть ламо иеть, но течис Паракина эрзянь велесэ Паракшин семиянь фамилиясь ловови пек кезэрень ды уцяскавокс, кудазорось чевте седеель, превеель, мелявтсь козяйкадонть ды весе семиядонть.

Семиясь, конань ланга ушодса эсь ёвтнемам, ламо иень перть эри Паракина эрзянь велесэ. Велесэнть сон ловови покш ды валдо примерэкс лия семиянь ломантнень туртов, кода яла велесэнть мерить: «Сельмть сынь кенярдовтыть, кода парсте вейсэ эрить, кода вейкест-вейкест эйсэ вечкить, кода вейкест- вейкест туртов лездыть.»

Иван Дмитриевич ды Галина Вячесла­вовна Паракшинтнэ велесэнть эрить 60- де ламо иеть. Сынь кавонест чачсть 1958 иестэ Паракина велесэ, мейле вейке иестэ вейсэ тусть 1-це классос. Истя жо вейсэ вадря оценка марто прядызь велень школанть, конань прядомадо мейле эрьвась тусь эсензэ киява.

Галина уш вишка порасто саезь бажась улемс врачокс, сонензэ пек вечкевсь те профессиясь, конась канды ломаннень покш лезэ, ашо халатсо оршазь ломантне марявсть тензэ натой иневаньксэкс, чевте седей марто Пазонь ломанекс. Секскак велень тейтересь школань прядомадо мейле апак кавтолдо тусь тонавтнеме Краснослободскоень медицинской техникумов, конань 1978 иестэ парсте прядызе ды получась фельдшерэнь профессия. Сеть шкатнестэ тонавтнеманть прядомадо мейле макснесть направленият, ды Галина кучозель важодеме Кочкуровань райононь Сабаева велень больницяв, тосо сон васенцеде ушодызе эсензэ вечкевикс роботанть. Мей­ле Галина кучозель Петровка велев. Аволь шождаль ушодомс роботамо фельдшерэнь тевсэнть, тень лангс апак вано, тейтересь пря эзь невте, седейшкава тейсь эсь вечкевикс тевензэ, ды ашо халатсо лия ломантнеяк свал тензэ лездакшность. Нейгак паро мельсэ Галина Вячеславовна ледстни од порань вадря иетнень.

Иван цёрась пек вечксь техника, машинатнень, секскак сон тусь тонавтнеме Кемлянь аграрной техникумов. Тосо тонавтнеманзо прядызе парсте, макссть тензэ диплом, ды эрямонзо сюлмизе те пек эрявикс профессиянть марто. Сась важодеме эсензэ тиринь велев, «Паракинский» кол­хозов, аравтызь механикекс. Цёрась эсензэ тевензэ содылизе парсте, секс колхозонь весе машинатне витнезельть шкасто. Колхозсо важодемстэ Иван невтизе прянзо вадря ёндо, пек ёроковоль, эсензэ вечкевикс тевензэ содылизе парсте, шофер ялгатнеяк путсть ломанькс, кунсолость валонзо. Се шкань колхозонь прявтось тень редизе ды аравтызе Иванонь инженерэкс. Те тевсэнтькак тевензэ мольсть аволь беряньстэ, сон бажась весе автопарконь техниканть кирдемс вадрясто, витнемань туртов эрявикс кшнитнень савкшнось добовамс ве ёндо, эрявсь маштомс покш ломантнень марто муемс эрявикс валт. Тевентень весе вийтнень ды содамочитнень путоманть кис Иван Дмитриевичень седе тов кочкизь колхозонь прявтокс.
Шкась яла мольсь, ды вана 80- це иестэ тундонь шкане Иван ды Галина таго вастовсть, ней сынь вейкест-вейкест лангс вансть аволь кода вейке классонь тонавтницят - вейкест-вейкест вечкиця ломанть. Мейле тейсть свадьба ды эрямост сюлмизь кеме сюлмосо.

Ютась зярыя шка, од полатне эрясть ды важодсть эсест тиринь велесэ, эрьвась эсензэ тевсэнть: Галина важодсь Паракина велень ФАП-со фельдшерэкс, Иван - колхозсо инженерэкс. Од ломантненень макссть кудо, кода лия од ломантнененьгак, ансяк эряк, важодть, тейть вечкевикс теветь ды кецнек эрямонтень! Паракшинтнэ кастсть кавто вадря цёрат, тонавтневтизь, кавонест цёратне прядызь Н.П.Огарёв лемсэ университетэнть, получасть высшей образования, служасть армиясо, урьвакстсть, эсест семияст марто уцяскавсто эрить Саранскойсэ, эрьвась важоди эсензэ вечкевикс тевсэнть.

Ломантне кортыть: «Уцяскавокс улемга, эряви строямс кудо, чачтомс-кастомс цёра, озавтомс чувто...» Галина Вячеславов­на ды Иван Дмитриевич тень топавтызь: кастсть кавто цёрат - Дмитрий ды Алек­сандр. Ней мельспарост - колмо нуцькатне - Ваня, Андрей ды Илья!
- Мезе эряви, штобу улемс уцяскав ло­манекс? - кевкстинь сынст. Каршо валсо мерсть: «Весе те улияк минек уцясканок, кецнеманок ды эрямонь-аштемань мельспаронок!»

Истя свал улезэяк!
Вана уш малав 40 иеть, кода Иван ды Галина эрить вейсэ, важодить ды эрьва чинтень вейсэ кецнить. Вастыть ошсто сыця эйкакшост, урьваст, нуцькаст, конатнень эйсэ вечкить лембе тетянь-авань вечкемасо. Цёраст-урьваст эсест кондят важодицят, вейке-вейкень вечкицят, лембе седейть, тетянь-авань ломанькс путыцят, ломань мартояк чевтестэ кортыцят. А стяко, нать, Паракина велесэ Паракшинтнэнь семиясь велень эрицятнень туртов ашти уцяскань ды покштояк покш вечкемань невтемакс!

Мила БОГАТОВА