Важное


Ютазь оймсема читнестэ Республикань Культурань кудосо зэрнесь «Шумбрат, Мордовия!» раськень творчествань фестивалесь. Дубёнкабуесь анокстась пек мельстуиця, виев ды мазый концерт.

Ды вана сцена лангс лиссь фольклорной покш хорось, косо вейсэ морасть эрзянь зярыя ансамблят: «Лайме», «Эри ведь», «Кемема». Сынь морызь Н.Мокшинэнь, Г.Вдовинэнь «Тиринь веле» содавикс моронть. Неть коллективтне эштё аволь весть лиснесть ваныцятнень икелев.
Кодамо концерт нурька моровтомо?! Тиринь кельсэ гайтев частушкат морасть сисем ават! Сыненст седясть В.Борчин ды В.Чичайкин.
Мазый номер невтсть «Морамо» раськень ансамблясь ды «Морыне» эйкакшонь фольклорной коллективесь. Морызь «Кода кармась монь авам» моронть.

Башка валт ёвтавлинек «Фантазия» киштемань студиядонть, конань вети Б.Слепцов. Сонзэ вишка, средней ды покш группань эйкакштне невтсть зярыя киштемат. Эрьвась вастозель виев цяпамосо! Сехте пек – «Случай в музее» лия ёнов а молиця киштемань номерэнть кисэ.

Сцена лангс лиснесть «Вдохновение» эйкакшонь хорось, Дубёнкань средней школань тонавтыцятнень хорось. Ваныцятне седейшкава вастызь Кенде велесэ чачозь морыцянть Александр Дёмкинэнь. Истя жо теке велень Артём Салаевень, сон морызе «Мама, не плачь» моронть ды казсь аванзо туртов цецяпусмо, тесэ ламонь эзть кирдеве сельведест.

Дубёнкань райононь артисттнэ анокстасть весеме ёндо виев ды паро концерт, ульнесть эрзянь кельсэ ламо номерт, конат кецявтызь ваныцятнень, эждизь седеест.


Теде мейле концерт невтсть Кочкурбуень артисттнэ. Нама, сцена лангс лиснесь «Гайги вайгель» РФ-нь народной творчествань заслуженной коллективесь. Сынь невтсть урьвакстомань-мирденень лисемань коень пелькс. Истя жо морасть «Вастома», «Норовава» (невтсть Тундонь ильтямонь кой) фольклорной ансамблятне.
Пек лембестэ ваныцятне вастызь вишка Кира Елаевань, сон морась бабанзо туртов алтазь морыне.

«Теремок» някань народной театрась, косо варчнить виест эйкакштне, невтсь «В гостях у Яги» путовкс. «Этюд» театрань коллективесь невтсь «Уральские пельмени» шоусто сценка, конань вельде пейдевтизь весе залонть. Ламо цяпамот алтавсть «Мужские страдания» номерэнтень, сонзэ анокстызь «Сударушка» ансамблясь ды «Задоринка» киштемань коллективесь, косо цёратне киштема вельде невтизь мелявксост-ризнэмаст.

Паро валт ёвтавлинек Сурвелень «Виринея» ды «Вечёра» ансамблятненень (вет.Т.Владимирова). Эрьва концертстэ сынь свал анокстыть мельстуиця номерт.
Коень коряс, концертэнь меельце номерэнть морамсто весе артисттнэ лисить сцена лангс, весе ваныцятне – стить таркастост ды виев цяпамосо ёвтыть сюкпрянь валт.

Татьяна МАТОРКИНА
ФОТОТНЕ: ЭДУАРД РЕТУНСКИЙ
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».